កីឡា

សប្តាហ៍នេះ លីគកំពូលកម្ពុជា អាចនឹងប្រែប្រួលចំណាត់ថ្នាក់លេខ៣ ទៅលេខ ៦

បានផុស

៣ ខែ មុន

នៅ

ថ្ងៃសុក្រ ៣០ មករា ២០២៦

ដោយ

ព្រះខ័នរាជស្វាយរៀង ភ្នំពេញក្រោន បឹងកេត វិសាខា អឹមអូអាយកំពង់ដេវ៉ា និង អង្គរថាយហ្គឺរ សុទ្ធតែត្រូវប្រកួតនៅក្នុងសប្តាហ៍ទី១៨ នៃលីគបាល់ទាត់កំពូលកម្ពុជា នាចុងសប្តាហ៍នេះ ខណៈ ណាហ្គាវើលដ៍ ត្រូវសម្រាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃសៅរ៍ ទី៣១ ខែមករា ឆ្នាំ ២០២៦ គិរីវង់សុខសែនជ័យ ត្រូវបើកទ្វារផ្ទះរបស់ខ្លួនទទួលក្រុម បឹងកេត នៅវេលាម៉ោង ៣:៤៥ នាទីរសៀល ហើយ អង្គរថាយហ្គឺរ ត្រូវបើកទ្វារកីឡដ្ឋានរបស់ខ្លួនទទួលក្រុមកំពុងឡើងជើង វិសាខា វេលាម៉ោង ៦ ល្ងាច។

បឹងកេត បានធ្លាក់ទៅចំណាត់ថ្នាក់លេខ ៤ វិញ បន្ទាប់ពីចាញ់ ២ ប្រកួតចុងក្រោយ គឺ ចាញ់ អង្គរថាយហ្គឺរ ១-០ និង ចាញ់ អឹមអូអាយកំពង់ដេវ៉ា ១-០។ ដូច្នេះពួកគេមាន ២៨ ពិន្ទុ ពីការឈ្នះ ៨ ស្មើ ៤ និងចាញ់ ៥។ ចំណែក គិរីវង់សុខសែនជ័យ មានតែ ១១ ពិន្ទុប៉ុណ្ណោះពីការឈ្នះ ៣ ស្មើ ២ និងចាញ់ ១១ ប្រកួត ស្ថិតនៅលេខ ១១។

ក្រុម អង្គរថាយហ្គឺរ ធ្វើបានល្អវិញហើយដោយបានយកឈ្នះ បឹងកេត ១-០ ក្នុងសប្តាហ៍ទី១៧ បន្ទាប់ពីធ្វើមិនបានល្អសម្រាប់ ៥ ប្រកួតចុងក្រោយ។ ពួកគេ មាន ២៧ ពិន្ទុ ពីការឈ្នះ ៨ ស្មើ ៣ និងចាញ់ ៥ ស្ថិតនៅលេខ ៥ ក្នុងតារាងពិន្ទុ។

វិសាខា អាចនឹងរំកិលខ្លួនឡើងទៅកាន់ចំណាត់ថ្នាក់ ៥ ប្រសិនបើទទួលបាន ៣ ពិន្ទុនៅទឹកដីខេត្តសៀមរាប។ វិសាខា កំពុងស្ថិតនៅលេខ ៦ តាមរយៈការឈ្នះ ៦ ស្មើ ៧ និងចាញ់ ៤ ប្រកួត។ ៤ប្រកួតចុងក្រោយ ពួកគេមិនទាន់ស្គាល់បរាជ័យឡើយ។

ចំពោះការប្រកួតនៅថ្ងៃអាទិត្យ ទី១ ខែកុម្ភៈ វិញ ព្រះខ័នរាជស្វាយរៀង ទទួលក្រុម កងយោធពលខេមរភូមិន្ទ នៅពហុកីឡដ្ឋានជាតិមរតកតេជោ វេលាម៉ោង៦ល្ងាច។ ជំនួបនេះ ម្ចាស់ផ្ទះទំនងជាបាន ៣ ពិន្ទុដើម្បីបន្តឈរលើកំពូលតារាង។ យ៉ាងណា ពួកគេអវត្តមានកីឡាករសំខាន់គឺ មិន រតនៈ និង Christian ដោយសារមានកាតលឿង។

អឹមអូអាយ កំពង់ដេវ៉ា ក៏ទំនងជាទទួលបាន ៣ ពិន្ទុពីក្រុមម្ចាស់ផ្ទះ ឡាយហ្វ ខេត្តព្រះសីហនុ ដោយផ្អែកលើទម្រង់លេងយ៉ាងល្អនៅរដូវកាលនេះ។ ពួកគេកម្របាត់បង់ពិន្ទុណាស់នៅពេលជួបក្រុមខ្លាំងៗ ប៉ុន្តែបែរជាបាត់ពិន្ទុក្រោមថ្វីជើងក្រុមដែលមិនសូវខ្លាំងទៅវិញ។ អ្វីដែលគួរឲ្យកត់សំគាល់ ក្រុមកំពង់ដេវ៉ា ទើបតែចាញ់ អាយអេយអាយ ដង្កោសែនជ័យ ២-៣ ក្នុងពានរង្វាន់សម្តេចតេជោ ហ៊ុន សែន កាលពីពាក់កណ្តាលសប្តាហ៍នេះ។

ចំពោះ ភ្នំពេញក្រោន នឹងបណ្តោយឲ្យរបូត ៣ ពិន្ទុជាដាច់ខាតនៅពេលទទួលក្រុម អាយអេសអាយ ដង្កោសែនជ័យ វេលាម៉ោង ៦ ល្ងាចនៅក្នុងផ្ទះរបស់ខ្លួន។ ៥ ប្រកួតចុងក្រោយ ភ្នំពេញក្រោន ឈ្នះ ៣ ស្មើ១ និងចាញ់ ១ ដូច្នេះពួកគេមាន ៣៧ ពិន្ទុពីការឈ្នះសរុប ១១ លើក ស្មើ ៤ និងចាញ់ ១ ស្ថិតនៅលេខ ២ តាមពីក្រោយក្រុមកំពូលតារាង ព្រះខ័នរាជស្វាយរៀង តែ ២ ពិន្ទុប៉ុណ្ណោះ។

និយាយរួម ព្រះខ័នរាជស្វាយរៀង និង ភ្នំពេញក្រោន មានភាគរយខ្ពស់ក្នុងការរក្សាខ្លួនឲ្យស្ថិតនៅលេខ ១ និងលេខ ២ ក្នុងតារាងដដែល។ ផ្ទុយទៅវិញចំណាត់ថ្នាក់លេខ៣ លេខ៤ លេខ៥ និងលេខ៦ ទំនងជាមានការប្រែប្រួលជាមិនខាននៅក្នុងសប្តាហ៍នេះ។ ការប្រែប្រួលនោះគឺថា បឹងកេត អាចឡើងទៅលេខ ៣ វិញ ហើយ វិសាខា អាចឡើងទៅលេខ ៥ និង អង្គរថាយហ្គឺរអាចធ្លាក់ទៅលេខ ៦៕