វៀតណាម៖ ក្រុងហាណូយដាក់កាមេរ៉ា AI ដើម្បីចាប់អ្នកបោះចោលសំរាម និងរំលោភចំណីផ្លូវ

នាយកដ្ឋានប៉ូលិសក្រុងហាណូយ នៃប្រទេសវៀតណាម បានដាក់ឱ្យដំណើរការ «ប្រព័ន្ធកាមេរ៉ាអនុវត្តច្បាប់ពីចម្ងាយ» ដើរដោយ​បញ្ញាសិប្បនិម្មិត (AI) ដើម្បីពិន័យ ឬដាក់ទោសទណ្ឌអ្នករំលោភសណ្តាប់ធ្នាប់ទីក្រុង និង​បរិស្ថាន រួមទាំងអ្នកបោះចោលសំរាម និងរំលោភចំណីផ្លូវ។ នេះបើតាមការចុះផ្សាយរបស់កាសែត VnExpress កាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើម ដែលដាក់ឱ្យដំណើរការកាលពីថ្ងៃពុធសប្តាហ៍មុននេះ ​មានគោលបំណងពង្រឹងការគ្រប់គ្រងទីក្រុង ទប់ស្កាត់បទល្មើសដដែលៗ និងបង្កើនសោភ័ណភាពទូទៅនៃរដ្ឋធានីហាណូយ ដោយតាមដានកន្លែងសាធារណៈ ២៤ ម៉ោង/ថ្ងៃ។

នាយកដ្ឋានប៉ូលិសក្រុងបាន​ឱ្យដឹងថា ប្រព័ន្ធកាមេរ៉ា AI ត្រូវបានរចនាឡើងដើម្បី​ចាប់យក​ និងកត់ត្រាដោយស្វ័យប្រវត្តិនូវបទល្មើសជាច្រើនប្រភេទ។ ទាំងនេះរួមមានការរំលោភលើចិញ្ចើមផ្លូវ និងផ្លូវថ្នល់ ការ​លក់ដូរ/ដាក់បង្ហាញទំនិញដោយ​ខុសច្បាប់ ផ្លាកសញ្ញាផ្សាយពាណិជ្ជកម្ម ឬសំយ៉ាបផ្ទះដោយគ្មានការអនុញ្ញាត និងការចតយានយន្តខុសច្បាប់។

លើសពីនេះ ប្រព័ន្ធនេះក៏ផ្តោតលើបញ្ហាអនាម័យបរិស្ថានផងដែរ ដូចជាការចោលសំរាម ការនោម/បន្ទោរបង់ និងការបញ្ចេញទឹកសំណល់មិនត្រឹមត្រូវនៅតាមផ្លូវ ឬចំណីផ្លូវ។ រូបភាពនៃការរំលោភបំពានទាំងនេះ ​នឹងត្រូវបញ្ជូនទៅមជ្ឈមណ្ឌលព័ត៌មានបញ្ជាការដ្ឋានប៉ូលិសទីក្រុងហាណូយ ហើយបន្ទាប់មក មជ្ឈមណ្ឌលនឹង​ផ្ញើទៅកាន់អង្គភាពប៉ូលិស​មូលដ្ឋាន សម្រាប់ការផ្ទៀងផ្ទាត់ និង​ចាត់វិធានការរហ័ស៕

​​