ខេត្តរតនគិរី និងខេត្តក្វាងង៉ាយ ចុះហត្ថលេខារុករកអដ្ឋិធាតុកងទ័ពស្ម័គ្រចិត្តវៀតណាមសម្រាប់រដូវប្រាំង

ខេត្តរតនគិរី (កម្ពុជា) និងខេត្តក្វាងង៉ាយ (វៀតណាម) ចុះហត្ថលេខា បន្តការអនុវត្តភារកិច្ចរុករក គាស់លើកអដ្ឋិធាតុកងទ័ពស្ម័គ្រចិត្ត និងអ្នកជំនាញការវៀតណាម ដែលពលីនៅក្នុងសម័យសង្រ្គាមនៅក្នុងទឹកដីខេត្តរតនគិរី សម្រាប់រដូវប្រាំងឆ្នាំ២០២៥-២០២៦។

ពិធីចុះហត្ថលេខានេះធ្វើឡើងនៅថ្ងៃទី ២៤ ខែតុលា ឆ្នាំ ២០២៥ ក្នុងកិច្ចប្រជុំរវាងគណៈកម្មការជំនាញខេត្តរតនគិរី និងគណៈកម្មការជំនាញខេត្តក្វាងង៉ាយ ស្ដីពីការសម្របសម្រួល ការអនុវត្តភារកិច្ចរុករក គាស់លើកអដ្ឋិធាតុកងទ័ពស្ម័គ្រចិត្ត និងអ្នកជំនាញការវៀតណាម ដែលពលីនៅក្នុងសម័យសង្រ្គាមនៅលើទឹកដីខេត្តរតនគិរី និងធ្វើមាតុភូមិនិវត្តន៍ សម្រាប់រដូវប្រាំង ឆ្នាំ២០២៥-២០២៦ ។ ពិធីនេះប្រព្រឹត្តទៅក្រោមអធិបតីភាពលោក ម៉ា វិចិត្រ អភិបាលរងខេត្ត និងជាប្រធានគណៈកម្មការជំនាញខេត្តរតនគិរី និងលោកស្រី អ៊ី ង៉ុក អនុប្រធានគណៈកម្មាធិការប្រជាជនខេត្ត និងជាប្រធានគណៈកម្មការជំនាញខេត្តក្វាងង៉ាយ។

នៅក្នុងឱកាសនេះ ភាគីទាំងពីរបានវាយតម្លៃខ្ពស់ចំពោះលទ្ធផលដែលទទួលបានក្នុងការរៀបចំអនុវត្តតាមខ្លឹមសារកំណត់ហេតុដែលគណៈប្រតិភូទាំងពីរបានឯកភាពគ្នាកាលពីឆ្នាំ ២០២៤-២០២៥ ទោះបីជាលក្ខខណ្ឌព័ត៌មានពីកន្លែងបញ្ចុះសពកងទ័ពស្ម័គ្រចិត្តកាន់តែពិបាក។ ប៉ុន្តែដោយមានការសហការ និងជួយគាំទ្ររបស់គណៈកម្មកា​រ​​ជំនាញខេត្តរតនគិរី នារដូវប្រាំងឆ្នាំ២០២៤-២០២៥ ក្រុមK53 របស់គណៈកម្មការជំនាញខេត្តកន្ទូម ឥឡូវខេត្តក្វាងង៉ាយ បានស្វែងរក​ ជីកគាស់ និងធ្វើមាតុភូមិនិវត្តន៍កងទ័ពស្ម័គ្រចិត្ត និងជំនាញ​ការវៀតណាម ដែលពលីក្នុងសម័យសង្គ្រាមនៅក្នុងភូមិសាស្រ្ត ខេត្តរតនគិរី ចំនួ​​​ន១០អដ្ឋិធាតុ។

ដោយឡែកសម្រាប់រដូវប្រាំង ២០២៥-២០២៦នេះ គណៈកម្មការជំនាញខេត្តក្វាងង៉ាយ និងគណៈកម្មការជំនាញខេត្តរតនគិរី ឯកភាពសហការគ្នាឱ្យកាន់តែស្អិតរមួតបន្ថែមទៀត ជំរុញការផ្សព្វផ្សាយឱ្យកាន់តែខ្លាំង ចលនាប្រជាជនបន្តផ្តល់ព័ត៌មានអំពីទីតាំងផ្នូរ លើកកម្ពស់ប្រសិទ្ធភាពការងាររុករក ជីកគាស់ ប្រមូលអដ្ឋិធាតុអោយកាន់តែល្អប្រសើរបន្ថែមទៀត៕

ដោយ៖ ខៀវ ចាប