ព័ត៌មានអន្ដរជាតិ

សិង្ហបុរី ដាក់ចេញវិធានការ ហាមប្រើប្រាស់ទូរស័ព្ទ នៅតាមសាលារៀន

បានផុស

២ years មុន

នៅ

ថ្ងៃចន្ទ ១៩ សីហា ២០២៤

ដោយ

តាមសេចក្តីរាយការណ៍របស់សារព័ត៌មាន The Star កាលពីចុងសប្តាហ៍កន្លងទៅ, ប៉ុន្មានខែខាងមុខនេះ ក្រសួងអប់រំសិង្ហបុរី នឹងបញ្ចេញវិធានការដើម្បីដោះស្រាយជាមួយការប្រើប្រាស់ស្មាតហ្វូននៅក្នុងសាលារៀន ខណៈការស្រាវជ្រាវកាន់តែច្រើនបង្ហាញថា ការសម្លឹងមើលអេក្រង់ស្មាតហ្វូនច្រើនម៉ោង បណ្តាលឲ្យមានបញ្ហាសុខភាពផ្លូវចិត្តក្នុងចំណោមយុវវ័យ។

មុនពេលក្រសួងរៀបចំផែនការនេះ គេដឹងថា សាលារៀនទាំងឡាយ ក៏បានបង្កើនវិធានការទប់ស្កាត់ការប្រើប្រាស់ស្មាតហ្វូនរួចទៅហើយដែរ ក្នុងប៉ុន្មានឆ្នាំចុងក្រោយ។

ជុំវិញបញ្ហាស្មាតហ្វូន អ្នកនាំពាក្យក្រសួងនិយាយថា សាលារៀននៅទីនេះមានច្បាប់វិន័យនិងទម្លាប់គ្រប់គ្រងការប្រើប្រាស់ទូរស័ព្ទរបស់សិស្ស ក្នុងម៉ោងសិក្សា ដែលសមស្របនឹងកម្រិតសាលារៀន។ សាលារៀនអាចដាក់កម្រិតលើការប្រើប្រាស់ឧបករណ៍ចល័តទៅតាមតំបន់ ឬពេលវេលាដែលបានកំណត់ ដូចជាអំឡុងម៉ោងសម្រាក ក្រោយម៉ោងរៀន ឬនៅសាលប្រជុំជាដើម។

សូមបញ្ជាក់ថា សិង្ហបុរី មិនមែនជាប្រទេសតែមួយ ដែលដាក់ចេញវិធានការទប់ស្កាត់ការប្រើប្រាស់ស្មាតហ្វូនក្នុងសាលារៀនទេ ជាក់ស្តែងបារាំង ហ្វាំងឡង់ និងចិន ក៏អនុវត្តច្បាប់ហាមប្រាមលើទូរស័ព្ទដៃនៅក្នុងវិស័យអប់រំផងដែរ។

រម្លឹកទៅឆ្នាំ២០២៣ ពេលនោះអង្គការសហប្រជាជាតិ បានអំពាវនាវឲ្យមានការហាមឃាត់ជាសកលតែម្តង ព្រោះថា ការប្រើប្រាស់ស្មាតហ្វូននៅក្នុងសាលារៀនគឺពិតជារំខានដល់ការសិក្សា និងប៉ះពាល់ខ្លាំងបំផុតទៅលើសុខភាពផ្លូវចិត្ត៕

អត្ថបទ៖ សុខ សុវណ្ណ