ជំនួបនុយក្លេអ៊ែរជុំ​ទីបីត្រូវបានកំណត់ពេល ខណៈអាមេរិក និងអ៊ីរ៉ង់ បន្តឌឺដងដាក់គ្នា

សហរដ្ឋអាមេរិក និងអ៊ីរ៉ង់ នឹងបើកកិច្ច​ចរចានុយក្លេអ៊ែរជុំទី៣ នៅថ្ងៃព្រហស្បតិ៍​សប្ដាហ៍​នេះ ក្នុងទីក្រុងហ្សឺណែវ ក្រោមការសម្របសម្រួលពីប្រទេសអូម៉ង់។

ចេញ​​ផ្សាយ​ថ្ងៃទី​២៣​ខែ​កុម្ភៈ​ឆ្នាំ​២០២៦ ទីភ្នាក់ងារ​ព័ត៌មាន​រ៉យទ័រ បាន​ឲ្យ​ដឹង​ថា រដ្ឋមន្ត្រីការបរទេសអូម៉ង់ លោក Badr Albusaidi បានបញ្ជាក់ថា មានការខិតខំប្រឹងប្រែងជាវិជ្ជមានដើម្បីឈានទៅរកកិច្ចព្រមព្រៀងចុងក្រោយ ទោះបីជាប្រធានាធិបតី ដូណាល់ ត្រាំ ព្រមានពី «រឿងអាក្រក់» ប្រសិនបើកិច្ចចរចាបរាជ័យក៏ដោយ។ ខណៈអាមេរិកបង្កើនកម្លាំងយោធានៅមជ្ឈិមបូព៌ា ប្រធានាធិបតីអ៊ីរ៉ង់ លោក Masoud Pezeshkian បាននិយាយថា ការចរចានាពេលថ្មីៗនេះបានផ្តល់​នូវ​ «សញ្ញាលើកទឹកចិត្ត» ខ្លះៗ។

ចំណុចចម្រូងចម្រាសសំខាន់គឺការចម្រាញ់សារធាតុអ៊ុយរ៉ាញ៉ូម និងការដាក់ទណ្ឌកម្មសេដ្ឋកិច្ច។ បេសកជនអាមេរិក លោក Steve Witkoff បានលើក​ឡើង​ពី​ចម្ងល់​​ថា ហេតុអ្វីបានជាអ៊ីរ៉ង់មិនព្រមចុះចាញ់ ក្រោមសម្ពាធយោធា ដោយ​លោកបារម្ភថា អ៊ីរ៉ង់ជិតអាចផលិតគ្រាប់បែក​បរិមាណូ​បានហើយ។ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានឆ្លើយតបវិញថា អ៊ីរ៉ង់​នឹង​មិនចុះចាញ់ឡើយ ប៉ុន្តែនៅតែចង់បានដំណោះស្រាយតាមផ្លូវការទូត។ អ៊ីរ៉ង់ត្រូវបានគេរាយការណ៍ថា អាចនឹងយល់ព្រមបញ្ជូនអ៊ុយរ៉ាញ៉ូមពាក់កណ្តាលទៅក្រៅប្រទេស ជាថ្នូរនឹងការលុបទណ្ឌកម្មសេដ្ឋកិច្ច។

ក្រៅពីបញ្ហានុយក្លេអ៊ែរ អាមេរិកក៏ចង់​ឲ្យ​មានការចរចាលើកម្មវិធីមីស៊ីលរបស់អ៊ីរ៉ង់ផងដែរ។ ស្ថានភាពកាន់តែតានតឹង បន្ទាប់ពីមន្ត្រីអាមេរិកបានជួបជាមួយលោក Reza Pahlavi ដែលជាមេដឹកនាំបក្សប្រឆាំងអ៊ីរ៉ង់​​កំពុងនិរទេសខ្លួន ដែលលោកធ្លាប់គាំទ្រ​ឲ្យ​អាមេរិកប្រើកម្លាំងយោធា។ រហូតមកដល់ពេលនេះ ភាគីទាំងពីរនៅតែមានការយល់ឃើញខុសគ្នាខ្លាំងលើរបៀបនៃការលុបទណ្ឌកម្ម និងស្ថានភាពរោងចក្រនុយក្លេអ៊ែររបស់អ៊ីរ៉ង់ បន្ទាប់ពីមានការវាយប្រហារពីសំណាក់អាមេរិក និងអ៊ីស្រាអែល កាលពីខែមិថុនាឆ្នាំមុន៕

ប្រែសម្រួល៖ ឈាង