លោកត្រាំ ​ប្រាប់​ថា​គ្រោងទទួលដំណើរទស្សនកិច្ចរបស់លោកស៊ី នៅចុងឆ្នាំនេះ

លោក​ ដូណាល់ ត្រាំ បានប្រកាស​ថា ប្រធានាធិបតីចិន លោក ស៊ី ជិនពីង ត្រូវបានរំពឹងថានឹង​ទៅ​បំពេញទស្សនកិច្ចនៅសហរដ្ឋអាមេរិកនា​ចុងឆ្នាំ​២០២៦ ដែលនេះជាសញ្ញាសម្គាល់ដ៏សំខាន់នៃអ្វីដែលមេ​ដឹក​នាំ​អាមេរិក​បានពិពណ៌នាថាជាទំនាក់ទំនងទ្វេភាគី «ដ៏ល្អប្រសើរ»។

ក្នុងកិច្ចសន្ទនាជាមួយក្រុមអ្នកសារព័ត៌មាននៅលើយន្តហោះ Air Force One ក្នុងពេលធ្វើដំណើរត្រឡប់មកពីប្រទេសស្វីស​កាល​ពី​ថ្ងៃ​ព្រហស្បតិ៍​ទី​២២​ខែ​មករាឆ្នាំ​២០២៦ លោកប្រធានាធិបតី​អាមេរិក​បានបញ្ជាក់ថា ដំណើរទស្សនកិច្ចនេះទំនងជានឹងធ្វើឡើងស្របពេលជាមួយនឹងកិច្ចប្រជុំកំពូល G20 ដែលលោកនឹងធ្វើជាម្ចាស់ផ្ទះនៅទីក្រុង Miami រដ្ឋផ្លរីដា នាពាក់កណ្តាលខែធ្នូ។ ការប្រកាសនេះ បានធ្វើឡើងបន្ទាប់ពីលោកត្រាំ បានបញ្ជាក់ជាថ្មីអំពីគម្រោងបំពេញទស្សនកិច្ចផ្លូវរដ្ឋរបស់លោកទៅកាន់ប្រទេសចិន នាខែមេសាខាងមុខ។

លោកត្រាំ បានសរសើរលោកប្រធានាធិបតី ស៊ី ជិនពីង ថាជា «បុគ្គលដ៏អស្ចារ្យ» និងបានចាត់ទុកការប្រសើរឡើងនៃទំនាក់ទំនងរវាង​ក្រុងវ៉ាស៊ីនតោន និង​ក្រុង​ប៉េកាំង​ថាជាលទ្ធផលនៃការចាប់ផ្តើមបញ្ជាទិញសណ្តែកសៀងអាមេរិកក្នុងបរិមាណដ៏ច្រើនសន្ធឹកសន្ធាប់ឡើងវិញពីសំណាក់ប្រទេសចិន ដែលលោកកត់សម្គាល់ថាបាននាំមកនូវក្តីរីករាយយ៉ាងខ្លាំងដល់កសិករអាមេរិក។ កាលវិភាគការទូតនេះ បានពង្រឹងស្ថានភាពបច្ចុប្បន្នរវាងមហាអំណាចទាំងពីរ ខណៈដែលពួកគេឈានទៅរកការចូលរួមក្នុងកិច្ចពិភាក្សាកម្រិតខ្ពស់ពេញមួយឆ្នាំខាងមុខ៕

ប្រែសម្រួល៖ ឈាង