វីរកងទព័ជួរមុខទិសខេត្តព្រះវិហារម្នាក់ ជូនប្រពន្ធកូនខ្ចីមកដល់ខេត្តក្រចេះ រួច​ត្រឡប់​ទៅ​បំពេញកាតព្វកិច្ចការពារ​ជាតិ​វិញ

លោក ផាន ភាព ដែលជាវីរកងទ័ពជួរមុខទិសខេត្តព្រះវិហារ បានសុំច្បាប់មេដើម្បីជូនប្រពន្ធកូនសរសៃខ្ចី មកស្នាក់នៅជាបណ្ដោះអាសន្ន នៅក្នុងស្រុកសំបូរ ខេត្តក្រចេះ ហើយ​នឹងត្រូវវិលត្រឡប់ទៅកាន់សមរភូមិមុខវិញ ដើម្បីបន្តកាតព្វកិច្ចជាយោធា បន្ទាប់ពីជូនប្រពន្ធកូនមកដល់ស្រុកសំបូរប្រកបដោយសុខសុវត្ថិភាពហើយនោះ។

នេះតាមការបញ្ជាក់ឱ្យដឹងពីលោក ផាន ភាព វីរកងទព័ជួរមុខទិសខេត្តព្រះវិហារ នាថ្ងៃទី១០ ខែធ្នូ ឆ្នាំ២០២៥ ក្នុងពេលដែលលោក គង់ មេត្តា អភិបាលស្រុកសំបូរចុះជួបសំណេះសំណាលសួរសុខទុក្ខ និងនាំយកអំណោយជូនគ្រួសារវីរកងទ័ពជួរមុខភៀសសឹកនៅភូមិដូនមាស ឃុំសំបូរ ស្រុកសំបូរ ខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ មេត្តា អភិបាលស្រុកសំបូរបានឲ្យដឹងថា វីរកងទព័ជួរមុខនៅខេត្តព្រះវិហារម្នាក់បានសុំច្បាប់កន្លែងធ្វេីការ ដេីម្បីជូនប្រពន្ធកូនសរសៃខ្ចី រួមនឹង​សមាជិកគ្រួសារសរុប ៧ នាក់ មកស្នាក់នៅជាបណ្ដោះអាសន្ននៅស្រុកសំបូរ រួចនឹងត្រឡប់ទៅខេត្តព្រះវិហារវិញ ដេីម្បីបំពេញភារកិច្ចជាកងទ័ព។

អំណោយដែរទទួលបាន រួមមាន អង្ករ ៣០គ.ក មី១កេះ ទឹកត្រី១យួរ ទឹកស៊ីអុីវ១យួរ ត្រីខ ១យួរ ទឹកបរិសុទ្ធ១០យួរ និងថវិកា ៥០.០០០រៀល៕

អត្ថបទ៖ ប្រុញ វិធិន