កីឡា

ព្រះខ័នរាជស្វាយរៀង ចារប្រវត្តិសាស្ត្រថ្មីជាក្លិបទី ១ ឈ្នះជើងឯកលីគ ៣ លើកជាប់គ្នា

បានផុស

២ សប្តាហ៍ មុន

នៅ

ថ្ងៃចន្ទ ១៣ មេសា ២០២៦

ដោយ

ក្លិបបាល់ទាត់ព្រះខ័នរាជស្វាយរៀង បានបង្កើតកំណត់ត្រាថ្មីមួយក្នុងប្រវត្តិសាស្ត្រលីគបាល់ទាត់កំពូលកម្ពុជា ដែលបានក្លាយជាក្លិបកម្ពុជាទី១ ក្នុងការឈ្នះជើងឯកលីគបាល់ទាត់កំពូលកម្ពុជា ៣ រដូវកាលជាប់គ្នា។

ក្រោយនាំមុខពិន្ទុដាច់លើក្រុមចំណាត់ថ្នាក់លេខ ២ ព្រះខ័នរាជស្វាយរៀង បានក្លាយជាម្ចាស់ជើងឯកលីគកំពូលកម្ពុជា រដូវកាល ២០២៥-២៦ ដោយស្វ័យប្រវត្តិហើយ បើទោះបីជានៅសល់ ៤ ប្រកួតទៀត។ ពួកគេរកបាន ៦៥ ពិន្ទុ ពីការឈ្នះ ២១ លើក ស្មើ ២ លើក និងចាញ់ ៣ លើក ដែលនាំ មុខក្រុមភ្នំពេញក្រោន រហូតដល់ ១៥ ពិន្ទុ។

នេះជាការឈ្នះជើងឯកលីគកំពូលកម្ពុជា លើកទី៣ ក្នុងរយៈពេល ៣ រដូវកាលចុងក្រោយ បន្ទាប់ពីឈ្នះជើងឯករដូវកាល ២០២៣-២៤ និង រដូវកាល ២០២៤-២៥។ សម្រាប់ការឈ្នះជើងឯក ៣ លើកជាប់គ្នានេះគឺស្ថិតក្រោមការដឹកនាំរបស់គ្រូបង្វឹកលោក Pep Monuz ២ លើក និងលោកគ្រូ McConkey ១ លើក។

នៅក្នុងប្រវត្តិសាស្ត្រលីគបាល់ទាត់កំពូលកម្ពុជាមិនទាន់មានក្លិបណាបានឈ្នះជើងឯកលីគកម្ពុជា ៣ រដូវកាលទេ គឺមានតែ ២ លើកជាប់គ្នាប៉ុណ្ណោះ។ រហូតដល់ពេលនេះ ព្រះខ័នរាជស្វាយរៀង បានឈ្នះជើងឯកលីគកំពូលកម្ពុជាចំនួន ៥ លើកហើយគឺឆ្នាំ ២០១៣, ២០១៩, ២០២៣-២៤, ២០២៤-២៥ និង ២០២៥-២៦ ដែលស្ថិតនៅចំណាត់ថ្នាក់លេខ ២ បន្ទាប់ពីភ្នំពេញក្រោន បានឈ្នះ ៨ លើក ជាក្លិបដែលបានឈ្នះជើងឯកលីគកំពូលកម្ពុជាច្រើនជាងគេបំផុត។