ព័ត៌មានជាតិ

សំរាមមុខរោងចក្រ ១ កន្លែង ក្នុងភូមិទួលពង្រ ជះក្លិនស្អុយខ្លាំង ប៉ះពាល់សុខភាពពលរដ្ឋ ជាង ១ ខែហើយ

បានផុស

៨ ខែ មុន

នៅ

ថ្ងៃអង្គារ ២១ តុលា ២០២៥

ដោយ

គំនរសំរាម នៅមុខរោងចក្រ ១ កន្លែង ដែលមានឈ្មោះហៅកាត់ J S ស្ថិតក្នុងភូមិទួលពង្រខាងកើត សង្កាត់ចោមចៅទី ១ ខណ្ឌពោធិ៍សែនជ័យ ជិតក្លាយជាភ្នំមួយទៅហើយ ថែមទាំងជះក្លិនស្អុយ ប៉ះពាល់ដល់បរិស្ថាន សណ្ដាប់ធ្នាប់ និងសុខភាពប្រជាពលរដ្ឋ ខណៈផ្លូវតំបន់នេះកំពុងស្ថាបនាមិនទាន់រួចរាល់ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថា រិទ្ធ ជាអាជីវករលក់ដូរនៅមុខរោងចក្រខាងលើ បានឲ្យដឹងថា នៅទីតាំងចោលសំរាមខាងលើនេះគ្រប់គ្រងដោយខាងរោងចក្រ ដោយមានរថយន្តសម្រាប់ដឹកផ្ទាល់ ហើយកន្លងមក រយៈពេល ១ សប្ដាហ៍ គឺ រថយន្តមកប្រមូលដឹកម្តង តែមួយរយៈក្រោយនេះ មិនឃើញមកដឹកទាល់តែសោះ។

លោក ថា រិទ្ធ បន្តថា គ្រប់អាជីវករដែលលក់នៅមុខរោងចក្រនោះ គឺ បង់ភាស៊ីថ្លៃសំរាមចូលទៅខាងរោងចក្រ ក្នុងម្នាក់ ១ ពាន់រៀល ដោយព្រឹក ៥០០ រៀល ហើយល្ងាច ៥០០ រៀល។

លោកបន្តទៀតថា ចំពោះក្រុមហ៊ុនប្រមូលសំរាមវិញ គឺ ប្រមូលតែមួយចំហៀងផ្លូវខាងលិចនោះទេ ពោលមុខផ្ទះប្រជាពលរដ្ឋដែលបានបង់ប្រចាំខែទៅក្រុមហ៊ុនតែប៉ុណ្ណោះ។ ទីតាំងខាងលើនេះ បញ្ហាសំរាម គឺ រយៈពេលជាង ១ ខែមកហើយ ដោយមិនឃើញខាងរថយន្តដឹកសំរាមរបស់រោងចក្រមកដឹកនោះទេ ទុកឲ្យស្អុយរលួយជះក្លិនស្អុយដល់ប្រជាពលរដ្ឋរស់នៅក្បែរនោះ និងជិតក្លាយទៅជាភ្នំមួយទៅហើយ។

ប្រជាពលរដ្ឋ ក៏បានស្នើទៅអាជ្ញាធរពាក់ព័ន្ធ សូមមេត្តាជួយចុះពិនិត្យមើលផង ព្រោះរាល់ថ្ងៃពិបាករស់នៅណាស់ ដោយសារតែសំរាមទាំងនោះមានជះក្លិនស្អុយខ្លាំង។

លោក ចេង ខន ប្រធានភូមិទួលពង្រ ប្រាប់កម្ពុជាថ្មីឲ្យដឹងថា ពាក់ព័ន្ធបញ្ហានេះ គឺ ទី១-ខាងក្រុមហ៊ុនប្រមូលសំរាមមិនបានរាយការណ៍ទៅលោកទេ។ និងទី២-លោកមិនមានចំណាត់ការអ្វីនោះទេ ដោយឲ្យទាក់ទងទៅខាងសង្កាត់វិញ៕

អត្ថបទ ៖ សុខា