បច្ចេកវិទ្យាវេជ្ជសាស្រ្ត អាហ្វេរ៉ែស៊ីស (Apheresis In Calmette Hospital)

 Apheresis ជាបច្ចេកវិទ្យាក្នុងការដកយកកោសិកាឈាម (ដូចជា គ្រាប់ឈាមស ប្លាកែត និង ប្លាស្មា) ពីមនុស្សដើម្បីសង្គ្រោះជីវិតអ្នកជំងឺដែលកំពុងមានអាសន្នផ្នែកវិបត្តិឈាម។ តាំងពីចុងសតវត្សទី២០ ឆ្នាំ១៩៨១ ម៉ាស៊ីនដ៏ទំនើបមួយត្រូវបានបង្កើតឡើងជាលើកដំបូង ដើម្បីចូលរួមក្នុងការអភិវឌ្ឍន៍វិទ្យាសាស្ត្រវេជ្ជសាស្ត្រក្នុងការដកយកកោសិកាឈាម ប្រកបដោយសុវត្ថិភាព និងប្រសិទ្ធភាពខ្ពស់។ 

តាំងពីឆ្នាំ២០១៣ មន្ទីរពេទ្យកាល់ម៉ែតបានចាប់ផ្តើមអនុវត្តបច្ចេកទេសទំនើបនេះក្នុងការព្យាបាលជំងឺមហារីកឈាម ជំងឺរ៉ាំរ៉ៃមួយចំនួន និងការផ្តល់នូវផលិតផលឈាមប្លាកែតដែលមានប្រសិទ្ធភាព។ 

កន្លងមកវេជ្ជបណ្ឌិតបានអនុវត្តបច្ចេកវិទ្យានេះក្នុងការសង្គ្រោះអ្នកជំងឺជាច្រើននាក់ ដូចជាការ៖ 

   -ដកចេញនូវគ្រាប់ឈាមមហារីកពីអ្នកជំងឺមហារីកឈាម (Leukapheresis in Leukostasis Syndrom)

  – ដកយកកោសិកាប្លាកែត (Platelet Collection)

  – ប្តូរឈាមប្លាស្មា ដែលអាចដកចេញនូវសារធាតុបង្កជំងឺចេញពីឈាមប្លាស្មារបស់អ្នកជំងឺ (Therapeutic Plasma Exchange) ដើម្បីសង្គ្រោះជីវិតអ្នកជំងឺមួយចំនួនដូចជាប្រភេទជំងឺ៖ ខ្សោយសាច់ដុំធ្ងន់ធ្ងរ (Myasthenia Gravis)  វិបត្តិកកឈាមនៅសរសៃតូចៗ (Thrombotic Thrombopenic Purpura) ខ្សោយសាច់ដុំដោយវិបត្តិប្រពន្ធ័សសៃប្រសាទ (Guillain Barre Syndrom) ។ល។ 

ស្របតាមទិសទៅយុទ្ធសាស្ត្ររបស់មន្ទីរពេទ្យគឺការបន្តបេសកកម្មក្នុងការបង្កើននូវវឌ្ឍនភាពវិស័យសុខាភិបាលក្នុងស្រុក ឥឡូវនេះមន្ទីរពេទ្យកាល់ម៉ែត បាននាំចូលនូវម៉ាស៊ីនស៊េរីថ្មីមួយគ្រឿងទៀតគឺ Cobe Optia ដែលជាបច្ចេកវិទ្យាទំនើបចុងក្រោយរបស់ជប៉ុន ដើម្បីចូលរួមបង្កើនប្រសិទ្ធភាពនៃការព្យាបាលដោយអាហ្វេរ៉េស៊ីសជូនប្រជាជនខ្មែរយើង៕

អត្ថបទ៖ រស្មី