អាជីវករ​សង់​តូប​លើចំណីផ្លូវសាធារណៈ​ជាង ៦០ទីតាំង យល់ព្រមសហការ រុះរើចេញ ដោយ​គ្មាន​ការ​តវ៉ា

ភ្នំពេញ ៖ អភិបាលខណ្ឌមានជ័យ បន្តចុះត្រួតពិនិត្យមើល តូបលក់ដូរលើចំណីផ្លូវ ជាង ៦០ទីតាំង លើបណ្តោយផ្លូវបេតុង ដែលយល់ព្រមរុះរើចេញ ដោយខ្លួនឯង។

ជាក់ស្តែង កាលពីរសៀលថ្ងៃទី២៨ ខែមករា ឆ្នាំ២០២៦ នៅចំណុចមុខអគ្គិសនីទួលពង្រ តាមបណ្តោយផ្លូវបេតុង ស្ថិតក្នុងភូមិដំណាក់ធំទី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

លោក សេង គន្ធ អភិបាលនៃគណៈអភិបាលខណ្ឌមានជ័យ បាន​ឱ្យ​ដឹង​ថា លោកបានដឹកនាំកម្លាំង បន្តចុះត្រួតពិនិត្យ ដំណើរការរុះរើតូបដែលសង់លក់ដូរលើចំណីផ្លូវ នឹងកាត់សំយ៉ាប និងផ្ទាំងប៉ាណូដែលសង់មកលើផ្លូវសាធារណៈ ។ ជាលទ្ធផលល្អ គឺ បងប្អូន​អាជីវករ​យល់​ព្រម​សហការ រុះរើដោយខ្លួនឯង ដើម្បីសម្រួលលំហូរចរាចរណ៍ឡើងវិញ លែងមានការរំខាន លើការកកស្ទះបន្តទៅទៀតឡើយ។

លោក អភិបាលខណ្ឌមានជ័យបន្តថា ក្នុងនោះអាជីវករដែលសង់តូប ក៏ដូចដាក់ផ្លាកផ្ទាំងប៉ាណូ ចំនួន ៦២ទីតាំង យល់ព្រមចូលរួមសហការ ក្នុងការរុះរើចេញពីលើផ្លូវសាធារណៈ បន្ទាប់ពីកម្លាំងអាជ្ញាធរ អប់រំណែនាំរួចរាល់។

ជាចុងក្រោយ លោក សេង គន្ធ អភិបាលខណ្ឌមានជ័យ បានស្នើសុំទៅពលរដ្ឋ ដែលប្រកបការលក់ដូរ ត្រូវរួបរួមគ្នា ចូលរួមសហការជាមួយអាជ្ញាធរ នឹងស្វែងទីតាំងលក់ដូរ​ឱ្យ​បាន​សមស្រប មិនត្រូវរំលោភលើផ្លូវសាធារណៈបន្តនោះឡើយ ដើម្បីសុវត្ថិភាព ក៏ដូចជាកាត់បន្ថយរាល់ការកកស្ទះចរាចរណ៍ ងាយស្រួលដល់បងប្អូនប្រជាពលរដ្ឋទាំងអស់គ្នា៕

អត្ថបទ ៖ រដ្ឋា