ព័ត៌មានជាតិ

សម្ដេចតេជោថា លោកស្រី កន្និដា ហ៊ានលើសពីរដ្ឋាភិបាលអាមេរិកទៅទៀត

បានផុស

២ ខែ មុន

នៅ

ថ្ងៃពុធ ១១ មីនា ២០២៦

ដោយ

ប្រធានព្រឹទ្ធសភាសម្ដេចតេជោ ហ៊ុន សែន បានចាត់ទុកការលើកឡើងរបស់ម្ចាស់ផេក The Kanitha Show លោកស្រី កន្និដា ដែលបានលើកឡើងថា អាមេរិកនឹងចូលមកចាប់ខ្លួនខ្មែរអ៊ីស្លាមដែលគាំទ្រអ៊ីរ៉ង់នៅកម្ពុជា គឺជាការគំរាមកំហែងលើពលរដ្ឋនៃរដ្ឋអធិបតេយ្យមួយ ដែលសូម្បីតែអាមេរិកក៏ប្រហែលមិនហ៊ាននឹងប្រើពាក្យនេះផង។

នៅប៉ុន្មានថ្ងៃនេះមានប្រតិកម្មជាច្រើនលើម្ចាស់ផេក The Kanitha Show ដែលបានចេញវីដេអូមួយដោយបាននិយាយថា មានពលរដ្ឋខ្មែរឥស្លាមមួយចំនួនដែលគាំទ្រអ៊ីរ៉ង់បានបង្ហោះសារគាំទ្រអ៊ីរ៉ងនិងជំរុញឱ្យខ្មែរស្អប់អាមេរិក។ និងបន្ថែមទៀតថា «សហរដ្ឋអាមេរិកនឹងដៅអ្នកទាំងនោះ ហើយគង់តែមានថ្ងៃណាមួយសហរដ្ឋអាមេរិកនឹងចូលមកចាប់ខ្មែរអ៊ីស្លាមដែលមានទំនោរទៅអ៊ីរ៉ង់ទាំងនោះដូចជានៅភីលីពីនដែរ»។

ក្នុងសំណេរលើបណ្ដាញសង្គមរបស់សម្ដេចតេជោនៅរសៀលថ្ងៃទី១១ ខែមីនានេះ បានចាត់ទុកថា ការលើកឡើងរបស់លោកស្រី កន្និដា គឺជាការគំរាមកំហែងលើពលរដ្ឋនៃរដ្ឋអធិបតេយ្យមួយដែលហ៊ានលើសពីអាមេរិកទៅទៀត។

សម្ដេចសរសេរថា៖ «ខ្ញុំមិនគួរចូលពាក់ព័ន្ធជាមួយរឿងនេះទេ ប៉ុន្តែបើខ្ញុំមិនទប់ស្កាត់ទេរឿងនេះវារីកកាន់តែធំព្រោះអ្វី ដែលកន្និដ្ឋាលើកឡើងវាមានចរិតជាការគំរាមកំហែងមកលើពលរដ្ឋនៃរដ្ឋអធិបតេយ្យមួយដែលសូម្បីរដ្ឋាភិបាលអាមេរិកក៏ប្រហែលជាមិនហ៊ាននិយាយពាក្យនេះផង»។

សម្ដេចតេជោបន្ថែមថាអ្វីដែលគ្រោះថ្នាក់ជាងនេះទៀតគឺការលើកឡើងរបស់លោកស្រី កន្និដា បានបង្កគ្រោះថ្នាក់នៃការបែងចែកនិកាយសាសនាក្នុងសាសនាឥស្លាមផង និងការបែងចែកសាសនាផ្សេងគ្នានៅ

កម្ពុជាផង។ ដោយបន្ថែមថា «អ្វីដែលគួរឲ្យខ្លាច គឺសង្គ្រាមអាវុធតែអ្វីដែលគួរឲ្យខ្លាចជាងទៀត គឺសង្គ្រាមសាសនានេះឯង»។

សម្ដេចបានបញ្ជាក់ថា ក្នុងការដឹកនាំរបស់សម្ដេចមិនដែលធ្វើឱ្យកម្ពុជាមានជម្លោះជាតិសាសន៍ និងសាសនានៅកម្ពុជាទេ។

អ្នកតាមដានភូមិសាស្ត្រនយោបាយ លោកបណ្ឌិត ជ័យ តិច ក្នុងវីដេអូដែលបានបង្ហោះក្នុងសប្ដាហ៍នេះបានចាត់ទុកការលើកឡើងរបស់លោកស្រី កន្និដា ថា «ជ្រុលនិយមអាមេរិក» ដោយមិនបានឆ្លុះបញ្ចាំងពីប្រវត្តិសាស្ត្រ និងលំនាំបញ្ហានៅមជ្ឈឹមបូព៌ាទេ។ យ៉ាងណាក្ដីសម្រាប់ករណីដែលថាអាមេរិកនឹងមកចាប់ខ្លួនពលរដ្ឋខ្មែរឥស្លាមដែលមានទំនោរទៅអ៊ីរ៉ង់នោះ គឺជាការគំរាមកំហែង បំពានសិទ្ធិក្នុងការបញ្ចេញមតិ លាបព័ណ៌ឱ្យមានការរើសអើងសាសនានៅកម្ពុជា និងបំពានអធិបតេយ្យរបស់រដ្ឋមួយ។

លោកសោកស្ដាយដែលលោកស្រី កន្និដា ដែលបានរស់នៅអាមេរិកបែរជាលើកឡើងនូវភាសាគំរាមកំហែង បំបិទសិទ្ធិក្នុងការបញ្ចេញមតិ និងបង្កអរិភាពសាសនាក្នុងប្រទេសកំណើតរបស់ខ្លួនដូច្នេះ៕