សេតវិមាន៖ អាមេរិកចំណាយអស់ ១២ពាន់​លានដុល្លារ​​ហើយ​ក្នុងសង្គ្រាមអ៊ីរ៉ង់

​ស្រមៃមើលថា សង្គ្រាមដែលទើបតែផ្ទុះឡើងមិនដល់មួយខែផង ប៉ុន្តែថវិកាដែលបានចំណាយនោះគឺមានចំនួនច្រើនមហិមា។ បើតាមការបញ្ជាក់ពីលោក Kevin Hassett ដែលជាទីប្រឹក្សាសេដ្ឋកិច្ចរបស់សេតវិមាន ក្នុង​បទ​សម្ភាសន៍​ជាមួយ​កម្មវិធី Face the Nation របស់ប៉ុស្តិ៍ CBS កាល​ពីថ្ងៃ​អាទិត្យ សហរដ្ឋអាមេរិកបានចំណាយប្រាក់អស់រហូតដល់​១២​ពាន់​លានដុល្លារហើយ ក្នុងប្រតិបត្តិការសង្គ្រាមប្រឆាំងនឹងប្រទេសអ៊ីរ៉ង់ ចាប់តាំងពីការវាយប្រហាររួមគ្នាជាមួយអ៊ីស្រាអែលបានចាប់ផ្តើមកាលពីថ្ងៃទី២៨ខែកុម្ភៈមក។

ទោះបីជាមានការព្រួយបារម្ភអំពីផលប៉ះពាល់សេដ្ឋកិច្ច ជាពិសេសការរំខាននៅតំបន់ច្រកសមុទ្រ Hormuz ក៏ដោយ ក៏លោក Hassett នៅតែបង្ហាញភាពជឿជាក់ថា កម្រិតផលិតកម្មប្រេងរបស់អាមេរិកនឹងជួយការពារសេដ្ឋកិច្ចក្នុងស្រុកមិន​ឲ្យ​រង្គោះរង្គើឡើយ។

តួលេខដែល​​បង្ហាញ​ដោយ​លោក Hassett ហាក់នៅមានមន្ទិលសង្ស័យច្រើន ព្រោះគ្រាន់តែសប្តាហ៍ដំបូងនៃការប្រយុទ្ធគ្នា អាមេរិកបានចំណាយលើគ្រាប់រំសេវអស់ទៅហើយដល់ទៅ​៥​ពាន់​លានដុល្លារ ខណៈដែលរដ្ឋមន្ត្រីការពារជាតិលោក Pete Hegseth បានព្រមានទៀតថា ការទម្លាក់គ្រាប់បែកនឹងត្រូវបង្កើនកម្រិតកាន់តែខ្លាំងក្លាថែមទៀតនៅពេលខាងមុខ។

បើក្រឡេកមកមើលការបាត់បង់ជីវិតវិញ ស្ថានភាពពិតជាគួរ​ឲ្យខ្លាចណាស់ ដោយនៅខាងភាគីអ៊ីរ៉ង់មានមនុស្សស្លាប់យ៉ាងហោចណាស់​១៤៤៤​នាក់ ចំណែកខាងកងទ័ពអាមេរិកវិញ បានបាត់បង់ជីវិត​១៣នាក់ និងរបួសជាង​១៤០នាក់។

អ្វីដែលកាន់តែគួរ​ឲ្យ​ចាប់អារម្មណ៍នោះគឺ គោលដៅ​នៃសង្គ្រាមនេះហាក់កំពុងតែប្រែប្រួល។ នៅពេលដែលភ្លើងសង្គ្រាមបានរីករាលដាលដល់ប្រទេសលីបង់ ហើយការវាយប្រហារតាមដ្រូនបានប៉ះពាល់ដល់តំបន់ឈូងសមុទ្រ គោលដៅដំបូងរបស់រដ្ឋបាលលោកត្រាំ ដែលថាចង់កម្ទេចកម្មវិធីនុយក្លេអ៊ែរនោះ បែរជាងាកមកដៅលើហេដ្ឋារចនាសម្ព័ន្ធប្រេងរបស់អ៊ីរ៉ង់វិញ។ ការផ្លាស់ប្តូរគោលដៅចុះឡើងបែបនេះ បានធ្វើ​​ឲ្យ​សមាជិកព្រឹទ្ធសភាដូចជាលោក Chuck Schumer បញ្ចេញប្រតិកម្មយ៉ាងខ្លាំង ដោយលោកបានរិះគន់ថា ការពន្យល់របស់រដ្ឋាភិបាលគឺគ្មានភាពច្បាស់លាស់ និងមិនមានភាពស៊ីសង្វាក់គ្នាទាល់តែសោះ អំពីគោលបំណងពិតប្រាកដនៃការវាយប្រហារនេះ៕

ប្រែសម្រួល៖ ឈាង