អតិថិជនបុរី ឡេង ណាវ៉ាត្រា 6A មួយចំនួនមកទទួលដំណោះស្រាយ និងបញ្ចប់ដោយស្នាមញញឹមនឹងឈ្នះឈ្នះទាំងអស់គ្នា!

បន្ទាប់ពីបុរី ឡេង ណាវ៉ាត្រា 6A ដាក់ដំណោះស្រាយជាកញ្ចប់ អតិថិជនមួយចំនួនបានចាប់ផ្តើមមកទទួលយកដំណោះស្រាយពីបុរីជាបណ្តើរៗហើយប្រកបដោយស្នាមញញឹមឈរលើស្មារតីឈ្នះឈ្នះទាំងអស់គ្នា។ នេះបើយោងបណ្តាញសង្គមផ្លូវការរបស់អ្នកឧកញ៉ា ឡេង ណាវ៉ាត្រា បានបង្ហោះរូបភាពអតិថិជនភ្ជាប់ជាមួយខ្លឹមសារនៅថ្ងៃទី៧ ខែវិច្ឆិកា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈបណ្តាញសង្គមអ្នកឧកញ៉ាឡេងណាវ៉ាត្រា បានបង្ហាញសកម្មភាពអតិថិជនមកទទួលដំណោះស្រាយ និងបញ្ចប់ដោយស្នាមញញឹមនឹងឈ្នះឈ្នះទាំងអស់គ្នា។ ដោយបញ្ជាក់ថាបុរីឡេងណាវ៉ាត្រាឈរលើកគោលការណ៍ដោះស្រាយមិនឲ្យអតិថិជនខាតបង់អត្ថប្រយោជន៍ឡើយ។

ជាមួយគ្នានេះ បុរី សូមអរគុណដល់ក្រសួងរៀបចំដែនដីនគរូបនីយកម្មនិងសំណង់ព្រមទាំងអាជ្ញាធរគ្រប់ជាន់ថ្នាក់ដែលបានជួយសម្របសម្រួលប្លង់ជូនអតិថិជនបុរីឡេងណាវ៉ាត្រា ខណៈនាពេលបច្ចុប្បន្នក្រុមការងារបុរីក៏កំពុងតែទាក់ទងអតិថិជនដើម្បីធ្វើការដោះស្រាយបញ្ចប់ជាបន្តបន្ទាប់។

គួរឲ្យដឹងថា កាលល្ងាចថ្ងៃទី២៤ ខែតុលា ក្រសួងរៀបចំដែនដីនគរូបនីយកម្ម និងសំណង់ និងបុរី ឡេង ណាវ៉ាត្រា បានជួបតំណាងអតិថិជនដើម្បីជជែកស្វែងរកដំណោះស្រាយ ជម្រាបពីបច្ចុប្បន្នភាពចរន្ដការបំបែកប័ណ្ណ ដោយក្រុមហ៊ុនបានផ្ដល់ដំណោះស្រាយរួមដល់តំណាងយកទៅជជែកជាមួយអតិថិជនទាំងអស់ ហើយក្រសួងក៏ត្រៀមអញ្ជើញអតិថិជនប្លុកផ្សេងៗមកជជែករកដំណោះស្រាយជាបន្ដបន្ទាប់។

ជាមួយគ្នានេះ បុរីក៏បានចាប់ផ្ដើមធ្វើការទាក់ទងផ្ដល់ព័ត៌មាន និងអញ្ជើញអតិថិជនមកផ្ដល់ព័ត៌មានដោយផ្ទាល់ ជាលទ្ធផលមានអតិថិជនមួយចំនួន បានទទួលយកដំណោះស្រាយពីខាងបុរី។ បុរីនឹងបន្តជួបអតិថិជនគ្រប់ប្លុក និងរកដំណោះស្រាយជាបន្តបន្ទាប់ ក្រោមការសម្របសម្រួលរបស់ក្រសួងរៀបចំដែនដី អាជ្ញាធរពាក់ព័ន្ធ ដើម្បីបន្ដសកម្មភាពការចាក់ដី ការសាងសង់ និងការប្រគល់ប្លង់ រហូតបញ្ចប់គម្រោងទាំងស្រុង៕