ប្រជានេសាទ រីករាយនឹងការនេសាទត្រី នៅក្នុងតំបន់អាងភាស ដែលសម្បូរទៅដោយត្រីរៀល និងត្រីខ្នងវែង

រយៈពេលប្រមាណជិត ១០ថ្ងៃហើយ ដែលនៅក្នុងតំបន់អាងភាស សម្បូរដោយត្រីតូចៗ ដែលជាប្រភេទត្រីរៀល និងត្រីខ្នងវែង ហើយក្នុងរយៈពេលនេះមានប្រជាពលរដ្ឋជាច្រើនខ្លះបើករថយន្ត ខ្លះជិះម៉ូតូ ដោយដាក់សំណាញ់ទៅនេសាទយ៉ាងសប្បាយរីករាយនៅក្នុងតំបន់នោះ។

ដៃកំពុងចាប់សំណាញ់នៅលើទំនប់អាងភាស ស្ថិតក្នុងភូមិគោកដូង ឃុំពាមឯក ស្រុកឯកភ្នំ ខេត្តបាត់ដំបង លោក សាន ផល្លី បាននៅរៀបរាប់ថា ជិត ១០ថ្ងៃហើយ បើគិតមកទល់នឹងថ្ងៃទី២២ ខែមករា ឆ្នាំ២០២៦ នេះ គឺនៅតាមបឹងបួរ និងប្រឡាយ ក្នុងតំបន់អាងភាស គឺមានត្រីឡើងច្រើនដែលធ្វើឱ្យពួកគាត់មានអារម្មណ៍សប្បាយក្នុងការនេសាទ។

លោកបានបន្តថា ទោះបីជាមានកម្ដៅក្តៅខ្លាំងពីព្រះអាទិត្យក៏ដោយ ក៏ការនេសាទត្រីបានធ្វើឱ្យរូបលោកភ្លេចអស់នូវភាពនឿយហត់ ព្រោះការនេសាទធ្វើឱ្យលោកបានយកធ្វើជាម្ហូបអាហារផង ហើយក៏អាចលក់ទៅឱ្យប្រជាពលរដ្ឋដែលនៅក្បែរខាងផង ដើម្បីបានប្រាក់កម្រៃខ្លះទប់ទល់ក្នុងជីវភាពប្រចាំថ្ងៃ។ លោកបញ្ជាក់បន្ថែមថា ការនេសាទបង់សំណាញ់តែកន្លែងដដែលក៏មិនខ្វះកូនត្រីដែរ។

នៅក្នុងទីតាំងតំបន់អាងភាស ដែលប្រជាកសិករកំពុងនេសាទព្រោងព្រាតនោះ គឺពួកគាត់ប្រើសំណាញ់ពីរប្រភេទ ដោយទីមួយគឺប្រើក្រឡា ១,៨ ហ៊ុន ដើម្បីបង់យកត្រីតូចៗ ឯមួយប្រភេទទៀតគឺប្រើក្រឡាធំដោយបង់ត្រៀបយកត្រីផ្ទួក អណ្ដែង ឬត្រីរ៉ស់ដែលជាប្រភេទត្រីធំៗ។

បើក្រឡេកមើលទៅតាមប្រឡាយ និងបឹងដែលស្ថិតនៅកណ្ដាលអាងភាស គឺមានអ្នកនេសាទ មិនក្រោមពី ៧០នាក់ឡើយ ដែលបានដាក់ពង្រាយគ្នាដើម្បីបង់សំណាញ់ចាប់យកត្រី ប្រកបដោយសំឡេងសើចក្អាកក្អាយ និងភាពសប្បាយរីករាយនៅពេលដែលពួកគាត់នេសាទបានត្រីគ្រប់ៗគ្នាបែបនេះ៕

ដោយ៖ សោ និយមរ័ត្ន