អាជ្ញាធរខេត្តបន្ទាយមានជ័យ ចុះបិទទីតាំងសត្តឃាតដ្ឋានសត្វជ្រូកមួយកន្លែងដែលបង្កក្លិនស្អុយរំខានការរស់នៅរបស់ពលរដ្ឋ

អាជ្ញាធរខេត្តបន្ទាយមានជ័យ និងមន្ត្រីជំនាញបសុពេទ្យនៃមន្ត្រីកសិកម្មខេត្ត នៅព្រឹកថ្ងៃទី២៧ ខែតុលា ឆ្នាំ២០២៥ នេះបានចុះបិទទីតាំងសត្តឃាតដ្ឋានសត្វជ្រូកមួយកន្លែង ដែលបង្កក្លិនស្អុយរំខានដល់ការរស់នៅរបស់ប្រជាពលរដ្ឋ នៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ការចុះបិទទីតាំងទីសត្តឃាតដ្ឋានសត្វជ្រូកមួយកន្លែងនេះ ដឹកនាំដោយលោក ឃ្លោក នួយ អភិបាលរងខេត្តបន្ទាយមានជ័យ និងមានការចូលរួមពីមន្រ្តីអន្តរវិស័យមន្រ្តីការិយាល័យបសុពេទ្យ នៃមន្ទីរកសិកម្មខេត្ត អាជ្ញាធរក្រុងប៉ោយប៉ែតព្រមទាំងមានការចូលរួមពីភាគីម្ចាស់ទីសត្តឃាតខាងលើដែរ។

លោក ឃ្លោក នួយ អភិបាលរងខេត្តបន្ទាយមានជ័យ បានប្រាប់ឲ្យម្ចាស់ទីតាំងត្រូវផ្អាកសកម្មភាពពិឃាត់សត្វ និងទុករយៈពេល២សប្តាហ៍ទៀតអោយរុះរើ។ ព្រោះថា អាជ្ញាប័ណ្ណនៃទីសត្តឃាតនេះបានផុតកំណត់តាំងពីឆ្នាំ២០២៤ ដោយរដ្ឋពុំបានអនុញាតអោយបន្តអាជីវកម្មលើទីតាំងខាងលើទៀតទេ។

មូលហេតុដែលឈានដល់ការបិទទីតាំងសត្តឃាតសត្វជ្រូកនេះ ដោយសារតែមានបណ្ដឹងពីប្រជាពលរដ្ឋដែលរងផលប៉ះពាល់ដោយសារក្លិនស្អុយ និងសំឡេងរំខាន់ដល់ពលរដ្ឋនៅជុំវិញទើបអាជ្ញាធរខេត្តសម្រេចបិទទីតាំងនេះតែម្តង់។

សូមបញ្ជក់ថា ក្រៅពីបញ្ហាខាងលើកន្លងមកទីតាំងសត្តឃាតនេះ ក៏មានបញ្ហាចម្រូងចម្រាសគ្នាជាមួយទីតាំងសត្តឃាតមួយទៀតលើសិទ្ធិក្នុងការប្រកបអាជីវកម្មផងដែរ៕

អត្ថបទ៖ អពៅ