ព័ត៌មានជាតិ

កាកបាទក្រហមផ្សព្វផ្សាយពីការយល់ដឹងអំពីមីនដល់ជនភៀសសឹកពីភូមិព្រៃចាន់ និងជោគជ័យ

បានផុស

២ ខែ មុន

នៅ

ថ្ងៃសៅរ៍ ២១ កុម្ភៈ ២០២៦

ដោយ

កាកបាទក្រហមកម្ពុជាបានរៀបចំទិវាជាតិយល់ដឹងពីមីនដោយរៀបចំវេទិកាផ្សព្វផ្សាយពីមីនដល់ជនភៀសសឹកពីភូមិព្រៃចាន់ និងជោគជ័យ ដើម្បីផ្សព្វផ្សាយជូនពលរដ្ឋឱ្យបានយល់ដឹង និងការការពារខ្លួនពីសំណល់សង្គ្រាម។ ពិធីនេះរៀបចំនៅក្នុងមណ្ឌលសុវត្ថិភាពភៀសសឹក វត្តចន្ទស៊ីសាមគ្គីរតនារាម ក្នុងភូមិកូបកើត ឃុំកូប ស្រុកអូរជ្រៅ ខេត្តបន្ទាយមានជ័យ នៅថ្ងៃទី២០ ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគណៈកម្មាធិការសាខាកាកបាទក្រហមកម្ពុជា និងជាអភិបាលខេត្តបន្ទាយមានជ័យលោក អ៊ុំ រាត្រី បានថ្លែងថា ក្នុងសង្គ្រាមដែលយោធាថៃបើកការឈ្លានពានជាលើកទី២ រំលោភដែនទឹកដីកម្ពុជា ថៃបានប្រើប្រាស់អាវុធធុនធ្ងន់ បាញ់ផ្លោងបំផ្លាញវត្តអារាមមួយចំនួន និងផ្ទះសម្បែងជាច្រើនខ្នងរបស់ប្រជាពលរដ្ឋ ហើយបើទោះបីពេលនេះស្ថានការធូរស្រាលខ្លះហើយក្តីក៏សំណល់នៃគ្រាប់ផ្លោង គា្រប់យុទ្ធភណ្ឌមិនទាន់ផ្ទុះជាច្រើនកំពុងស្ថិតនៅរាយប៉ាយពាសពេញភូមិឋាន ទីអារាមសាសនា និងទីកន្លែងសាធារណៈនានាដែលបង្កជាហានិភ័យដល់ជីវិតមនុស្ស និងសត្វនៅឡើយ។ លោកជំរុញដល់ពលរដ្ឋស្ដាប់ការពន្យល់ណែនាំពីមន្ត្រីជំនាញ និងលើកជាសំណួរផងដែរ។

ជាមួយគ្នានេះលោកក៏បានបញ្ជាក់ផងដែរថា រដ្ឋាភិបាលកម្ពុជានឹងមិនបោះបង់ទឹកដីឱ្យទៅអ្នកឈ្លានពានឡើយ។

លោកថា៖ «ដូចដែលបងប្អូននៅទីនេះបានជួបផ្ទាល់ជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជារួចមកហើយ ដែលសម្តេចបានបញ្ជាក់ថាមិនចោលប្រជាពលរដ្ឋ មិនចោលទឹកដី និងមិនចោលបងប្អូនដែលរស់នៅទីនេះឡើយ»។

សូមបញ្ជាក់ថា ទិវាជាតិយល់ដឹងអំពីមីន ថ្ងៃទី២៤ កុម្ភៈ គឺជាទិវាប្រចាំឆ្នាំដែលកម្ពុជាប្រារព្ធឡើង ដើម្បីផ្សព្វផ្សាយ និងអប់រំអំពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម។ កាកបាទក្រហមកម្ពុជាក្នុងនាមជាជំនួយការឱ្យអាជ្ញាធរសាធារណៈ បានរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ដើម្បីសម្រេចបានគោលដៅ “ឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម” ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ ភូមិព្រៃចាន់