ក្រោយឃើញមានអ្នកទៅលេងច្រើន ប្រជានេសាទខេត្តកំពត ងាកមកដឹកភ្ញៀវទេសចរស្ទួចត្រីកម្សាន្ត​ដើម្បីបានប្រាក់ចំណូលបន្ថែម

បន្ទាប់ពីខេត្តកំពតរៀបចំបានស្អាត ទាក់ទាញទេសចរឲ្យមកលេងកម្សាន្ដកាន់តែច្រើននោះ ប្រជានេសាទបាននាំគ្នាងាកមកផ្តោតអារម្មណ៍បង្កើនរបរដឹកភ្ញៀវទេសចរទៅស្ទូចត្រីកម្សាន្តបន្ថែម ដើម្បីបង្កើនប្រាក់ចំណូលបន្ថែមផ្គត់ផ្គង់គ្រួសារ។ បើតាមនប្រជានេសាទ ការដឹកភ្ញៀវទេសចរមួយជើង គិតតម្លៃចន្លោះ១០ ទៅ២០ម៉ឺនរៀល តាមជិតឬឆ្ងាយ ហើយក្នុងមួយខែ ពួកគាត់ម្នាក់ៗ អាចចេញទូកដឹកភ្ញៀវទៅស្ទូចត្រីកម្សាន្ត បានប្រហែល២០ជើងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាន់ តូ ម្ចាស់ទូកដឹកភ្ញៀវទេសចរ និងជាប្រជានេសាទនៅសង្គាត់កោះតូច ក្រុងបូកគោ ខេត្តកំពត បានប្រាប់ឱ្យដឹងថា គាត់បានប្រកបរបរនេសាទជាយូរមកហើយ ប៉ុន្តែរយៈពេលចុងក្រោយនេះ បន្ទាប់ខេត្តកំពតមានការអភិវឌ្ឍន៍រីកចម្រើន ទាក់ទាញទេសចរមកលេងកាន់តែច្រើន រូបលោក និងអ្នកភូមិផ្សេងទៀត បានងាកមកផ្តោកអារម្មណ៍លើរបរដឹកភ្ញៀវទេសចរទៅស្ទូចត្រីកម្សាន្តវិញ ព្រោះវាងាយស្រួលជាងការទៅនេសាទ ពោលឲ្យតែទូកចេញ គឺដឹងតែទទួលបានប្រាក់កម្រៃហើយ។ លោកបន្តថា បច្ចុប្បន្នអ្នកទេសចរកាន់តែច្រើន បានចាប់អារម្មណ៍ និងនាំគ្នាមកជួលទូកជិះទៅស្ទូចត្រីកម្សាន្ត ធ្វើឲ្យលោកអាចរកប្រាក់ចំណូលបន្ថែមបានគួរសម ដើម្បីជួយផ្គត់ផ្គង់ជីវភាពគ្រួសារ បន្ថែមពីលើរបរនេសាទ។

ចំណែកភ្ញៀវទេសចរបានបង្ហាញអារម្មណ៍សប្បាយរីករាយ ចំពោះដំណើរកម្សាន្តរបស់ពួកគាត់ថា ការស្ទូចត្រីកម្សាន្តជាចំណង់ចំណូលចិត្តរបស់ពួកគាត់ ទោះស្ទូចបានត្រី ឬមិនបានក៏ដោយពួកគាត់នៅតែចង់ស្ទូច ម្យ៉ាងការអង្គុយលើទូក ស្ទូចត្រីកណ្តាលសមុទ្រ ឬក្បែរតំបន់កោះ វាជាទិដ្ឋភាព និងបរិយាកាសពិសេសពិបាកពណ៌នាឲ្យមនុស្សអ្នកដទៃយល់ណាស់។

បើតាមការបញ្ជាក់របស់មន្ត្រីជំនាញថា ភ្ញៀវទេសចរមកលេងខេត្តកំពតដែលមានចំណូលចិត្តស្ទូចត្រី អាចរកកន្លែងស្ទួចត្រីបាននៅតាមដងព្រែក មាត់ឆ្នេរ និងតាមសហគមន៍ ឬអាចស្វែងរកសេវាជួលទូកចជិះទៅស្ទូចត្រីកម្សាន្តនៅគ្រប់​សហគមន៍នេសាទ និងនៅតាមភូមិឋានរបស់ប្រជានេសាទបាន។ ហើយតម្លៃមិនលើសខ្វះគ្នានោះទេ ខណៈដែលការរក្សាសុវត្ថិភាពភ្ញៀវមានការយកចិត្តទុកដាក់ខ្ពស់ ដោយសារមន្ត្រីជំនាញ និងអាជ្ញាធរតែងតែបានចុះផ្សព្វផ្សាយ អប់រំ ណែនាំដល់ប្រជានេសាទឲ្យមានការប្រុងប្រយ័ត្ន និងទទួលខុសត្រូវខ្ពស់បំផុត៕

អត្ថបទ៖ សឹង រ៉ាត់