សម្តេចធិបតី ហ៊ុន ម៉ាណែត៖ កម្ពុជា​ចូលរួម​ក្រុមប្រឹក្សា​សន្តិភាព អាណត្តិ៣ឆ្នាំ មិនបង់ថវិកាទេ

តាមសារបង្ហោះនៅលើបណ្តាញសង្គមតេឡេក្រាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា កម្ពុជា​បានសម្រេច​ចូលរួម​ជា​សមាជិក​ស្ថាបនិក​នៃ​ក្រុមប្រឹក្សា​សន្តិភាព (The Board of Peace) តាមការអញ្ជើញរបស់ឯកឧត្តមប្រធានាធិបតីសហរដ្ឋអាមេរិក Donald J. Trump កាលពីថ្ងៃទី១៦ ខែមករា ឆ្នាំ២០២៦។

សម្តេចធិបតីបានបញ្ជាក់ថា ការចូលរួមរបស់កម្ពុជា​ក្នុងក្រុមប្រឹក្សាសន្តិភាពនេះ គឺដើម្បីបង្ហាញពីឆន្ទៈដ៏មុតមាំរបស់កម្ពុជា ក្នុងការគាំទ្រ និងរួមចំណែកដល់ការលើកកម្ពស់ការកសាង និងរក្សាសន្តិភាពសកល។

សម្តេចធិបតីបានលើកឡើងថា សុច្ឆន្ទៈស្រឡាញ់សន្តិភាព ការគាំទ្រ និងការរួមចំណែកដល់ការកសាង និងរក្សាសន្តិភាព គឺជាគោលការណ៍មូលដ្ឋានដែលកម្ពុជាតែងតែប្រកាន់ខ្ជាប់ជារៀងរហូតមក ជាពិសេសតាមរយៈការបញ្ជូនកងកម្លាំងរក្សាសន្តិភាពរបស់កម្ពុជា ក្រោមឆត្រអង្គការសហប្រជាជាតិ ទៅបំពេញបេសកកម្មនៅតាមបណ្តាប្រទេសមួយចំនួន ដែលរងផលប៉ះពាល់ដោយសារសង្គ្រាម។

ជាមួយគ្នានេះផងដែរ សម្តេចធិបតីបានបញ្ជាក់បន្ថែមថា ដើម្បីបំបាត់ការយល់ច្រឡំរបស់ប្រជាពលរដ្ឋមួយចំនួន អំពីកាតព្វកិច្ចហិរញ្ញវត្ថុរបស់កម្ពុជា ក្នុងការចូលរួមជាសមាជិកស្ថាបនិកនៃក្រុមប្រឹក្សាសន្តិភាព ដោយបានអះអាងថា ការចូលរួមសម្រាប់អាណត្តិ ៣ឆ្នាំ មិនតម្រូវឱ្យបង់ថវិកាណាមួយឡើយ។

សម្តេចធិបតីបានបញ្ជាក់ថា ការបង់ថវិកាចំនួន ១ពាន់លានដុល្លារសហរដ្ឋអាមេរិក គឺអនុវត្តតែសម្រាប់ករណីចូលជាសមាជិករយៈពេលវែង ឬសមាជិកអចិន្ត្រៃយ៍ តែប៉ុណ្ណោះ។ ការសម្រេចចូលរួមរបស់កម្ពុជា​ក្នុងក្រុមប្រឹក្សាសន្តិភាពនេះ ត្រូវបានមើលឃើញថា ជាការបន្តបង្ហាញពីតួនាទី និងការទទួលខុសត្រូវរបស់កម្ពុជា លើឆាកអន្តរជាតិ ក្នុងការរួមចំណែកដល់សន្តិភាព និងស្ថិរភាពពិភពលោក៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត