អធិការដ្ឋាននគរបាលក្រុងក្រចេះ ចុះផ្សព្វផ្សាយច្បាប់ចរាចរណ៍​ដល់សិស្សានុសិស្ស​តាមគ្រឹះស្ថានសិក្សា

អធិការដ្ឋាននគរបាលក្រុងក្រចេះ ខេត្តក្រចេះ​បានចុះ​ផ្សព្វផ្សាយច្បាប់ស្តីពីចរាចរណ៍ដល់សិស្សានុសិស្សនៅតាមគ្រឹះស្ថានសិក្សា និង​សាលារៀន ដែលកំពុងស្ថិត​នៅក្នុង​វ័យ​ប្រឈម។

លោកវរៈសេនីយ៍ទោ លឹម សៅរ៍វិសាល អធិការរងទទួលផែនសណ្ដាប់ធ្នាប់​បានឲ្យដឹងថា យុទ្ធនាការនេះធ្វើឡើងក្នុង​គោល​បំណងជំរុញការយល់ដឹង និងពញ្ញាក់ស្មារតីដល់សិស្សានុសិស្សទាំងអស់ឲ្យបានជ្រួតជ្រាបកាន់តែច្បាស់ អំពីប​ទ​​ប្បញ្ញត្តិ និងកាតព្វកិច្ចក្នុងការចូលរួមគោរពច្បាប់ចរាចរណ៍ឲ្យបានត្រឹមត្រូវមុនពេល និងអំឡុងពេលធ្វើដំណើរ។

លោកបន្ដថា ខ្លឹមសារសំខាន់ៗនៃការផ្សព្វផ្សាយរួមមានការណែនាំអំពី ការពាក់មួកសុវត្ថិភាពឱ្យបានត្រឹមត្រូវទាំងអ្នកបើក​បរ និងអ្នករួមដំណើរ សម្រាប់យានយន្តគ្រប់ប្រភេទជាពិសេសម៉ូតូ។ ការពន្យល់អំពីសញ្ញាចរាចរណ៍ផ្សេងៗ និងសារៈ​សំខាន់នៃការគោរពតាមសញ្ញាទាំងនោះ។ ការណែនាំឲ្យចេះប្រើប្រាស់ផ្លូវប្រកបដោយការប្រុងប្រយ័ត្ន និងការយោគយល់អធ្យាស្រ័យគ្នាទៅវិញទៅមក។ ការលើកឡើងអំពីហានិភ័យនៃគ្រោះថ្នាក់ចរាចរណ៍ និងផលប៉ះពាល់ដល់ខ្លួនឯង គ្រួសារ និងសង្គមជាតិ។

ការណែនាំឲ្យចៀសវាងពីការបើកបរក្នុងល្បឿនលឿន និងការបើកបរពេលមានជាតិអាល់កុលនៅក្នុងខ្លួន និងផ្សព្វផ្សាយអំពីគ្រោះថ្នាក់និងគុណវិបត្តិ ដែលបណ្តាលមកពីសារធាតុញៀនផងដែរ៕

អត្ថបទ៖ ប្រុញ វិធិន