ជាង១សប្ដាហ៍ កម្ពុជា-ថៃបោះបង្គោលព្រំដែនបណ្តោះអាសន្នបាន៩៤បង្គោលនៅចន្លោះបង្គោលលេខ៥២ និង៥៩

ពីថ្ងៃទី៨ ដល់ថ្ងៃទី១៧ ខែវិច្ឆិកា ភាគីកម្ពុជា និងភាគីថៃ បានឯកភាពបោះបង្គោលបណ្តោះអាសន្ននៅលើដីជាក់ស្តែងបានចំនួន ៩៤ បង្គោល លើផែនការសរុប ១៦៦បង្គោល គិតជាភាគរយសម្រេចបានប្រមាណ ៥៦%។ នេះបើតាមមន្ត្រីជាន់ខ្ពស់ នៃរដ្ឋលេខាធិការដ្ឋានកិច្ចការព្រំដែននៃកម្ពុជា  ថ្លែងឱ្យដឹងនៅថ្ងៃទី១៧ ខែវិច្ឆិកានេះ។

តាមប្រភពដដែល  បង្គោលបណ្ដោះអាសន្នដែលបានបោះគឺនៅកំណាត់ខ្សែព្រំដែនចន្លោះបង្គោលលេខ ៥២ និងលេខ៥៩ ក្នុងភូមិសាស្រ្ត ស្រុកកំរៀងខេត្តបាត់ដំបងរបស់កម្ពុជា ជាប់នឹងខេត្តចន្ទបុរីរបស់ថៃ។ តាមការឱ្យដឹង កម្ពុជា-ថៃ នឹងបន្តការងារបោះបង្គោល បណ្តោះអាសន្ន នេះ ឱ្យចប់តាមផែនការនាពេលដ៏ខ្លីខាងមុខ។

គួរកត់សម្គាល់ថា ការងារបោះបង្គោលព្រំដែនដែនបណ្ដោះអាសន្ននៅតាមបន្ទាត់ព្រំដែនកម្ពុជា-ថៃ បានធ្វើឡើងរយៈពេលជាង២សប្ដាហ៍ ក្រោយពីកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ រៀបចំឡើងនៅខេត្តចន្ទបុរី ប្រទេសថៃ កាលពីថ្ងៃទី២១-២២ ខែតុលា ឆ្នាំ២០២៥ បានបញ្ចប់ទៅ។

គួររម្លឹកដែរថា នៅក្នុងកិច្ចប្រជុំនោះ ភាគីទាំងពីរ បានឯកភាពប្រគល់ភារកិច្ចជូនអនុគណៈកម្មការបច្ចេកទេសចម្រុះព្រំដែន (JTSC) កម្ពុជា-ថៃ សាងសង់ឡើងវិញនូវបង្គោលព្រំដែនចំនួន ១៥ តាមគំរូដើមបង្គោលជំនាន់បារាំងនៅទីតាំងដែលបានឯកភាពគ្នាលើទីតាំងដើម និងសាងសង់ឡើងវិញនូវបង្គោលព្រំដែនលិចទឹកចំនួន ៣ នៅទីតាំងដែលភាគីទាំងពីរ នឹងឯកភាពគ្នា។

គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ  ក៏បានឯកភាពពន្លឿនការកែសម្រួលបែបបទបច្ចេកទេស (TOR) ឆ្នាំ២០០៣ ទាក់ទងនឹងការផលិតផែនទីអ័រតូហ្វូតូ (ចំណុចទី ៤ ជំហានទី ២ នៃ TOR ឆ្នាំ ២០០៣) ដោយប្រើប្រាស់បច្ចេកវិទ្យាថ្មី ដូចជា LIDAR (Light Detection and Ranging) ដើម្បីពន្លឿនការងារវាស់វែង និងខណ្ឌសីមាព្រំដែន៕