ព័ត៌មានអន្ដរជាតិ

ក្រុងសេអ៊ូល៖ កូរ៉េខាងជើងទំនងទទួលបានជំនួយពីរុស្ស៊ីសម្រាប់ការអភិវឌ្ឍនាវាមុជទឹក

បានផុស

៩ ខែ មុន

នៅ

ថ្ងៃចន្ទ ១៣ តុលា ២០២៥

ដោយ

Chheang

រដ្ឋមន្ត្រីការពារជាតិកូរ៉េខាងត្បូង លោក Ahn Gyu-back បានប្រាប់ថា ប្រទេសកូរ៉េខាងជើងទំនងជាទទួលបានជំនួយបច្ចេកទេសពីប្រទេសរុស្ស៊ី សម្រាប់កម្មវិធីអភិវឌ្ឍន៍នាវាមុជទឹករបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅចំពោះមុខគណៈកម្មាធិការការពារជាតិនៃរដ្ឋសភានាថ្ងៃចន្ទទី១៣ខែតុលានេះ លោក Ahn បាននិយាយថា វាហាក់ដូចជាការពិតដែលទីក្រុងព្យុងយ៉ាងកំពុងទទួលបានបច្ចេកវិទ្យាផ្សេងៗ ពីប្រទេសរុស្ស៊ី ដើម្បីគាំទ្រការជំរុញរបស់ខ្លួនក្នុងការសាងសង់នាវាមុជទឹកដែលមានសមត្ថភាពបាញ់មីស៊ីលបាលិស្ទិក។

កូរ៉េខាងជើងបានប្តេជ្ញាជាយូរមកហើយក្នុងការអភិវឌ្ឍមីស៊ីលបាលិស្ទិកបាញ់ចេញពីនាវាមុជទឹក (SLBMs) និងបានធ្វើការបាញ់សាកល្បងជាច្រើនដង។ ទោះជាយ៉ាងណា វានៅតែមិនច្បាស់ថាតើប្រទេសនេះបានធ្វើការបាញ់បង្ហោះពិតប្រាកដដោយជោគជ័យពីនាវាមុជទឹកឬអត់។

លោករដ្ឋមន្ត្រីបានកត់សម្គាល់ទៀតថា ខណៈពេលដែលមានសញ្ញានៃវឌ្ឍនភាពបច្ចេកវិទ្យា វា«ឆាប់ពេកក្នុងការសន្និដ្ឋាន» ដែលថា កូរ៉េខាងជើងបានសម្រេចការបាញ់បង្ហោះ SLBM ពិតប្រាកដពីនាវា។

ទីក្រុងព្យុងយ៉ាងក៏ត្រូវបានគេជឿថាកំពុងធ្វើការលើនាវាមុជទឹកដើរដោយថាមពលនុយក្លេអ៊ែរ ដែលជាជំហានដ៏សំខាន់មួយឆ្ពោះទៅមុខក្នុងសមត្ថភាពយោធារបស់ខ្លួន និងពង្រីកជួរនៃការវាយប្រហារនុយក្លេអ៊ែរដែលមានសក្តានុពលរបស់ខ្លួន។

ក្នុងរយៈពេលពីរឆ្នាំកន្លងមកនេះ កូរ៉េខាងជើង និងរុស្ស៊ីបានពង្រឹងកិច្ចសហប្រតិបត្តិការយោធាយ៉ាងស៊ីជម្រៅ។ នេះបើយោងទៅតាមការស៊ើបការណ៍សម្ងាត់របស់កូរ៉េខាងត្បូង។ ការវាយតម្លៃរបស់ទីក្រុងសេអ៊ូលបង្ហាញថា ទាហានកូរ៉េខាងជើងជាង ១០ ០០០នាក់ ត្រូវបានដាក់ពង្រាយដើម្បីជួយរុស្ស៊ីក្នុងសង្គ្រាមប្រឆាំងនឹងអ៊ុយក្រែនជាថ្នូរនឹងជំនួយសេដ្ឋកិច្ច និងបច្ចេកវិទ្យាយោធាទំនើប។

ភាពជាដៃគូកាន់តែខ្លាំងឡើងរវាងទីក្រុងមូស្គូ និងទីក្រុងព្យុងយ៉ាង បានធ្វើឲ្យមានការព្រួយបារម្មណ៍សម្រាប់ទីក្រុងសេអ៊ូល វ៉ាស៊ីនតោន និងតូក្យូ ដែលថា វាអាចជំរុញកម្មវិធីអាវុធរបស់កូរ៉េខាងជើង និងធ្វើឲ្យសន្តិសុខក្នុងតំបន់មានអស្ថិរភាព៕

ដោយ៖ ឈាង