រដ្ឋបាលស្រុកបាណន់ សម្រេចបិទសាលារៀនក្រោយ​​​ទាហានថៃទម្លាក់គ្រាប់​ចូលទីតាំងជនស៊ីវិល

អាជ្ញាធរស្រុកបាណន់ខេត្តបាត់ដំបងសម្រេចបិទសាលារៀនបណ្តោះអាសន្ន ក្រោយពីទាហានថៃប្រើយន្តហោះទម្លាក់​ចំនួន ៤ គ្រាប់ចូលទីតាំងប្រជាពលរដ្ឋរស់នៅ។

លោក ស្រេង សុខា អភិបាលស្រុកបាណន់បានឲ្យដឹងថា រដ្ឋបាលស្រុកបានសម្រេចបិទភ្លាមៗនូវសាលារៀន ក្រោយពីទាហានថៃបានប្រើយន្តហោះទម្លាក់គ្រាប់ចូលទីតាំងជនស៊ីវិល រស់នៅក្នុងភូមិសាស្តស្រុកបាណន់នាម៉ោងប្រមាណ ១០ ព្រឹកថ្ងៃទី ២៤ ខែធ្នូឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមានហេតុការណ៍យន្តហោះថៃបានទម្លាក់គ្រាប់យ៉ាងច្រើនគ្រាប់ បង្កការភ័យខ្លាចដល់ប្រជាពលរដ្ឋនិងសិស្សានុសិស្សដែលកំពុងរៀនសូត្រ នាថ្ងៃទី ២៤ ខែធ្នូម្សិលមិញ មន្ទីរអប់រំខេត្តបានអនុវត្តភ្លាមៗតាមសេចក្តីណែនាំពីក្រសួងអប់រំយុវជននិងកីឡា បានបិទសាលារៀនជាបណ្តោះអាសន្ននៅក្នុងតំបន់ដែលបានប្រឈមមួយចំនួន។

តាមការណែនាំពីមន្ទីរអប់រំខេត្ត បានជូនដំណឹងដល់​លោកគ្រូ​ អ្នក​គ្រូ សិស្សានុសិស្ស​ មាតាបិតាសិស្ស​ថា នៅក្នុងស្រុកបាណន់​នៃខេត្តបាត់ដំបង សូមផ្អាកការបង្រៀន​ និងរៀន​ ជាបណ្តោះអាសន្ន​ ចាប់ពីថ្ងៃទី​២៤ ខែធ្នូ ឆ្នាំ២០២៥ នេះរហូត​ដល់មានការជូនដំណឹងឡេីងវិញ​។

ជាមួយគ្នានេះសាលារៀននៅក្នុងក្រុងក៏ត្រូវបានផ្អាកការសិក្សាផងដែរ ដើម្បីការពារសុវត្ថិភាពដល់សិស្សានុសិស្ស​ ខណះដែលយន្តហោះថៃ ក្រោយទម្លាប់គ្រាប់ក្នុងស្រុកបាណន់ មួយសន្ទុះក្រោយមកក៏បានហោះឆ្វែលលើក្រុងបាត់ដំបងបង្កការភ័យខ្លាចដល់ប្រជាពលរដ្ឋ ខណះប្រជាពលរដ្ឋនៅក្បែរព្រលានយន្តហោះមួយចំនួនបានភៀសខ្លួនដើម្បីសុវត្ថិភាព៕

អត្ថបទ៖ សៅ សារិទ្ធ