ម៉ូតូបុកឡានក្រុងបង្កជាអគ្គិភ័យសម្លាប់មនុស្ស២៥នាក់ក្នុងប្រទេសឥណ្ឌា

យ៉ាងហោចណាស់មនុស្ស ២៥ នាក់ស្លាប់ និងជាច្រើននាក់ទៀតរងរបួស ក្នុងហេតុការណ៍ម៉ូតូបុករថយន្តក្រុងដឹកអ្នកដំណើរមួយគ្រឿងបង្គជាអគ្គិភ័យឆាបឆេះនៅរដ្ឋ Andhra Pradesh ភាគខាងត្បូងប្រទេសឥណ្ឌា។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៤ខែតុលា។

រថយន្តក្រុងនេះដឹកអ្នកដំណើរ ៤៤ នាក់ធ្វើដំណើរពីទីក្រុង Hyderabad ទៅទីក្រុង Bengaluru។ បន្ទាប់មកមានម៉ូតូមួយគ្រឿងបើកបុកពីក្រោយនៅជិតភូមិ Chinnatekuru ក្នុងស្រុក Kurnool ចម្ងាយប្រហែល ២១០ គីឡូម៉ែត្រភាគខាងត្បូងនៃទីក្រុង Hyderabad។ ការបុកនេះបង្កឱ្យមានផ្កាភ្លើងឆាបឆេះធុងប្រេងរបស់រថយន្តក្រុង ធ្វើឱ្យរថយន្តឆេះសន្ធោសន្ធៅក្នុងរយៈពេលតែប៉ុន្មាននាទី។

ដោយសារអ្នកដំណើរជាច្រើនកំពុងដេកលក់ នៅពេលមានភ្លើងឆេះ ធ្វើឱ្យពួកគេជាប់នៅខាងក្នុង។ អ្នកខ្លះបានបំបែកបង្អួច និងលោតចេញ រត់គេចខ្លួនដោយមានរបួសស្រាល ខណៈអ្នកផ្សេងទៀតរងរបួសរលាកធ្ងន់ធ្ងរមុនពេលក្រុមជួយសង្គ្រោះមកដល់។ មនុស្ស ១៨ នាក់បានរួចជីវិត ហើយឥឡូវនេះកំពុងទទួលការព្យាបាល។ ចំណែកអ្នកជិះម៉ូតូក៏បានបាត់បង់ជីវិតដែរ។

គួរបញ្ជាក់ថានេះជាអគ្គិភ័យឆាបឆេះឡានក្រុងលើកទីពីរហើយ ដែលបណ្តាលឲ្យមានមនុស្សស្លាប់នៅក្នុងប្រទេសឥណ្ឌាក្នុងរយៈពេលតិចជាងពីរសប្តាហ៍។ កាលពីដើមខែនេះ ក៏មានឡានក្រុងមួយគ្រឿងនៅរដ្ឋ Rajasthan ឆាបឆេះដោយសារឆ្លងចរន្តអគ្គិសនី សម្លាប់មនុស្សយ៉ាងហោចណាស់ ២០នាក់ ដែលបង្កើនការព្រួយបារម្ភថ្មីៗអំពីសុវត្ថិភាពផ្លូវថ្នល់ និងយានយន្តនៅក្នុងប្រទេសឥណ្ឌា៕

អត្ថបទ៖ ប៊ុន សុភាព