ព័ត៌មានអន្ដរជាតិ

តម្លៃប្រេងអន្តរជាតិហក់ឡើង ៦% ខណៈទីផ្សារប្រែប្រួលខ្លាំង

បានផុស

៤ ថ្ងៃ មុន

នៅ

ថ្ងៃចន្ទ ២០ មេសា ២០២៦

ដោយ

តម្លៃប្រេងអន្តរជាតិបានស្ទុះងើបឡើងវិញជាង ៦% សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទនេះ បន្ទាប់ពីធ្លាក់ចុះប្រមាណ ៩% កាលពីថ្ងៃសុក្រសប្ដាហ៍មុន ដោយសារតែភាពមិនប្រាកដប្រជានៃដំណោះស្រាយជម្លោះអាមេរិក-អ៊ីរ៉ង់ ដែលធ្វើឱ្យទីផ្សារប្រេងមានការប្រែប្រួលខ្លាំង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅ ម៉ាក Brent បានកើនឡើង ៦,១១ ដុល្លារ ឬ ៦,៧% ដល់ ៩៦,៤៩ ដុល្លារ/បារ៉ែល គិតត្រឹមម៉ោងជិត ៨ កន្លះ នៅទីក្រុងតូក្យូ (ជប៉ុន)។ តម្លៃប្រេងអាមេរិក ម៉ាក WTI ឯណោះវិញ បានកើនឡើង ៦,៥៣ ដុល្លារ ឬ ៧,៧៩% ដល់ ៩០,៣៨ ដុល្លារ/បារ៉ែល។

តម្លៃប្រេងទាំង២ បានធ្លាក់ចុះជាគំហុកពេលបិទការជួញដូរសប្ដាហ៍មុន ក្រោយអ៊ីរ៉ង់ប្រកាសពីការបើកច្រកហ័រមូហ្សតាមលក្ខខណ្ឌបទឈប់បាញ់ ២ សប្ដាហ៍ ជាមួយអាមេរិក ខណៈប្រធានាធិបតីអាមេរិក លោក ដូណាល់ ត្រាំ បានប្រកាសពីការខិតទៅកាន់តែកៀកនឹងកិច្ចព្រមព្រៀងសន្តិភាពទូលំទូលាយ។ យ៉ាងណាមិញ តម្លៃប្រេងដដែលបានហក់ឡើងជាថ្មីនៅដើមសប្ដាហ៍នេះ ក្រោយភាគីទាំងសងខាងបានចោទប្រកាន់គ្នាទៅវិញទៅមក ថាបានរំលោភលើកិច្ចព្រមព្រៀងឈប់បាញ់ ដោយវាយប្រហារលើកប៉ាល់ជាច្រើនគ្រឿងកាលពីចុងសប្ដាហ៍កន្លងទៅ។

លោក ត្រាំ បានឱ្យដឹងកាលពីថ្ងៃអាទិត្យថា យោធាអាមេរិកបានរឹបអូសកប៉ាល់ដឹកទំនិញអ៊ីរ៉ង់មួយគ្រឿង ដែលបានព្យាយាមគេចវេះការបិទខ្ទប់របស់ខ្លួន ខណៈអ៊ីរ៉ង់ឯណោះវិញបាននិយាយថា អ៊ីរ៉ង់នឹងមិនចូលរួមក្នុងកិច្ចចរចាសន្តិភាពជុំទី២ទេ ទោះបីជាលោក ត្រាំ បានគំរាមកំហែងវាយប្រហារតាមអាកាសជាថ្មីក៏ដោយ។

អាមេរិកបានបន្តការបិទខ្ទប់សម្រាប់លើកប៉ាល់ចេញពីអ៊ីរ៉ង់ ខណៈអ៊ីរ៉ង់ឯណោះវិញបានប្រកាសបើកច្រកហ័រមូហ្ស ហើយបិទទៅវិញ ដែលធ្វើឱ្យការដឹកជញ្ជូនលើផ្លូវទឹកយុទ្ធសាស្រ្តនេះនៅតែបន្ត។ ច្រកហ័រមូហ្សរួមចំណែកដល់ការដឹកជញ្ជូនប្រេង ១/៥ នៃតម្រូវការសកលប្រចាំថ្ងៃ ហើយការរំខានច្រកនេះ បានធ្វើឱ្យទីផ្សារប្រេងសកលធ្លាក់ចូលទៅក្នុងវិបត្តិ ជាមួយនឹងតម្លៃហក់ឡើងលើស ១០០ ដុល្លារ/បារ៉ែល នាពេលកន្លងមក។

អ្នកវិភាគទីផ្សារបាននិយាយថា ទីផ្សារបច្ចុប្បន្ននេះនៅតែរងហានិភ័យអស្ថិរភាពតម្លៃខ្ពស់ ដោយសារតែការវិវត្តចុះឡើងនៃជម្លោះអាមេរិក និងអ៊ីរ៉ង់ ដែលគ្មានដំណោះស្រាយរយៈពេលវែង ដើម្បីធានាពីស្ថិរភាព និងសុវត្ថិភាពសម្រាប់ការផ្គត់ផ្គង់៕