ព័ត៌មានជាតិ

រដ្ឋមន្ត្រីក្រសួងធម្មការណែនាំឱ្យមានកិច្ចសហការជាមួយក្រសួងអប់រំលើកម្មវិធីអប់រំសីលធម៌ដល់យុវជន

បានផុស

៣ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

រដ្ឋមន្ត្រីក្រសួងធម្មការ និងសាសនា លោក ចាយ បូរិន បានណែនាំឱ្យក្រសួងមានកិច្ចសហការជាមួយក្រសួងអប់រំក្នុងការបញ្ចូលកម្មវិធីអប់រំសីលធម៌ គុណធម៌ ដល់យុវជននៅតាមគ្រឹះស្ថានសិក្សា និងសហគមន៍ ដើម្បីជួយឱ្យប្រជាជនកម្ពុជាមានបញ្ញាស្មារតីប្រកបដោយព្រហ្មវិហារធម៌ កាត់បន្ថយអំពើអនាចារ អបាយមុខ អំពើហិង្សា អសីលធម៌ និងចូលរួមជួយឱ្យសង្គមជាតិមានសុខដុមរមនា និងពង្រឹងសាមគ្គីធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទសន្និបាតការងារឆ្នាំ២០២៥ របស់ក្រសួងធម្មការ និងសាសនា នៅសាលសន្និសីទចតុម្មុខ រសៀលថ្ងៃទី២៦ ខែកុម្ភៈ ឆ្នាំ២០២៦ លោករដ្ឋមន្ត្រី ចាយ បូរិន មានប្រសាសន៍ថា ក្នុងស្ថានភាព និងការប្រែប្រួលក្នុងសង្គមបច្ចុប្បន្ននេះ វិស័យសាសនាកាន់តែដើរតួសំខាន់ក្នុងការចូលរួមថែរក្សាស្ថិរភាពនយោបាយ សណ្ដាប់ធ្នាប់សង្គម សន្តិសុខ និងការអភិវឌ្ឍសង្គម-សេដ្ឋកិច្ច។ លោកបន្ថែមដោយជំរុញដល់គ្រប់ក្រសួងស្ថាប័នពាក់ព័ន្ធ និងវិស័យឯកជន បន្តសហការជាមួយក្រសួងធម្មការនិងសាសនា ដើម្បីលើកកម្ពស់សាសនា និងសីលធម៌សង្គម និងណែនាំដល់ស្ថាប័នក្រោមឱវាទក្រសួងស្វែងរកកិច្ចសហការជាមួយក្រសួងអប់រំដើម្បីបញ្ចូលកម្មវិធីអប់រំសីលធម៌ គុណធម៌ ដល់យុវជននៅតាមគ្រឹះស្ថានសិក្សា និងសហគមន៍ផងដែរ។

រដ្ឋាភិបាលអាណត្តិទី៧ ដែលដឹកនាំដោយសម្ដេចធិបតី ហ៊ុន ម៉ាណែត បានចាត់ទុកការអភិវឌ្ឍមូលធនមនុស្សទៅក្នុងគោលនយោបាយបញ្ចកោណដើម្បីជំរុញដល់ពលរដ្ឋឱ្យមានចំណេះដឹង ចំណេះធ្វើ និងសីលធម៌ក្នុងការរស់នៅជាសំខាន់។ សម្ដេចធិបតីក៏បានបញ្ជាឱ្យមានវិធានការជាបន្តបន្ទាប់បង្ក្រាបរាល់សកម្មភាពក្មេងទំនើង អប់រំណែនាំធ្វើសម្បទាដើម្បីធ្វើឱ្យសង្គមមានសណ្ដាប់ធ្នាប់ និងរក្សាតម្លៃសីលធម៌ក្នុងសង្គមខ្មែរផងដែរ។

តាមរបាយការណ៍ក្រសួងមហាផ្ទៃក្នុងឆ្នាំ២០២៥ នគរបាលជាតិបានបង្ក្រាបក្មេងទំនើងបាន៩៩១ករណី ឃាត់ខ្លួនបាន៣ ៦០៧នាក់ និងបញ្ជូនទៅតុលាការចំនួន ២ ៣៥៥នាក់៕

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា