អ្នកសិល្បៈ ស្លុតចិត្តនឹងដំណឹងមរណភាពតារាប្រុសឆ្នើម អ៊ុន សិទ្ធា ខណៈសូម្បីអ្នកស្និតស្នាល ក៏មិនដឹងដំណឹងសម្រាកពេទ្យ ៥ថ្ងៃដែរ

ទាំងសាធារណជន និងអ្នកសិល្បៈ បានសម្តែងការស្លុតចិត្តជាពន់ពេកចំពោះដំណឹងមរណភាពតារាសម្តែងប្រុសឆ្នើម អ៊ុន សិទ្ធា នៅល្ងាចថ្ងៃទី១៩ ខែវិច្ឆិកានេះ ហើយបានបង្ហោះសារព្រោងព្រាត ដោយសោកស្តាយចំបោះការបាត់បង់អ្នកមានទេពកោសល្យ និងមិត្តសិល្បៈដ៏ល្អមួយរូបទៅដោយភ្លាមៗពេក។ ខណៈបើតាមអ្នកស្រី ចន ច័ន្ទលក្ខិណា លោក​ទទួលមរណភាពដោយសារជំងឺដំបៅក្រពះ ពោះវៀនធ្ងន់ធ្ងរ និងមានទឹកដក់ក្នុងពោះ។

មរណភាពរបស់លោក អ៊ុន សិទ្ធា មិនមែនត្រឹមតែដំណឹងដ៏សោកសៅសម្រាប់អ្នករួមអាជីព និងក្រុមគ្រួសារប៉ុណ្ណោះទេ សូម្បីតែសាធារណជនដែលជាអ្នកគាំទ្រតារាប្រុសឆ្នើមរូបនេះ ក៏បង្ហាញក្តីសោកសង្រែងជាពន់ពេកផងដែរ ខណៈដែលពុំធ្លាប់លេចឭដំណឹងស្ថានភាពសុខភាពណាមួយរបស់លោកសោះ តែសុខៗស្រាប់តែបានទទួលដំណឹងស្លុតចិត្តភ្លាមៗនេះទៅវិញ។

សូម្បីតែមិត្តសិ្នតស្នាលនឹងតារាប្រុសឆ្នើមរូបនេះ គឺលោក សឿន វីតា ក៏ពុំបានទទួលដំណឹងថាមិត្តខ្លួនធ្លាក់ខ្លួនឈឺរហូតដេកស្លាប់លើគ្រែពេទ្យនោះដែរ។ បើតាមសំណេររៀបរាប់របស់លោក សឿន វីតា បញ្ជាក់ថា លោក អ៊ុន សិទ្ធា ចូលសង្គ្រោះបន្ទាន់ និងសម្រាកពេទ្យ ៥ថ្ងៃ តែបែរជាលាក់បាំងមិនប្រាប់មិត្តសោះឡើយ។

ទន្ទឹមនឹងដំណឹងដ៏សោកសៅនេះ សមាគមសិល្បករខ្មែរក៏បានចេញសាររំលែកទុក្ខផងដែរ ដោយរៀបរាប់ថា តាងនាមថ្នាក់ដឹកនាំ​ ក្រុមការងារ​ សមាជិក​ សមាជិកាទាំងអស់​ នៃសមាគមសិល្បករខ្មែរ​ យេីងខ្ញុំទាំងអស់គ្នា​ ពិតជាមានសេចក្ដីរន្ធត់​ តក់ស្លុត​ប្រកបដោយក្ដីក្រៀមក្រំជាទីបំផុត​ ដោយទទួលដំណឹងថា​ តារាសម្ដែងលោក​ អ៊ុន​ សិទ្ធា​ បានទទួលមរណភាពដោយរោគាពាធនៅល្ងាចថ្ងៃពុធ​ ទី១៩​ ខែវិច្ឆិកា​ ឆ្នាំ២០២៥​ នេះ។

ក្នុងបរិយាកាសប្រកបដោយក្ដីអាឡោះអាល័យនេះ សមាគមសិល្បករខ្មែរ ចូលរួមសម្ដែងនូវសមានទុក្ខប្រកបដោយភាពសោកស្ដាយជាពន់ពេកចំពោះការបាត់បង់លោក​ អ៊ុន​ សិទ្ធា​ ដែលជាតារាសម្ដែងដ៏ឆ្នេីមមួយរូប និងចាត់ទុកជាការបាត់បង់នូវសាច់ញាតិប្រកបដោយកតញ្ញូតាធម៌ ដែលតាំងពីដើមរៀងមកទល់ពេលលាចាក លោកបានលះបង់គ្រប់បែបយ៉ាងក្នុងបុព្វហេតុគ្រួសារ។

សមាគមសិល្បករខ្មែរ ក៏សូមអំពាវនាវដល់បងប្អូនសិល្បករ សិល្បការិនី ទាំងអស់ដែលមាននូវការរាប់អាន ព្រមទាំងញាតិមិត្តជិតឆ្ងាយ មេត្តាអញ្ជើញចូលរួមបុណ្យឈាបនកិច្ចសពលោក​ អ៊ុន​ សិទ្ធា​ ឱ្យបានច្រេីនកុះករសក្ដិសមនឹងកិត្តិនាមល្បីល្បាញរបស់លោកដែលបានបម្រេីអារម្មណ៍មហាជនជាច្រេីនឆ្នាំកន្លងមកនេះ។

គួររំលឹកថា តារាសម្តែងសាច់ដុំកង់ៗលោក អ៊ុន សិទ្ធា បាន​ប្រឡូក​ក្នុង​វវិស័យសិល្បៈ​តាម​រយៈ​ដើរ​ម៉ូត សម្ដែង​រឿង និង​ធ្វើ​ជា​ពិធី​ករ​តាម​កម្មវិធី​ផ្សេង​ៗតាំង​ពី​ឆ្នាំ​២០០៦ ដែលគិតមកដល់ពេលនេះ មានរយ:ពេលប្រមាណជិត ២០ឆ្នាំហើយ។

តាមរយ:សមត្ថភាពនិងទេពកោសល្យសម្តែងជាច្រើនកន្លងមក លោក អ៊ុន សិទ្ធា ត្រូវបានអ្នកគាំទ្រចាត់ទុកថា លោកគឺជាតារាប្រុសដែលមានភាពលេចធ្លោកលើការសម្តែង ទោះបីជាមួយរយ:ពេលចុងក្រោយ ហាក់ស្ងប់ស្ងាត់ ពោលគឺចាប់តាំងពីអ្នកម្តាយនិងលោកឪពុកចេញឋានទៅ៕