ប្រយ័ត្ន ៥ ​ចំណុចនេះបាន ទើបអាចការពារទូរសព្ទដៃពីមេរោគឬពួក Hacker

មិនមែនសុខៗមេរោគឆ្លងទូរសព្ទដោយឯកឯង ឬវាទៅជាគាំងៗដោយគ្មានមូលហេតុ ឬក៏ពួក Hacker ចេះតែវាយប្រហារដោយគ្មានតម្រុយពីយើងនោះទេ។ ទូរសព្ទមានមេរោគឬបង្កើតឱកាសអ្នកដល់ជនខិលខូចអាច Hack បាន សុទ្ធតែជាការធ្វេសប្រហែសរបស់អ្នកប្រើប្រាស់។ ប៉ុន្តែកុំព្រួយ! យើងអាចការពារបាន ដោយការពារតាមសកម្មភាព ៥ ខាងក្រោម៖

១. ប្រយ័ត្នចំពោះការចុចតំណរភ្ជាប់ (Link)

តំណរភ្ជាប់ដែលលោតឡើងលើហ្វេសប៊ុក ឬបណ្ដាញសង្គមនានាដើម្បីអនុញ្ញាតឱ្យ ដោនឡូតហ្វ្រី លេងហ្គេម ឬមើលវីដេអូហ្វ្រីជាដើម កុំចុចចូលផ្ដេសផ្ដាស ប្រសិនមិនស្គាល់ប្រភពច្បាស់ ព្រោះថា Link ទាំងនោះសឹងទាំងអស់ជាមេរោគ និងជារបស់ក្រុម Hacker។

២. ប្រយ័ត្នចំពោះការភ្ជាប់ វ៉ាយហ្វាយ (Wifi) សាធារណៈ

ការភ្ជាប់វ៉ាយហ្វាយសាធារណៈ ក៏ជាប្រភពមេរោគមួយដែលគួរប្រុងប្រយ័ត្ន។ មិនមែនដោយសារ វ៉ាយហ្វាយសាធារណៈមានមេរោគនោះទេ ប៉ុន្តែការដែលយើងងាយភ្ជាប់ប្រើអ៊ិនអរណិតដោយស្រួលៗ វាក៏បង្កភាពងាយស្រួលសម្រាប់ក្រុម Hacker ចូលលុកលុយទិន្នន័យរបស់យើង ព្រមទាំងបង្កើតមេរោគលើទូសរព្ទដៃផងដែរ។

៣. ប្រយ័ត្នចំពោះការប្រើប្រាស់ទូរសព្ទមួយទឹក

បើចៀសបាន គួរព្យាយាមចៀសទិញទូសរព្ទដៃមួយទឹកមកប្រើ ព្រោះក្រៅពីគុណភាពមិនសូវល្អ វាក៏គ្មានប្រភពច្បាស់លាស់។ យើងមិនដឹងថា អ្នកទិញមុននោះ ប្រើវាយ៉ាងណា​ មានមេរោគកម្រិតណាឡើយ។

៤. ធ្វើបច្ចុប្បន្នភាពកម្មវិធី (Update software)

ប្រសិនបើទូរសព្ទដៃទាមទារឱ្យអ្នក អាប់ដេតកម្មវិធី (Update software) ផ្សេងៗ សូមចុច អាប់ដេត ដើម្បីការពារការប្រហារពីការ hack ឬមេរោគលុកលុយ។ ការអាប់ដេតមិនត្រឹមតែជួយការពារ ថែមទាំងអាចជួយឱ្យទូរសព្ទដើរលឿន មិនគាំង មិនស្ទក់។

៥. ផ្លាស់ប្ដូរលេខសម្ងាត់

ដើម្បីសុវត្ថិភាពក្នុងការប្រើប្រាស់ឧបករណ៍បច្ចេកវិទ្យាអនឡាញ ឬទូរសព្ទដៃបានល្អ ត្រូវធ្វើការផ្លាស់ប្ដូរលេខសម្ងាត់ឱ្យបានញឹកញាប់យ៉ាងហោចណាស់ ៣ ខែម្ដង ជាពិសេសបើសិនមិនដែលបានប្ដូរអស់រយៈពេលជាយូរមកហើយ ត្រូវប្រញាប់ប្ដូរឥឡូវនេះ៕

ប្រែសម្រួល៖ សន្យា

ប្រភព៖ Bright Side

ចុចអាន៖ ការពារលេខកូដផ្ទាល់ខ្លួន! ពេលនេះលេខសម្ងាត់ជាង៨ពាន់លាន កំពុងលុកលុយដោយជនអនាមិក

ចុចអាន៖ ៥ វិធីការពារខ្សែសាកថ្មទូរសព្ទកុំឱ្យឆាប់ខូច