ការរឹតបន្តឹងច្បាប់ចរាចរណ៍ផ្លូវគោក នៅយប់ថ្ងៃ ទី១១ ឃាត់បានយានយន្តល្មើសចំនួន ៩៧គ្រឿង

យោងតាមរបាយការណ៍ពីស្នងការរដ្ឋាននគរបាលរាជធានីភ្នំពេញ បានបង្ហាញថា​ ការរឹតបន្តឹងច្បាប់ចរាចរណ៍ផ្លូវគោក នៅយប់ថ្ងៃទី១១ ខែកុម្ភៈ ឆ្នាំ២០២៤ ឃាត់បានយានយន្តល្មើសចំនួន ៩៧គ្រឿង។

របាយការណ៍ បានបញ្ជាក់ថា តាមបណ្តាអធិការដ្ឋាននគរបាលខណ្ឌ បានចុះអនុវត្តរឹត​បន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ដោយឃាត់យានយនុ្តល្មើសចំនួន ៩៧គ្រឿង ក្នុងនោះមានរថយន្តចំនួន ៣៧គ្រឿង និងម៉ូតូចំនួន ៦០គ្រឿង។ យានយន្តដែលល្មើសជាតិស្រវឹងមាន ៤៩គ្រឿង កម្រិត ០.២៥ – ០.៣៩ mg/L ចំនួន ១៣គ្រឿង ដោយមានអ្នកបើកបរម៉ូតូចំនួន ៣នាក់ និងអ្នកបើកបររថយន្តចំនួន១០នាក់។

ចំណែក កម្រិត ០.៤០ mg/L ឡើង មានចំនួន ៣៦គ្រឿង អ្នកបើកបរម៉ូតូមានចំនួន ២០នាក់ និងអ្នកបើកបររថយន្ត ១៦នាក់។ ដោយឡែក សម្រាប់បទល្មើសផ្សេងៗ មានចំនួន​ ៤៨គ្រឿង ក្នុងនោះអត់មួកសុវត្ថិភាព ៣៣គ្រឿង ម៉ូតូគ្មានប័ណ្ណបើកបរ ៣គ្រឿង ម៉ូតូជិះបញ្រ្ចាស ចំនួន ១គ្រឿង និងរថយន្តគ្មានប័ណ្ណបើកបរចំនួន ១១គ្រឿង។

សម្រាប់លទ្ធផលរយៈពេល ១១ថ្ងៃ ពីថ្ងៃទី១-១១ ខែកុម្ភៈ ឆ្នាំ២០២៤ បានឱ្យដឹងថា យានយន្តចូលគោលដៅចំនួន ៥ ៩៦៩គ្រឿង រថយន្តធំ ៥៥គ្រឿង រថយន្តតូច១ ៣៧៧គ្រឿង ម៉ូតូ ៤ ៥៣៧គ្រឿង។ ក្នុងនោះរកឃើញយានយន្តល្មើសសរុបចំនួន ៤ ៤៥៨គ្រឿង រថយន្តធំ ៣៦គ្រឿង រថយន្តតូច ៩៨៩គ្រឿង និងម៉ូតូ ៣ ៤៣៣គ្រឿង (៣ ៤៣៣ករណី) ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស។

របាយការណ៍ បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពចរាចរណ៍យ៉ាងល្អប្រសើរ៕