កម្ពុជាបន្តប្រាប់ថៃកុំឱ្យប្រើកម្លាំងប្រដាប់អាវុធ ដើម្បីកែប្រែខ្សែបន្ទាត់ព្រំដែន

ជាថ្មីម្ដងទៀត ក្រោយបទឈប់បាញ់ កម្ពុជា តាមរយៈក្រសួងការបរទេស បានចេញសេចក្ដីថ្លែងការណ៍បង្ហាញការប្រឆាំងនឹងសកម្មភាពរបស់កងកម្លាំងប្រដាប់អាវុធថៃ ដែលកំពុងធ្វើនៅក្នុងតំបន់ដែលបានកាន់កាប់លើទឹកដីរបស់កម្ពុជា។សកម្មភាពរបស់កងកម្លាំងថៃ បានរំលោភយ៉ាងធ្ងន់ធ្ងរដល់អធិបតេយ្យ និងបូរណភាពទឹកដីរបស់កម្ពុជា។

សកម្មភាពទាំងនោះ គឺរួមមានការតម្កល់រូបសំណាកព្រះពុទ្ធបដិមានៅលើទីតាំងរូបសំណាកបដិមាព្រះវិស្ណុ ដែលត្រូវបានបំផ្លាញដោយមន្ត្រីយោធាថៃ នៅតំបន់អានសេះ ក្នុងខេត្តព្រះវិហារ ការដាក់រាយកុងតឺន័រដើម្បីរាំងផ្លូវ នៅតំបន់បឹងត្រកួន ជាមួយនឹងការសាងសង់លេណដ្ឋានដោយប្រើប្រាស់គ្រឿងចក្រធុនធ្ងន់ នៅតំបន់បឹងត្រកួន ខេត្តបន្ទាយមានជ័យ។

ក្រសួងការបរទេសកម្ពុជា ចាត់ទុកសកម្មភាពរបស់កងកម្លាំងប្រដាប់អាវុធថៃពេលនេះ ថា កំពុងធ្វើផ្ទុយទៅនឹងវិធានការកាត់បន្ថយភាពតានតឹង ដែលបានឯកភាពគ្នារវាងកម្ពុជា និងថៃ ក្នុងកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) កាលពីថ្ងៃទី២៧ ខែធ្នូ ឆ្នាំ២០២៥។

ក្នុងន័យនេះ កម្ពុជាបានអំពាវនាវឱ្យប្រទេសថៃអនុវត្តឱ្យបានពេញលេញ និងស្មោះត្រង់នូវការព្រមព្រៀងគ្នានៅក្នុងកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ និងកិច្ចព្រមព្រៀងពាក់ព័ន្ធផ្សេងទៀត ដើម្បីកាត់បន្ថយភាពតានតឹង កសាងទំនុកចិត្ត និងការជឿជាក់ ព្រមទាំងស្តារសន្តិភាពរវាងប្រទេសទាំងពីរឡើងវិញ។

កម្ពុជា ក៏បញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួនរបស់ខ្លួនក្នុងការដោះស្រាយបញ្ហាព្រំដែនជាមួយប្រទេសថៃ ដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់ ហើយប្រកាន់ខ្ជាប់នូវគោលការណ៍ថា ព្រំដែនមិនត្រូវបានកែប្រែដោយប្រើកម្លាំងឡើយ៕