ព័ត៌មានអន្ដរជាតិ

ថៃនឹងរៀបចំវេទិកាជជែកដេញដោលសាធារណៈលើការលុបចោល MOU ៤៣-៤៤ ជាមួយកម្ពុជា

បានផុស

៦ ខែ មុន

នៅ

ថ្ងៃចន្ទ ១៧ វិច្ឆិកា ២០២៥

ដោយ

Chheang

រដ្ឋាភិបាលថៃនឹងចាប់ផ្តើមរៀបចំវេទិកាជជែកដេញដោលសាធារណៈទូទាំងប្រទេសលើបញ្ហាថាតើគួរលុបចោលកិច្ចព្រមព្រៀងព្រំដែនទាំងពីរដែលគេស្គាល់ថា MOU ៤៣ និង ៤៤ ដែរឬអត់។ នេះបើតាមការថ្លែងរបស់រដ្ឋមន្ត្រីជាន់ខ្ពស់ថៃម្នាក់នាថ្ងៃចន្ទទី១៧ខែវិច្ឆិកានេះ ដោយលោកបានសង្កត់ធ្ងន់ថា គណបក្សកាន់អំណាច Bhumjaithai មានជំហរច្បាស់លាស់ ប៉ុន្តែក៏ត្រូវពិចារណាលើមតិសាធារណៈផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៍មានថៃ Top News លោក Paradorn Prisanananthakul រដ្ឋមន្ត្រីប្រចាំការិយាល័យនាយករដ្ឋមន្ត្រី បាននិយាយថា លោក អនុទីន ឆានវីរៈគុល នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានណែនាំមន្ត្រីឲ្យប្រមូលទស្សនៈពីសមាជិកសភា និងព្រឹទ្ធសភា មុននឹងធ្វើការសម្រេចចិត្តណាមួយលើជោគវាសនានៃអនុស្សរណៈយោគយល់ (MOUs) ដែលបានចុះហត្ថលេខាជាមួយកម្ពុជាក្នុងឆ្នាំ២០០០ និង២០០១។

លោកបានបន្តថា អនុនាយករដ្ឋមន្ត្រីទទួលបន្ទុកកិច្ចការច្បាប់ លោក Bowornsak Uwanno បានចាត់តាំងរូបលោកថ្មីៗនេះឲ្យសម្របសម្រួលជាមួយគណៈកម្មាធិការសភាដែលកំពុងសិក្សាបញ្ហានេះ។ លោកបានបន្ថែមថា គណៈកម្មាធិការទាំងនោះបានយល់ព្រមរៀបចំវេទិកាជជែកដេញដោលដើម្បីអប់រំសាធារណជន និងប្រមូលមតិយោបល់។

លោក Paradorn បានបញ្ជាក់ទៀតថា ការជជែកដេញដោលនឹងនាំភាគីអ្នកគាំទ្រ និងអ្នកប្រឆាំងនឹងការលុបចោល MOUs មកជុំគ្នា ហើយនឹងផ្តោតលើខេត្តព្រំដែនចំនួន៧ ដែលរងផលប៉ះពាល់ខ្លាំងបំផុតដោយសារកិច្ចព្រមព្រៀងនេះ។ វេទិកាបន្ទាប់នឹងត្រូវធ្វើនៅតាមតំបន់ផ្សេងៗទៀត ដោយរដ្ឋាភិបាលនឹងរ៉ាប់រងលើការចំណាយទាំងអស់។

ឆ្លើយតបនឹងសំណួរថា ហេតុអ្វីបានជាគណៈរដ្ឋមន្ត្រីមិនគ្រាន់តែបោះឆ្នោតលុបចោល MOUs នោះ លោក Paradorn បានរៀបរាប់ថា រដ្ឋាភិបាលចង់ធានាឲ្យមានការចូលរួមពីសាធារណជន។ លោកថ្លែងថា «ប្រជាជនត្រូវទទួលបានព័ត៌មានពេញលេញ ដើម្បីធ្វើការសម្រេចចិត្តដោយមានព័ត៌មានគ្រប់គ្រាន់»។

សូមជម្រាបថា MOU ៤៣-៤៤ សំដៅទៅលើអនុស្សរណៈយោគយល់ (Memorandum of Understanding) ចំនួនពីរដែលត្រូវបានចុះហត្ថលេខារវាងប្រទេសកម្ពុជា និងប្រទេសថៃ នាអំឡុងឆ្នាំ២០០០ និង ២០០១។ អនុស្សរណៈយោគយល់នេះ ស្ដីពីការបោះបង្គោលព្រំដែនគោក និងការរុករក ព្រមទាំងការអភិវឌ្ឍតំបន់ត្រួតស៊ីគ្នានៅលើដែនសមុទ្ររវាងប្រទេសជិតខាងទាំងពីរ។ យ៉ាងណាមិញ បច្ចុប្បន្ន MOU ទាំងពីរនេះ កំពុងក្លាយជាប្រធានបទដ៏រសើបក្នុងនយោបាយថៃ ដោយក្រុមអ្នកនយោបាយមួយចំនួន (រួមទាំងគណបក្ស Bhumjaithai) ជំរុញឲ្យមានការលុបចោល ដោយលើកឡើងពីកង្វល់ថាវាអាចធ្វើឲ្យថៃបាត់បង់អធិបតេយ្យភាពទឹកដី និងផលប្រយោជន៍ធនធានធម្មជាតិ៕

ប្រែសម្រួល៖ ឈាង