អភិបាលរាជធានី និងលោកស្រី រួមនឹងមន្ត្រីរាប់​សិប​នាក់វេចខ្ចប់អំបុក ដើម្បីនាំយកទៅ​បែង​ចែក​ជូនដល់វីរកងទ័ពជួរមុខ

លោក ឃួង ស្រេង អភិបាលរាជធានីភ្នំពេញ និងលោកស្រី រួមនឹងមន្ត្រីរដ្ឋបាលរាជធានីភ្នំពេញរាប់សិបនាក់នៅរសៀលថ្ងៃទី២៨ ខែធ្នូ ឆ្នាំ២០២៥ បានអញ្ជើញវេចខ្ចប់អំបុក នៅក្នុងសាលារាជធានីភ្នំពេញ ដើម្បីនាំយកទៅបែងចែកជូនដល់វីរកងទ័ពជួរមុខ និងពលរដ្ឋជាជនភៀសសឹក។

អំបុកជាច្រើនបាវបានបញ្ឈរង់ចាំការវេចខ្ចប់ ដោយច្រកជាថង់តូចៗ ដើម្បីងាយស្រួលយកទៅបែងចែកជូនវីរកងទ័ពជួរមុខ។ លោក ឃួង ស្រេង និងលោកស្រីរួមនឹងមន្ត្រីរដ្ឋបាលរាជធានីភ្នំពេញបានបំពេញការងារមនុស្សធម៌នេះយ៉ាងញាប់ដៃញាប់ជើងដែលបានបង្ហាញឱ្យឃើញពីសាមគ្គីភាព ជាធ្លុងមួយខ្មែរស្រលាញ់ខ្មែរ។

នៅថ្ងៃទី២៨ ខែធ្នូ ឆ្នាំ២០២៥ រដ្ឋបាលខណ្ឌ និងសប្បុរសជននានា ក៏នៅបានបន្តនាំយកអំណោយសប្បុរសធម៌ មកប្រគល់ជូនរដ្ឋបាលរាជធានីភ្នំពេញផងដែរ ដើម្បីដឹកជញ្ជូនយកទៅបែងចែក ជូនទៅដល់វីរកងទ័ពជួរមុខ និងពលរដ្ឋជាជនភៀសសឹក ដោយលោកអភិបាលរងរាជធានីភ្នំពេញជាច្រើនរូប តំណាងលោក ឃួង ស្រេង បានអញ្ជើញទទួលអំណោយនេះ។ សប្បុរសជនដែលនាំយកអំណោយមកប្រគល់ជូននៅថ្ងៃទី២៨ធ្នូនេះរួមមាន៖ រដ្ឋបាលខណ្ឌសែន សុខ, រដ្ឋបាលខណ្ឌ៧មករា, រដ្ឋបាលខណ្ឌដង្កោ និងសប្បុរសជន។

ក្នុងនាម អភិបាលរាជធានី អភិបាលរង បានថ្លែងនូវការអរគុណយ៉ាងជ្រាលជ្រៅបំផុតចំពោះ រដ្ឋបាលខណ្ឌសែន សុខ, រដ្ឋបាលខណ្ឌ៧មករា, រដ្ឋបាលខណ្ឌដង្កោនិងសប្បុរសជនដែលបានចូលរួម ចែករំលែកនូវ ធនធានរបស់ខ្លួន ដើម្បីឧបត្ថម្ភដល់វីរៈកងទ័ពជួរមុខ និងជនភៀសសឹក។ សកម្មភាពនេះពិតជាបានបង្ហាញឱ្យឃើញពីទឹកចិត្តសប្បុរសធម៌របស់បងប្អូន ប្រជាពលរដ្ឋក្នុងរាជធានីភ្នំពេញក្នុងការសាមគ្គីភាព ជាធ្លុងមួយខ្មែរស្រលាញ់ខ្មែរ ។

សូមបញ្ជាក់ថា អាជ្ញាធររាជធានីភ្នំពេញនៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ៕

អត្ថបទ៖ ស្រីរ័ត្ន