ព័ត៌មានជាតិ

ក្រសួងអប់រំ រៀបចំសាលារៀនបណ្ដោះអាសន្ននៅជំរំក្នុងខេត្តបន្ទាយមានជ័យ ដើម្បីសម្រួលដល់ដំណើរការរៀន និងបង្រៀន

បានផុស

២ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

ក្រសួងអប់រំ យុវជន និងកីឡា រៀបចំសាលារៀន និងការសាងសង់កន្លែងប្រើប្រាស់បណ្ដោះអាសន្ននៅជំរំក្នុងខេត្តបន្ទាយមានជ័យ ដើម្បីសម្រួលដល់ដំណើរការរៀន និងបង្រៀន អំឡុងពេលសាងសង់អគារសិក្សាស្តង់ដាររឹងមាំ។

នៅក្នុងកិច្ចប្រជុំស្តីពី “ការរៀបចំសាលារៀននៅជំរំក្នុងខេត្តបន្ទាយមានជ័យ”កាលពីថ្ងៃទី ១៨ កុម្ភៈ នៅទីស្តីការក្រសួង លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានណែនាំឱ្យរៀបចំបង្កើតគណៈកម្មាធិការក្រុមការងារចំពោះកិច្ចដើម្បីជំរុញការងារនេះដោយរក្សារចនាសម្ព័ន្ធសាលារៀនគោលដៅនៅដដែល។ ត្រូវបន្តយកចិត្តទុកដាក់លើកទឹកចិត្តនាយកនាយិកាសាលា និងលោកគ្រូអ្នកគ្រូនៅតំបន់ដែលរងផលប៉ះពាល់ដោយគូសបញ្ជាក់ពីភាពចាំបាច់ក្នុងការបន្តតាមដានសភាពការណ៍បច្ចុប្បន្នភាពនៅតំបន់ព្រំដែន និងបន្តពង្រឹងកិច្ចសហការគ្នាឱ្យបានល្អប្រសើរ។

ពាក់ព័ន្ធនឹងការផ្លាស់ប្តូរទីតាំង នៃការសាងសង់សាលារៀន លោកឧបនាយករដ្ឋមន្ត្រី បានស្នើឱ្យក្រុមការងារជំនាញសិក្សាឱ្យបានច្បាស់លាស់ពីចំនួនសិស្ស និងទំហំ នៃការវិនិយោគឱ្យមានប្រសិទ្ធភាព និងប្រសិទ្ធផល និងត្រូវចុះពិនិត្យផ្ទាល់ដល់ទីតាំងថ្មី ដោយសហការឱ្យបានល្អជាមួយមន្ទីរអប់រំ យុវជន កីឡាខេត្ត អាជ្ញាធរដែនដី ដៃគូអភិវឌ្ឍន៍ និងម្ចាស់ជំនួយនានាដែលបានចូលរួមចំណែកក្នុងគម្រោងជួសជុល និងសាងសង់សាលារៀនដែលខូចខាតឡើងវិញ។

សង្គ្រាមឈ្លានពានពីសំណាក់យោធាថៃមកលើដែនដីប្រទេសកម្ពុជាបានបណ្តាលឱ្យសាលារៀនចំនួន ២៦ សាលា បានរងការខូចខាត ហើយគិតមកដល់ពេលនេះ មានសាលារៀននៅខេត្តបន្ទាយមានជ័យចំនួន ៥ បន្តផ្អាកនៅឡើយ។

គួរបញ្ជាក់ថា ឆ្លើយតបនឹងស្ថានភាពបច្ចុប្បន្ននៅតាមតំបន់ព្រំដែនជាមួយប្រទេសថៃ ក្រសួងអប់រំ យុវជន និងកីឡា បានរៀបចំផែនការស្តារសាលារៀនឡើងវិញ ដោយបែងចែកជាតំបន់ដែលនៅមានការហ៊ុមព័ទ្ធដោយយោធាថៃជាតំបន់ក្រហម និងតំបន់ផ្សេងៗ ទៀត ដែលអាចចាប់ផ្តើមចូលទៅរៀបចំ និងស្តារឡើងវិញបានជាបណ្តើរៗ ដើម្បីធានាបានថា ការអប់រំនៅតែបន្ត ជាពិសេសក្រសួងមានបំណងយកឱកាសនេះដែរដើម្បីអភិវឌ្ឍន៍សាលារៀននៅតាមតំបន់ព្រំដែនឱ្យរឹងមាំ និងល្អប្រសើរសម្រាប់ប្រើប្រាស់យូរអង្វែង ស្របតាមផែនការយុទ្ធសាស្ត្រអាទិភាពរបស់រាជរដ្ឋាភិបាលក្នុងការអភិវឌ្ឍធនធានមនុស្សឆ្ពោះទៅសម្រេចចក្ខុវិស័យកម្ពុជាឆ្នាំ ២០៣០ និង ២០៥០៕

អត្ថបទ ៖ សំអឿន