ព័ត៌មានអន្ដរជាតិ

បារាំងប្រកាសពីគោលការណ៍ប្រើប្រាស់អាវុធនុយក្លេអ៊ែរជាថ្មី ខណៈពិភពលោកប្រឈមភាពវឹកវរ

បានផុស

២ ខែ មុន

នៅ

ថ្ងៃអង្គារ ៣ មីនា ២០២៦

ដោយ

ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បានប្រកាសពីគោលការណ៍របស់ប្រទេសបារាំងស្តីពីការប្រើប្រាស់អាវុធនុយក្លេអ៊ែរដ៏មានសក្តានុពលខ្លាំងឡើងវិញ និងការទប់ស្កាត់ក្នុងមធ្យោបាយផ្សេងៗ ខណៈពេលស្ថានភាពពិភពលោកកាន់តែអាក្រក់។ យោងតាម France24 ចុះផ្សាយថ្ងៃទី០២ ខែមីនា ឆ្នាំ២០២៦ ។

ប្រធានាធិបតីបារាំង លោក Emmanuel Macron! រូបភាព៖ Reuters

នៅក្នុងសុន្ទរកថាសំខាន់មួយថ្លែងចេញពីមូលដ្ឋានយោធាមួយ ដែលជាកន្លែងផ្ទុកនាវាមុជទឹកមីស៊ីលផ្លោងរបស់ប្រទេសនេះ លោក ម៉ាក្រុង លើកឡើងថា ប្រទេសបារាំងកំពុងចូលដល់ដំណាក់កាលថ្មីមួយក្នុងយុទ្ធសាស្ត្ររារាំងនុយក្លេអ៊ែររបស់ខ្លួន ដែលនឹងបំពេញបន្ថែមនូវបេសកកម្មនុយក្លេអ៊ែររបស់អង្គការណាតូ ហើយលោកក៏បានអញ្ជើញសម្ព័ន្ធមិត្តអឺរ៉ុបឱ្យចូលរួមក្នុងសមយុទ្ធទប់ស្កាត់នុយក្លេអ៊ែរផងដែរ។

លោក ម៉ាក្រុង បន្តថា៖«អ្វីដែលខ្ញុំចង់បានសម្រាប់ជនជាតិអឺរ៉ុប គឺទទួលបានការគ្រប់គ្រងវាសនារបស់ពួកគេឡើងវិញ»។

គួរបញ្ជាក់ថា ប្រទេសបារាំងត្រៀមខ្លួនរួចជាស្រេចដើម្បីបង្កើនក្បាលគ្រាប់នុយក្លេអ៊ែររបស់ខ្លួនជាលើកដំបូងក្នុងរយៈពេលជាច្រើនទសវត្សរ៍។

ប្រធានាធិបតីបារាំង បានសង្កត់ធ្ងន់ថា៖«ថាមពលនុយក្លេអ៊ែររបស់ប្រទេសនេះនឹងបម្រើដល់សន្តិភាព» ។

ទោះជាយ៉ាងណាក៏ដោយ លោកបានព្រមានថា ប្រទេសបារាំងអាចទាញយកអត្ថប្រយោជន៍ពីឃ្លាំងអាវុធនុយក្លេអ៊ែរដ៏សំខាន់នេះតាមរបៀបវិធីសាស្រ្តរបស់ខ្លួន និងអាចងើបឡើងវិញបាន។

លើសពីនេះ មេដឹកនាំអឺរ៉ុបបានសម្តែងភាពមិនប្រាកដប្រជាកាន់តែខ្លាំងឡើង ពីការប្តេជ្ញាចិត្តរបស់សហរដ្ឋអាមេរិកក្នុងការការពារអឺរ៉ុបក្រោមឆ័ត្រនុយក្លេអ៊ែរផ្ទាល់ខ្លួន ជាគោលនយោបាយដែលមានបំណង ធានាថា សម្ព័ន្ធមិត្តជាពិសេសសមាជិកអង្គការណាតូ នឹងត្រូវបានការពារដោយកងកម្លាំងនុយក្លេអ៊ែររបស់សហរដ្ឋអាមេរិកក្នុងករណីមានការគំរាមកំហែង ដោយមិនចាំបាច់អភិវឌ្ឍសមត្ថភាពនុយក្លេអ៊ែរផ្ទាល់ខ្លួនរបស់ពួកគេនោះទេ។

គួរបញ្ជាក់ថា ប្រទេសបារាំងគឺជាមហាអំណាចនុយក្លេអ៊ែរតែមួយគត់ក្នុងសហភាពអឺរ៉ុប៕

ប្រែសម្រួល៖ ណឺ មិនា