អាការៈរវើរវាយ ណាឃីម អន់ថយបន្តិចហើយ ខណៈគ្រូពេទ្យបញ្ជាក់ថា យ៉ាងយូរ ៣ថ្ងៃ នឹងប្រសើរឡើងជាងនេះ

ក្រោយសិល្បករវ័យក្មេងផ្នែកចម្រៀងបុរាណ លោក ណាឃីម ត្រូវបានបញ្ជូនទៅសម្រាកព្យាបាលបន្តនៅវៀតណាម នៅព្រឹកថ្ងៃទី១៥តុលានេះ លោក ព្រហ្ម ប្រសិទ្ធី ដែលជាសមាជិករួមក្រុមតន្ត្រីបុរាណដែរនោះ បានបញ្ជាក់ឱ្យដឹងថា អាការៈរោគរបស់ ណាឃីម រៀងអន់ថយបន្តិចហើយ ហើយយ៉ាងយូរ ៣ថ្ងៃទៀត អាចប្រសើរជាងនេះ។

ត្រឹមទទួលបានការបញ្ជាក់ដោយផ្តល់ក្តីសង្ឈឹមឡើងវិញពីក្រុមគ្រូពេទ្យ លោកថា លោកស្ងប់អារម្មណ៍ជាងមុនបន្តិចហើយ ខណៈដំណឹងនេះ ធ្វើឱ្យសាធារណជនចូលរួមត្រេកអរ និងជូនពរផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររំលឹកថា លោក ណាឃីម សិល្បករចម្រៀងផ្នែកបុរាណ និងជាសមាជិកក្រុមតន្ត្រីបុរាណរបស់អ្នកនាង ខាត់ សួស្តី ត្រូវបានក្រុមគ្រួសារ និងអ្នកស្និតស្នាលក្នុងរង្វង់សិល្បៈជ្រោមជ្រែងជួយ បញ្ជូនទៅព្យាបាលបន្តនៅប្រទេសវៀតណាមកាលពីរសៀលថ្ងៃទី១៤ តុលានេះ ខណៈកំពុងសម្រាកព្យាបាលបន្តនៅមន្ទីពេទ្យទាហ៊ាន ១៧៥ ក្នុងទីក្រុងហូជីមុិញ។

បើតាមលោក ព្រហ្ម ប្រសិទ្ធី បញ្ជាក់តាមការប៉ាន់ប្រមាណជំហានដំបូងរបស់ក្រុមគ្រូពេទ្យនៅទីនោះ បានឱ្យដឹងថា សិល្បករចម្រៀងផ្នែកបុរាណ ណាឃីម សង្ស័យមានជំងឺរលាកខួរក្បាលធ្ងន់ធ្ងរ និងរលាកសួត ។ តែទោះបីជាមានការសន្និដ្ឋានបែបនេះ ក៏លទ្ធផលត្រួតពិនិត្យជាក់លាក់ កំពុងបន្តធ្វើតេស្តនៅឡើយ។

ដោយឡែក ពាក់ព័ន្ធនឹងស្ថានភាពជំងឺសិល្បករចម្រៀងផ្នែកបុរាណរូបនេះ មុននឹងឈានបញ្ជូនទៅព្យាបាលបន្តនៅវៀតណាម អ្នកនាង ខាត់ សួស្តី បានឱ្យដឹងថា ខ្លួនទទួលបានដំណឹងពីក្រុមគ្រួសាររបស់តារាចម្រៀងបុរាណរូបនេះថា លោកមានជំងឺរលាកស្រោមខួរ, រលាកសួតធ្ងន់ធ្ងរ និង ក្រពះពោះវៀន។ តួយ៉ាង លោកក៏មានអាការៈវង្វេង ភ្នែកមើលលែងឃើញ ត្រចៀកស្តាប់លែងឮ នោមមិនចេញ និង បាយមិនបានផងដែរ។

ដោយសារតែស្ថានភាពធ្ងន់ធ្ងរបែបនេះ និងដោយមើលឃើញក្រុមគ្រួសារ ណាឃីម ក៏កំពុងជួបការលំបាកក្នុងការចំណាយព្យាបាលផង អ្នកនាង ខាត់ សួស្តី និងមិត្តទាំងក្នុង និងក្រៅសិល្បៈជាច្រើន បាននិងកំពុងបន្តស្វែងរកថវិកាជួយដល់លោក ណាឃីម និងអំពាវនាវដល់មហាជនឱ្យជួយបរិច្ចាគដល់លោកផងដែរ។

គួរជម្រាបដែរថា លោក ណាឃីម បានបញ្ជូនទៅដល់មន្ទីរពេទ្យនៅប្រទេសវៀតណាម នារសៀលនេះ ដោយមានរូបលោក ព្រហ្ម ប្រសិទ្ធី រួមដំណើរទៅជាមួយ។ ក្នុងនោះ លោក ព្រហ្ម ប្រសិទ្ធី បានបន្ថែមថា ប្រសិនបើទៅស្ថានភាពរបស់លោក ណាឃីម ធូរស្រាល ឬវិវត្តបែបណាទៀតនោះ លោកនឹងជម្រាបបន្ថែមទៀត៕