សម្ដេចតេជោ រំពឹងថា ចំណងមិត្តភាពកម្ពុជា-វៀតណាម នឹងកាន់តែរឹងមាំ ខណៈលោក តូ ឡឹម ក្លាយជាប្រធានរដ្ឋវៀតណាម

អគ្គលេខាធិការបក្សកុម្មុយនីស្តវៀតណាម លោក តូ ឡឹម ក្រសោបបានតំណែងកំពូលថ្មីមួយបន្ថែមទៀត នោះគឺតំណែងជាប្រធានរដ្ឋវៀតណាម។ តំណែងប្រធានរដ្ឋវៀតណាមរបស់លោក តូ ឡឹម​ ទទួលបានការអបអរសាទរពីប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន ដោយសម្ដេច រំពឹងថា ក្រោមការដឹកនាំរបស់លោក តូ ឡឹម ទំនាក់ទំនងដ៏យូរលង់រវាងកម្ពុជា និងវៀតណាម នឹងត្រូវបានរឹតចំណងកាន់តែរឹងមាំ និងស៊ីជម្រៅ។

សភាវៀតណាម នាព្រឹកថ្ងៃទី៧ ខែមេសា ឆ្នាំ២០២៦ បានអនុម័តជ្រើសតាំងលោក តូ ឡឹម ឱ្យកាន់តំណែងជាប្រធានរដ្ឋ សម្រាប់អាណត្តិ២០២៦-២០៣១ ក្នុងសំឡេងគាំទ្រ១០០ភាគរយពីសមាជិកសភាដែលបានចូលរួមក្នុងសម័យប្រជុំពេញអង្គរបស់សភាវៀតណាម នីតិកាលទី១៦។ ជាការកត់សម្គាល់ នេះគឺជាការវិលមកកាន់តំណែងចាស់វិញរបស់លោក តូ ឡឹម ពោលគឺលោកធ្លាប់បានកាន់តំណែងនេះមួយរយៈពេលខ្លីកាលពីឆ្នាំ២០២៤ ហើយសម្រាប់ពេលនេះ គឺជាលើកទីពីរ ដែលលោក តូ ឡឹម កាន់តំណែងកំពូលទាំងពីរក្នុងពេលតែមួយជាថ្មីម្ដងទៀត។

ភ្លាមៗបន្ទាប់ពីទទួលបានដំណឹងនេះ ប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន បានផ្ញើសារអបអរសាទរលោក តូ ឡឹម ដែលត្រូវបានបោះឆ្នោតជ្រើសរើសជាប្រធានរដ្ឋ។ សម្ដេចតេជោ តាមរយៈសារលិខិតផ្ញើជូនលោក តូ ឡឹម នៅថ្ងៃអង្គារនេះ បានចាត់ទុកការបោះឆ្នោតជ្រើសរើសនេះ ថា បានឆ្លុះបញ្ចាំងយ៉ាងច្បាស់ពីភាពជាអ្នកដឹកនាំដ៏ល្អពិសេស និងការប្តេជ្ញាចិត្តដ៏មុតមាំរបស់លោក​ តូ ឡឹម ចំពោះការអភិវឌ្ឍដ៏ឆាប់រហ័ស និងវិបុលភាពកាន់តែធំធេងរបស់វៀតណាម។

លិខិតរបស់សម្ដេចតេជោ ក៏បានគូសរំលេចអំពីទំនាក់ទំនងដ៏យូរអង្វែងរវាងប្រទេសកម្ពុជា និងប្រទេសវៀតណាម ដែលសម្ដេច បានសង្កត់ធ្ងន់ថា ចំណងមិត្តភាពនេះត្រូវបានកសាងឡើងលើគ្រឹះដ៏រឹងមាំនៃសាមគ្គីភាព ការជឿជាក់ ការយោគយល់គ្នាទៅវិញទៅមក កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។

ក្នុងន័យនេះ សម្ដេចតេជោ បានបង្ហាញក្ដីជឿជាក់ថា ក្រោមការដឹកនាំរបស់លោក តូ ឡឹម ទំនាក់ទំនងទ្វេភាគីរបស់កម្ពុជា និងវៀតណាម នឹងត្រូវពង្រឹង និងអភិវឌ្ឍឈានដល់កម្រិតកាន់តែខ្ពស់។ សម្ដេចក៏បានបញ្ជាក់ជាថ្មីទៅកាន់លោក តូ ឡឹម ពីការប្តេជ្ញាចិត្តយ៉ាងមុតមាំរបស់សម្ដេចក្នុងការបន្តធ្វើការយ៉ាងជិតស្និទ្ធ ដើម្បីធ្វើឱ្យស៊ីជម្រៅនូវកិច្ចសហប្រតិបត្តិការទ្វេភាគីទាំងក្នុងកម្រិតទ្វេភាគី និងពហុភាគី ធ្វើយ៉ាងណាធានាបាននូវឧត្តមប្រយោជន៍របស់ប្រជាជនទាំងពីរ និងដើម្បីបុព្វហេតុសន្តិភាព ស្ថិរភាព និងវិបុលភាពនៅក្នុងតំបន់ និងពិភពលោក៕