កម្ពុជាបន្តអះអាងពីការឈរជើងដ៏រឹងមាំរបស់កងកម្លាំងខ្លួន ក្នុងពេលថៃវាយប្រហារកាន់តែខ្លាំង

អ្នកនាំពាក្យក្រសួងការពារជាតិ អះអាងថា កងកម្លាំងប្រដាប់អាវុធរបស់កម្ពុជានៅតែបន្តឈរជើងដ៏រឹងមាំការពារទឹកដី ដោយមិនចុះញ៉មនឹងការគំរាមកំហែងពីកម្លាំងឈ្លានពាននោះឡើយ បើទោះកម្លាំងយោធាថៃបន្តបើកការវាយប្រហារកាន់តែខ្លាំងក្លាជាង១០ថ្ងៃមកនេះក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមអ្នកនាំពាក្យក្រសួងការពារជាតិ លោកស្រី ម៉ាលី សុជាតា ក្នុងសកម្មភាពវាយប្រហាររបស់យោធាថៃមកលើកម្ពុជា គឺថៃបានប្រើសព្វាវុធធុនធ្ងន់ ដែលមានសមត្ថភាពបំផ្លាញខ្ពស់គ្រប់ប្រភេទ មានទាំងយន្តហោះចម្បាំង F-16 បាញ់រ៉ុកែត DTI-2 ដ្រូនទម្លាក់គ្រាប់បែក គ្រាប់បែកចង្កោម ផ្សែងពុល និងដាក់ពង្រាយទាហានដ៏ច្រើនលើសលុប ដើម្បីទន្ទ្រានយកទឹកដីកម្ពុជា។ រហូតដល់ថ្ងៃទី១៨ ខែធ្នូនេះ យោធាថៃនៅតែបន្តបាញ់ផ្លោង និងទម្លាក់គ្រាប់បែកកាន់តែខ្លាំងក្លាមកលើកម្ពុជា។

ចំពោះមុខការគំរាមកំហែងដោយប្រដាប់អាវុធនេះ លោកស្រី ម៉ាលី សុជាតា បាននិយាយនៅព្រឹកថ្ងៃព្រហស្បតិ៍នេះ ថា កងទ័ពនិងនគរបាលកម្ពុជាបាននិងកំពុងបន្តឈរជើងយ៉ាងរឹងមាំ ស្វាហាប់ មោះមុត និងតែតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាននៅគ្រប់សមរភូមិ ដែលការតបតរបស់កម្ពុជា លោកស្រីថា ជាការអនុវត្តសិទ្ធិស្វ័យការពារខ្លួន ដូចមានចែងក្នុងច្បាប់អន្តរជាតិ ដើម្បីការពារបូរណភាពទឹកដី និងប្រជាជន។  

អ្នកនាំពាក្យខាងលើ បានផ្ញើសារជាថ្មីម្ដងទៀតទៅកាន់ប្រជាពលរដ្ឋកម្ពុជាទាំងអស់បន្តជឿជាក់ និងលើកទឹកចិត្តដល់កងកម្លាំងកម្ពុជា ដែលកំពុងប្រយុទ្ធតស៊ូយ៉ាងខ្លាំងក្លានៅគ្រប់សមរភូមិ ដោយលោកស្រី និយាយថា រាជរដ្ឋាភិបាល កងទ័ព និងប្រជាជនកម្ពុជា រួមគ្នាជាធ្លុងមួយក្នុងកិច្ចការពារទឹកដី និងអធិបតេយ្យជាតិ ទោះក្នុងតម្លៃណាក៏ដោយ។

ប៉ុន្តែយ៉ាងណា ដោយផ្ដល់តម្លៃលើសន្តិភាព កម្ពុជាក៏ទទូចឱ្យថៃបញ្ឈប់រាល់អរិភាពជាបន្ទាន់ ដោយដកកម្លាំងចេញពីដែនអធិបតេយ្យកម្ពុជា ហើយងាកមកអនុវត្តនូវបទឈប់បាញ់ឡើងវិញ និងប្រកាន់យកនូវការដោះស្រាយជម្លោះដោយសន្តិវិធី ផ្អែកលើច្បាប់អន្តរជាតិ៕

អត្ថបទ៖ ធឿន វ៉ាន់សុង