មេដឹកនាំ​ប្រទេស​​៤០ កោះ​ប្រជុំ​​​ត្រៀមគាំទ្រ​ដល់​ការ​បើកច្រក Hormuz វិញ​

មេដឹកនាំមកពីប្រទេសចំនួន៤០ និងអង្គការសមុទ្រអន្តរជាតិ (IMO) គ្រោងនឹងជួបប្រជុំគ្នាតាមអ៊ីនធឺណិតនៅថ្ងៃទី១៧ ខែមេសា ដើម្បីពិភាក្សាអំពីការគាំទ្រចំពោះបទឈប់បាញ់រវាងអ៊ីរ៉ង់ និងសហរដ្ឋអាមេរិក ក៏ដូចជាផែនការមួយដើម្បីធានាថា ច្រកសមុទ្រ Hormuz នឹងបើកដំណើរការឡើងវិញសម្រាប់ការដឹកជញ្ជូនទំនិញ បន្ទាប់ពីការបញ្ចប់នៃអរិភាពនៅមជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន france24. នាយករដ្ឋមន្ត្រីអង់គ្លេស លោក Keir Starmer គ្រោងនឹងមកដល់ទីក្រុងប៉ារីសនៅព្រឹកថ្ងៃព្រហស្បតិ៍​ ដើម្បីធ្វើជាសហអធិបតីក្នុងកិច្ចប្រជុំកំពូលជាមួយប្រធានាធិបតីបារាំង លោក​ Emmanuel Macron។ នៅក្នុងនោះដែរ អធិការបតីអាល្លឺម៉ង់ Friedrich Merz ក៏នឹងធ្វើដំណើរទៅកាន់ទីក្រុងប៉ារីសដើម្បីចូលរួម​ប្រជុំ​ដូចគ្នា។ នេះបើយោងតាមមន្ត្រីរដ្ឋាភិបាលអាល្លឺម៉ង់ម្នាក់បានចេញការបញ្ចាក់។

ការិយាល័យនាយករដ្ឋមន្ត្រីអង់គ្លេស បាននិយាយដែរថា មេដឹកនាំទាំងអស់នឹងបង្កើតបេសកកម្មអន្តរជាតិមួយដើម្បីបើកផ្លូវដឹកជញ្ជូនទំនិញឡើងវិញ។ វានឹងជាបេសកកម្មការពារសុទ្ធសាធ ហើយប្រទេសនានានឹងដាក់ពង្រាយកងកម្លាំង នៅពេលដែលលក្ខខណ្ឌត្រូវបានបំពេញ នៃបេសកកម្មយោធាពហុជាតិសាសន៍ការពារយ៉ាងតឹងរ៉ឹង ដើម្បីធានាបាននូវសេរីភាពនៃការធ្វើនាវាចរណ៍។

កិច្ចប្រជុំនេះក៏នឹងពិភាក្សាអំពីការគាំទ្រការងាររបស់ IMO ដើម្បីធានាសុវត្ថិភាពនាវា និងនាវិកផងដែរ។

ភ្នាក់ងារ CNN បានដកស្រង់សម្តីលោក Starmer ដែលបាននិយាយនៅក្នុងសន្និសីទមួយថា ការបើកច្រកសមុទ្រ Hormuz ឡើងវិញដោយគ្មានលក្ខខណ្ឌ និងភ្លាមៗ គឺជាការទទួលខុសត្រូវជាសកល។ យើងត្រូវចាត់វិធានការដើម្បីស្តាររំហូរថាមពល និងពាណិជ្ជកម្មឡើងវិញដោយសេរី។ មេដឹកនាំអង់គ្លេសក៏នឹងលើកឡើងពីសំណើមួយដើម្បីធានាដល់នាវាពាណិជ្ជកម្ម និងគាំទ្រដល់ការបោសសម្អាតមីន ដើម្បីធានាថាស្ថិរភាព និងសន្តិសុខសកលត្រូវបានស្តារឡើងវិញ។

ព្រមជាមួយគ្នានោះដែរ មន្ត្រីអាល្លឺម៉ង់មួយរូបបានបញ្ចាក់ថា ប្រទេសខ្លួនបានត្រៀមរួចជាស្រេចដើម្បីចូលរួមចំណែក ដោយធានាបាននូវការធ្វើដំណើរដោយសុវត្ថិភាពឆ្លងកាត់ច្រកសមុទ្រ ដរាបណាមានមូលដ្ឋានច្បាប់ច្បាស់លាស់។ ការចូលរួមចំណែកនេះអាចរួមបញ្ចូលការដាក់ពង្រាយនាវារុករកមីន ឬប្រតិបត្តិការឃ្លាំមើលតាមសមុទ្រ ដែលយោធាអាល្លឺម៉ង់មានបទពិសោធន៍ច្រើន៕

អត្ថបទ៖ សាង ស្រីល័ក្ខ