ព័ត៌មានជាតិ

មន្ត្រី ក.ប.ប ខេត្តកោះកុង ចុះពិនិត្យស្វែងរកសារធាតុគីមីហាមឃាត់បន្លែផ្លែឈើ នៅផ្សារប៉ាក់ខ្លង

បានផុស

២ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

មន្ត្រី ក.ប.ប ខេត្តកោះកុង សហការជាមួយមន្ត្រីមន្ទីរពាណិជ្ជកម្ម ចុះត្រួតពិនិត្យស្វែងរកសារធាតុគីមីហាមឃាត់បន្លែផ្លែឈើ នៅផ្សារប៉ាក់ខ្លង ស្រុកមណ្ឌលសីមា ដើម្បីធានាសុវត្ថិភាពចំណីអាហារជូនប្រជាពលរដ្ឋដែលកំពុងដាក់តាំងលក់នៅលើទីផ្សារ។

ក្រៅពីបញ្ហាតម្លៃគុណភាពប្រេងសាំង គុណភាពចំណីអាហារ ក៏ត្រូវបានមន្រ្តីជំនាញនៅខេត្តកោះកុងយកចិត្តទុកដាក់ត្រួតពិនិត្យតាមលក្ខណៈបច្ចេកទេស ដោយយកគំរូសំណាកបន្លែផ្លែឈើចំនួន ១០ មុខ មកធ្វើតេស្ត។

លោក ជា នី អនុប្រធានការពារអ្នកប្រើប្រាស់ ការប្រកួតប្រជែង និងការបង្ក្រាបក្លែងបន្លំខេត្ត និងមន្រ្តីរ៉ែខេត្តកោះកុង បានថ្លែងឲ្យដឹងកាលពីថ្ងៃទី ១១ ខែមីនា ឆ្នាំ ២០២៦ ថា ការត្រួតពិនិត្យផលិតផលទំនិញ ម្ហូបអាហារ នៅផ្សារប៉ាក់ខ្លង គឺមានសារៈសំខាន់ ដើម្បីផ្តល់សុវត្ថិភាពចំណីជូនប្រជាពលរដ្ឋជាអតិថិជន ស្របទៅតាមអនុលោមភាពដែលកំណត់ដោយក្រសួងពាណិជ្ជកម្ម។

លោក ជា នី សង្កត់ធ្ងន់ថា មន្ត្រីរបស់លោកបានពិនិត្យគំរូសំណាកបន្លែ និងគ្រឿងទេសចំនួន ១០ មុខ ស្មើនឹងតូបលក់ទំនិញចំនួន ១២ យកមកធ្វើតេស្ត ជាលទ្ធផលមិនមានសារធាតុគីមីហាមឃាត់( Sodium Hydrosulfite និង Borax) លើបន្លែ ឬបានរកឃើញទំនិញហួសកាលបរិច្ឆេទប្រើប្រាស់ ឬខូចគុណភាពនោះទេ។ ទោះយ៉ាងណា មន្ត្រី ក.ប.ប ខេត្តកោះកុង នៅតែបន្តពន្យល់ណែនាំដល់អាជីវករក្នុងផ្សារប៉ាក់ខ្លងទាំងអស់ ចូលរួមតាំងលក់ផលិតផលណាមានគុណភាព និងសុពលភាពប្រើប្រាស់ត្រឹមត្រូវ ជៀសវាងលក់ដូរផលិតផលខូចគុណភាពដែលបង្កគ្រោះថ្នាក់ដល់អ្នកប្រើប្រាស់ ករណីរកឃើញថា ល្មើស នឹងរងការផាកពិន័យ ឬបញ្ជូនសំណុំរឿងទៅតុលាការអនុវត្តតាមនីតិវិធី៕

អត្ថបទ ៖ សិរីវឌ្ឍនៈ