ព័ត៌មានជាតិ

អាជ្ញាធរខេត្តព្រះវិហារ សម្របសម្រួលវិវាទដីធ្លីរ៉ាំរ៉ៃរវាងឪពុក និងកូន ចំនួន ៤៥ ហិតា នៅស្រុករវៀង បានជោគជ័យ

បានផុស

៤ ខែ មុន

នៅ

ថ្ងៃព្រហស្បតិ៍ ១២ កុម្ភៈ ២០២៦

ដោយ

ជម្លោះដីធ្លីលក្ខណៈគ្រួសាររវាងឪពុកម្ដាយ និងកូនបង្កើត កូនប្រសា នៅស្រុករវៀង ដែលអូសបន្លាយអស់រយៈពេលជាច្រើនឆ្នាំ ត្រូវបានបញ្ចប់ជាស្ថាពរហើយ កាលពីព្រឹកថ្ងៃទី ១១ ខែកុម្ភៈ ឆ្នាំ ២០២៦ ក្រោមយន្តការសម្របសម្រួលប្រកបដោយតម្លាភាពពីរដ្ឋបាលខេត្តព្រះវិហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងមក សំណុំរឿងដីធ្លីទំហំ ៤៥ ហិតា នៅចំណុចភ្នំជៀស ឃុំរមណីយ ស្រុករវៀង បានក្លាយជាប្រធានបទក្តៅក្នុងបណ្ដាញសង្គម ដោយមានការចោទប្រកាន់ថា អាជ្ញាធរស្រុករវៀង បានឃុបឃិតជាមួយភាគីកូនបង្កើត និងកូនប្រសា ដើម្បីរំលោភយកដីធ្លីពីឪពុកម្ដាយគឺ លោក ហៀប ហឿង និងលោកស្រី លឹង ហួរ។ ករណីនេះ បានបង្កឲ្យមានការរិះគន់យ៉ាងខ្លាំង ខណៈកូនប្រុសម្នាក់ទៀតរបស់ពួកគាត់គឺជាវីរកងទ័ពដែលកំពុងឈរជើងការពារបូរណភាពទឹកដី និងសមរភូមិមុខ។

ក្នុងកិច្ចប្រជុំសម្របសម្រួលក្រោមអធិបតីភាព លោក មិន ស៊ីថា អភិបាលរងខេត្តព្រះវិហារ និងមន្ទីរជំនាញ អង្គប្រជុំបានបង្ហាញរបាយការណ៍បច្ចេកទេសយ៉ាងច្បាស់លាស់នាំទៅរកការបញ្ចប់ជម្លោះ ក្នុងនោះ ដី ២៧.៥១ ហិតា ជាដីស្ថិតក្នុងគម្រោងសម្បទានសេដ្ឋកិច្ចរបស់ក្រុមហ៊ុន (គ្រីនឆយខេមបូឌា) ដែលជាដីរដ្ឋ។ ដី ៥.២០ ហិតា ជាដីព្រៃសាធារណៈរបស់រដ្ឋតំបន់ភ្នំដែលត្រូវការពារដាច់ខាត និងដីចំនួន ១២.៩៧ ហិតា ជាដីអាស្រ័យផលជាក់ស្ដែង ដែលអាចយកដោះស្រាយបាន។ ការបង្ហាញទិន្នន័យច្បាស់លាស់បែបនេះបានជួយឲ្យភាគីជម្លោះ និងមហាជន យល់ឃើញថា ដីធ្លាប់តែចោទថាបាត់បង់ ៤៥ ហិតា នោះ ភាគច្រើនធំគឺជាដីរបស់រដ្ឋដែលបុគ្គលមិនអាចកាន់កាប់បានឡើយ។

ក្រោមការសម្របសម្រួលដោយយុត្តិធម៌ និងការចូលរួមមតិពីគ្រប់ភាគីពាក់ព័ន្ធ ជម្លោះដែលធ្លាប់តែល្អក់កករ ត្រូវបានដោះស្រាយបញ្ចប់ដោយមានការឯកភាពគ្នាពីភាគីទាំងសងខាង ហើយកូនដែលធ្លាប់តែប្តឹងឪពុកម្ដាយក៏បានលត់ជង្គង់សុំទោសឪពុកម្ដាយផងដែរ។

សូមជម្រាបថា កិច្ចប្រជុំនេះប្រព្រឹត្តិទៅនៅសាលប្រជុំអគាររដ្ឋបាលសាលាស្រុករវៀង ជាលទ្ធផលនៃការសម្របសម្រួលភាគីទាំងពីរបានឯកភាពគ្នាដូចខាងក្រោម ៖ ដីទំហំ ២៧.៥១ ហិតា រក្សាជាដីរបស់រដ្ឋ (ដីសម្បទានសេដ្ឋកិច្ច)។ ដីទំហំ ៥.២០ ហិតា រក្សាជាដីសាធារណៈរបស់រដ្ឋ (ដីភ្នំ)។ ដីទំហំ ១២.៩៧ ហិតា ក្នុងនោះ ទំហំ ៤ ហិតា នៅផ្នែកខាងជើង ស្ថិតក្នុងយន្តការតុលាការ និង ដីទំហំ ៨.៩៧ ហិតា នៅផ្នែកខាងត្បូង ផ្តល់ជូនទៅឈ្មោះ ហៀប ហឿង និងប្រពន្ធឈ្មោះ លឹង ហួរ គ្រប់គ្រងជាកម្មសិទ្ធិ៕

អត្ថបទ ៖ ជុន កុសល

Related Topics:ខេត្តព្រះវិហារ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា