កីឡា

លីគកំពូលកម្ពុជា កាន់តែប្រកៀកប្រកិតគ្នារវាងក្រុមខ្លាំងៗ

បានផុស

៤ ខែ មុន

នៅ

ថ្ងៃចន្ទ ២៩ ធ្នូ ២០២៥

ដោយ

ការប្រកួតលីគបាល់ទាត់កំពូលកម្ពុជា កាន់តែប្រកៀកប្រកិតគ្នាខ្លាំងឡើង បន្ទាប់ពីចប់សប្តាហ៍ទី១៣ ដោយក្រុមខ្លាំងៗសុទ្ធតែបង្ហាញភាពរឹងមាំដូចគ្នាដើម្បីប្រជែងជើងឯកនៅក្នុងរដូវកាលនេះ។

ព្រះខ័នរាជស្វាយរៀង នៅតែបន្តឈរលើកំពូលតារាង ដោយមាន ៣៣ ពិន្ទុ បើទោះជាបានចាញ់ បឹងកេត ដោយលទ្ធផល ១-២ នៅពហុកីឡដ្ឋានជាតិអូឡាំពិក កាលពីថ្ងៃសៅរ៍ ទី២៦ ខែធ្នូ ឆ្នាំ ២០២៥។ ពួកគេបាននាំមុខតែ ៣ ពិន្ទុប៉ុណ្ណោះ លើគ្រូប្រជែង ភ្នំពេញក្រោន ដែលមាន ៣០ ពិន្ទុ ប៉ុន្តែ ភ្នំពេញក្រោន ទើបឆ្លងកាត់ ១២ ប្រកួត ដោយឈ្នះ ៩ និងស្មើ ៣។ ដូច្នេះប្រសិនបើការប្រកួតសប្តាហ៍ទី១៣ ពួកគេឈ្នះគឺមានពិន្ទុស្មើគ្នាទៅហើយ។

បឹងកេត បានធ្វើឲ្យមានការភ្ញាក់ផ្អើលខ្លាំងមែនទែនសម្រាប់ ២ ប្រកួតចុងក្រោយ។ ពួកគេបានចាញ់ ភ្នំពេញក្រោន ដោយលទ្ធផល ០-១ កាលពីសប្តាហ៍ទី១២ ដោយសារកីឡាករបរទេសថ្មីទើបតែចូលរួមជាមួយក្រុម។ បន្ទាប់មកនៅសប្តាហ៍ទី១៣ ពួកគេបង្ហាញភាពខ្លាំងគួរឲ្យចាប់អារម្មណ៍ដោយបានយកឈ្នះ ព្រះខ័នរាជស្វាយរៀង ២-១ ដើម្បីមាន ២២ ពិន្ទុ ឈរលេខ ៤ ក្នុងតារាង។

បឹងកេត និង ភ្នំពេញក្រោន បានជួបគ្នាទាំងពីរជើងរួចរាល់ដោយជើងទី១ស្មើគ្នា ០-០ ហើយជើងទី២ ភ្នំពេញក្រោន ឈ្នះ ១-០។ បឹងកេត និង ព្រះខ័នរាជស្វាយរៀង ក៏បានបញ្ចប់ទាំងពីរជើងដែរគឺជើងទី១ ព្រះខ័នរាជស្វាយរៀង ឈ្នះ ៣-០ ខណៈជើងទី២ បឹងកេត ឈ្នះ ២-១។ អ្វីដែលគួរឲ្យសំគាល់ បឹងកេត បានបញ្ចប់ភាពមិនដែលឈ្នះ ១០ ប្រកួតជាប់គ្នាជាមួយព្រះខ័នរាជស្វាយរៀង។

គូដែលគួរឲ្យអារម្មណ៍សម្រាប់ជើងទី២គឺ រវាង ភ្នំពេញក្រោន និង ព្រះខ័នរាជស្វាយរៀង នៅថ្ងៃអាទិត្យ ទី១៨ ខែមករា ឆ្នាំ ២០២៦ នៅកីឡដ្ឋានភ្នំពេញក្រោន។ កាលពីជើងទី១ ភ្នំពេញក្រោន បានឈ្នះ ព្រះខ័នរាជស្វាយរៀង ដោយលទ្ធផល ៣-២ នៅពហុកីឡដ្ឋានជាតិមរតកតេជោ។

ដូច្នេះការជួបគ្នានៅជើងទី២ នឹងក្លាយជាការប្រកួតមួយដ៏សំខាន់បំផុតដើម្បីប្រជែងគ្នានៅលើកំពូលតារាង មុនពេលក្រុមទាំងពីរត្រូវជួបគ្នា ២ ប្រកួតទៀតក្នុងពានរង្វាន់អន្តរជាតិ AFC Challenge League មុនពេលឈានចូលជុំទី៣នៃលីគកំពូលកម្ពុជា គឺ វគ្គ ៦ក្រុមលំដាប់កំពូលចុងក្រោយដែលត្រូវប្រកួតគ្នា ២ ជើងទៀត។

ជារួមការប្រកួតឈានចូលសប្តាហ៍ទី១៣ នៃជើងទី២ លីគកំពូលកម្ពុជា គឺក្រុមលំដាប់កំពូលទាំង ៤ គឺសុទ្ធតែមានឱកាសឈ្នះជើងឯកដូចគ្នា ខណៈក្រុមនីមួយៗសុទ្ធតែបានបង្ហាញភាពខ្លាំងរបស់ខ្លួនរួចទៅហើយ៕