រថយន្តតាក់សុីចំនួន៣គ្រឿងត្រូវបានអាជ្ញាធរខណ្ឌច្បារអំពៅ ចាប់ឃាត់ទុកនៅសាលាខណ្ឌ បន្ទាប់ពីរថយន្តតាក់សុីខាងលើឈប់ចាប់ម៉ូយលើដងផ្លូវបង្កភាពអនាធិបតេយ្យលើដងផ្លូវ ពិសេសផ្លូវជាតិលេខ១។

តាមប្រភពពីលោក គុយ គឹមហ៊ាង ប្រធានការិយាល័យសាធារណការសាលាខណ្ឌច្បារអំពៅ បានប្រាប់ កម្ពុជាថ្មី នៅព្រឹកថ្ងៃទី៣១ ខែតុលា នេះថា មូលហេតុដែលអាជ្ញាធរចាប់ឃាត់រថយន្តតាក់សុីទាំង៣គ្រឿងយកមករក្សាទុកនៅសាលាខណ្ឌនេះ គឺដោយសារតែអ្នកបើកបរឈប់ចាប់ម៉ូយនៅតាមបណ្តោយផ្លូវជាតិលេខ១ ពិសេសនៅតាមភ្លើងស្តុបធ្វើឲ្យប៉ះពាល់ដល់ការធ្វើចរាចរណ៍ដល់អ្នកដំណើ។

លោក គុយ គឹមហ៊ាង បានបន្តថា កន្លងមកសាលាខណ្ឌបានធ្វើការជូនដំណឹងដល់អ្នកបើកបររថយន្តតាក់ឲ្យគោរពតាមការជូនដំណឹងដែលសំណូមពរដល់រថយន្តតាក់សុីត្រូវឈប់ដាក់ម៉ូយតាមបេនចៀសវាងរត់ប្រសេចប្រសាចតាមដងផ្លូវហើយប្រឈមមុខនឹងគ្រោះថ្នាក់ដល់អ្នកដំណើទៀតផង។ ចំពោះរថយន្តដែលរឹងទទឹងមិនគោរពតាមការណែនាំត្រូវចាប់ឃាត់ទុកនៅសាលាខណ្ឌច្បារអំពៅ ចំនួន៧ថ្ងៃបន្ទាប់ពីកោះអញ្ជើញអ្នកបើកបរឲ្យមកធ្វើកិច្ចសន្យាស្ថិតនៅចំពោះមុខអាជ្ញាធរមុនពេលយករថយន្តចេញទៅប្រកបអាជីវកម្ម។

ទាក់ទងករណីចុះឃាត់រថយន្តតាក់សុីខាងលើនេះ បងប្អូនអ្នកធ្វើដំណើសំណូមពរដល់អាជ្ញាធរខណ្ឌមានជ័យសូមចុះណែនាំដល់រថយន្តតាក់សុីដែលឈប់ចាប់ម៉ូយនៅក្រោមស្ពានអាកាសក្បាលថ្នល់ផង ព្រោះប្រឈមនឹងគ្រោះពេលអ្នកចាប់ម៉ូយរត់ដេញតាមអ្នកជិះម៉ូតូ ងាយនឹងធ្លាក់ពីលើម៉ូតូគ្រោះថ្នាក់ជាយថាហេតុ៕

អត្ថបទ៖ នរា