តម្លៃប្រេងហក់ឡើងខ្លាំង​ម្សិលមិញ និងថយចុះមកវិញខ្លះនៅថ្ងៃសុក្រនេះ

តម្លៃប្រេងឆៅអន្តរជាតិ​បាន​ហក់ឡើងខ្លាំងពេលបិទការជួញដូរកាលពីថ្ងៃព្រហស្បតិ៍ជុំវិញសង្រ្គាមនៅមជ្ឈិមបូព៌ា​ ប៉ុន្តែថយមកវិញខ្លះសម្រាប់ជួញដូរលើទីផ្សារអាស៊ីនាព្រឹកថ្ងៃសុក្រ (៦ មីនា) នេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅអាមេរិក ម៉ាក West Texas Intermediate (WTI) បាន​ហក់ឡើង ​៦,៣៥ ដុល្លារ ឬ ៨,៥១% ដល់ ៨១,០១ ដុល្លារ/បារ៉ែល ដែលជាកម្រិតខ្ពស់បំផុតចាប់តាំងពីខែកក្កដា ឆ្នាំ ២០២៤។ ដោយឡែកតម្លៃប្រេងឆៅនាពេលអនាគត ម៉ាក​ Brent​ វិញ បានកើនឡើង ៤,០១ ដុល្លារ ឬ ៤,៩៣% ដល់ ៨៥,៤១ ដុល្លារ/បារ៉ែល​។

កំណើនតម្លៃប្រេងនេះ បណ្ដាលមកពីជម្លោះរវាងសម្ព័ន្ធមិត្តអ៊ីស្រាអែល-សហរដ្ឋអាមេរិក និងអ៊ីរ៉ង់ ដែលនៅតែបន្តតានតឹង និងបង្កការរាំងស្ទះដល់ច្រកសមុទ្រហ័រមូហ្ស ដែលរួមចំណែកដល់ការដឹកជញ្ជូនប្រេងប្រមាណ ២០% នៃតម្រូវការសកល។

ប្រធានាធិបតី ដូណាល់ ត្រាំ បាននិយាយកាលពីថ្ងៃព្រហស្បតិ៍ថា លោកមិនមានការព្រួយបារម្ភអំពី​កំណើនតម្លៃប្រេងឥន្ធនៈរបស់សហរដ្ឋអាមេរិក ដែលបណ្តាលមកពីជម្លោះជាមួយ​អ៊ីរ៉ង់​នោះទេ ដោយលោកបានប្រាប់រ៉យទ័រ​ក្នុងបទសម្ភាសន៍ផ្តាច់មុខមួយថា ប្រតិបត្តិការយោធារបស់សហរដ្ឋអាមេរិកគឺជាអាទិភាពរបស់លោក។ លោក ត្រាំ ក៏បាននិយាយផងដែរថា សហរដ្ឋអាមេរិកចង់ចូលរួមក្នុងការជ្រើស​រើស​មេដឹកនាំបន្ទាប់របស់អ៊ីរ៉ង់ ចំពេលដែលគ្នាភាគីវិវាទមិនបង្ហាញសញ្ញានៃការចរចា។​

អ្នកជំនាញខ្លះបាន​លើកឡើងថា តម្លៃប្រេងអាចហក់ឡើងលើស ១០០ ដុល្លារ/បារ៉ែល ខណៈធនាគារវិនិយោគអាមេរិក JPMorgan បាន​ព្យាករថា តម្លៃនោះអាចកើនដល់ ១២០ ដុល្លារ/បារ៉ែល ប្រសិនបើ​ច្រកហ័រមូហ្សត្រូវបាន​បិទទាំងស្រុងរយៈពេលយូរ ដែលធ្វើឱ្យ​រាំងស្ទះដល់ការនាំចេញប្រេងពីមជ្ឈិមបូព៌ា។

ទោះបីជាយ៉ាងណាក៏ដោយ ខណៈវិនិយោគិនបន្តវាយតម្លៃលើស្ថានការណ៍នៃជម្លោះ តម្លៃប្រេងបាន​ធ្លាក់ចុះមកវិញបន្តិច។ គិតត្រឹមម៉ោង ១០ ព្រឹក ថ្ងៃសុក្រ នៅទីក្រុងភ្នំពេញ (១១ ព្រឹក នៅហុងកុង) តម្លៃប្រេង​ម៉ាក Brent បាន​ធ្លាក់ចុះ ១,៣២ ដុល្លារ ឬ ១,៥៥% មកត្រឹម ៨៤,០៩ ដុល្លារ/បារ៉ែល ខណៈតម្លៃប្រេង WTI បាន​ធ្លាក់ចុះ ១,៦៩ ដុល្លារ ឬ ២,០៩% មកត្រឹម ៧៩,៣២ ដុល្លារ/បារ៉ែល។ ទោះបីធ្លាក់ចុះក្ដី តម្លៃប្រេងទាំង ២ នៅតែខ្ពស់ខ្លាំងដដែល ធៀបនឹង​អត្រាសប្ដាហ៍មុន ដែលជួញដូរក្នុងរង្វង់ប្រហែល ៧០ ដុល្លារ/បារ៉ែល៕