ស.ស.យ.ក នឹងយកចំណូលដែលបានពីការរៀបចំនគរសង្ក្រាន្តបញ្ជូនទៅកងទ័ព និងពលរដ្ឋភៀសសឹក

ប្រធានសហភាពសហព័ន្ធយុវជនកម្ពុជា (ស.ស.យ.ក) ឯកឧត្តម ហ៊ុន ម៉ានី បានឱ្យដឹងថា ស.ស.យ.ក នឹងយក​ចំណូលដែលបានមកពីការរៀបចំនគរសង្ក្រាន្តដែលជាផ្នែកមួយនៃការរៀបចំកម្មវិធីចូលឆ្នាំប្រពៃណីខ្មែរ បញ្ជូនទៅកងទ័ព និងពលរដ្ឋភៀសសឹក។ តាមផែនការ ស.ស.យ.ក នឹងរៀបចំព្រឹត្តិការណ៍នរគសង្ក្រាន្ត នៅរាជធានីភ្នំពេញ ចាប់ពីថ្ងៃទី ១៤-១៩ ខែ មេសា ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្រ្តី ឯកឧត្តម ហ៊ុន ម៉ានី បានលើកឡើងថា ទោះបីជានៅរាជធានីភ្នំពេញ មានការរៀបចំកម្មវិធីនគរសង្ក្រាន្ត ដើម្បីអបអរសាទរឆ្នាំថ្មីក្នុងកាលៈទេសៈលំបាក ប៉ុន្តែក្រុមការងារក៏មិនភ្លេចដល់វីរកងទ័ពជួរមុខ និងពលរដ្ឋភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញដែរ។ ឯកឧត្តមបន្តថា អ្វីដែល ស.ស.យ.ក កំពុងគិតគូរឈានទៅរៀបចំនគរសង្ក្រាន្ត គឺធ្វើការជាមួយ ស.ស.យ.ក តាមបណ្តាលខេត្ត និងអាជ្ញាធរខេត្ត សម្រាប់តំបន់ណាដែលនៅមានបងប្អូនជនភៀសសឹកនៅឡើយ ដោយរៀបចំកម្មវិធីផ្សេងៗទៅជួបផ្ទាល់ និងផ្តល់ជំនួយជូនពួកគាត់។

ឯកឧត្តម បញ្ជាក់ថា៖«មិនមែនថាយើងរៀបចំនៅភ្នំពេញ ហើយភ្លេចបងប្អូនភៀសសឹកទេ ក៏ប៉ុន្តែតំបន់មួយចំនួនត្រូវមានការឯកភាពពីអាជ្ញាធរ។ ការរៀបចំនគរសង្ក្រាន្តនៅភ្នំពេញ គឺគ្រប់ទីកន្លែងទាំងអស់ ជាពិសេសមានការរៀបចំផ្ទាំង (Poster) ដើម្បីជាការរំឭកថា ក្នុងបរិយាកាសចូលឆ្នាំខ្មែរ តែកុំភ្លេចទៅដល់វីរកងកម្លាំងក៏ដូចជាជនភៀសសឹក»។

ឯកឧត្តមមានប្រសាសន៍ថា៖«ក្រៅពីនេះអ្វីដែលរៀបចំ គ្រប់ចំណូលទាំងអស់ដែលចេញមកពីផលិតផលនៃការរៀបចំនគរសង្ក្រាន្ត ដោយ ស.ស.យ.ក នឹងយកគ្រប់ចំណូលទាំងអស់នឹងបញ្ជូនទៅជួរមុខវីរកងទ័ព និងភៀសសឹក។ ក្រៅពីនេះ នឹងធ្វើការជាមួយវិស័យឯកជនដែលចូលរួមតាំងពិព័រណ៌ ក្នុងព្រឹត្តិការណ៍នគរសង្ក្រាន្ត តាមរយៈស្ម័គ្រចិត្ត វិភាគទាន ចូលរួមជួយដល់បងប្អូនជនភៀសសឹក និងទ័ពសសជួរមុខ។

«ខ្ញុំសូមជម្រាបជូនថា ពួកខ្ញុំមិនដែលភ្លេចកម្លាំងជួរមុខនិងបងប្អូនភៀសសឹកដែលមិនទាន់បានត្រឡប់ទៅផ្ទះវិញបានដែរ។ មួយជំហានទៀតថា កម្ពុជាត្រូវតែទៅមុខទោះបីជាយើងជួបប្រទះនៃស្ថានភាពដូច្នេះ មួយចំហៀងខំប្រឹងប្រែងដោះស្រាយបញ្ហាជួរមុខ តែមួយចំហៀងទៀត សកម្មភាពសង្គម សេដ្ឋកិច្ច ត្រូវតែទៅមុខនេះ មិនមែនជាកម្មវិធីសប្បាយរបស់ ស.ស.យ.ក ទេ តែជាសង្គមជាតិដែលត្រូវទៅមុខនិងរឹងមាំខ្លួនឯង»។ នេះជាការបញ្ជាក់បន្ថែម។

បើតាម ឯកឧត្តម ឧបនាយករដ្ឋម​ន្រ្តី ប្រៀបធៀបអង្គរសង្ក្រាន្តផ្តោតលើការសប្បាយៗ ប៉ុន្តែនគរសង្ក្រាន្ត ជាឱកាសបងប្អូនខ្មែរជួបជុំគ្នា បង្ហាញការសាមគ្គីភាព ពង្រឹងស្មារតីស្នេហាជាតិ និងជាឱកាសទាក់ទាញភ្ញៀវទេសចរ និងជំរុញចរន្តសេដ្ឋកិច្ចសង្គម។ សូមជម្រាបផងដែរថា នគរសង្ក្រាន្តនេះ នឹងមិនមានការរៀបចំឡានបាញ់ទឹកបង្កបរិយាកាសរីករាយដូចមុនៗទេ ប៉ុន្តែអាចជំនួសមកវិញនូវការរៀបចំពាងជាដើម ដោយសារអាកាសធាតុក្តៅខ្លាំងអំឡុងពេលនោះ៕