ឧប. ហ៊ុន ម៉ានី រពឹងថារោងចក្រអ៊ែដ្យាយល៍ ស្វេតថឺ នឹងជំរុញកំណើនសេដ្ឋកិច្ចជាតិ និងជួយឱ្យអ្នកកំពង់ស្ពឺ កាន់តែមានជីវភាពល្អប្រសើរឡើង

ឯកឧត្តម ហ៊ុន ម៉ានី ឧបនាយករដ្ឋមន្រ្ដី រដ្ឋមន្ដ្រីក្រសួងមុខងារសាធារណៈ និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ នាព្រឹកថ្ងៃទី១៨ ខែមីនា ឆ្នាំ២០២៦ បានអញ្ជើញជាអធិបតីក្នុងពិធីសម្ពោធជាផ្លូវការរោងចក្រចាក់ និងកាត់ដេរសម្លៀកបំពាក់អ៊ែដ្យាយល៍ ស្វេតថឺ(ខេមបូឌា) Agile Sweater(Cambodia) នៅភូមិបុរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាកិច្ចចាប់ផ្ដើម អភិបាលរងខេត្តកំពង់ស្ពឺ​ តូច ប៉ូលីវ៉ា  បានឡើងសម្ដែងនូវភាវរៈកិច្ចនៃការអញ្ជើញចូលរួមរបស់ឯកឧត្តមប្រធាន និងរាយការណ៍អំពីសមិទ្ធផល ការងារសម្រេចបានរបស់ខេត្តកំពង់ស្ពឺ ក្នុងរយៈពេលកន្លងមក។

នាឱកាសនេះ ឯកឧត្តម ហ៊ុន ម៉ានី បានសម្ដែងនូវការកោតសរសើរ និងថ្លែងអំណរគុណ ដល់រដ្ឋបាលខេត្ត ក្រសួង ស្ថាប័នពាក់ អាជ្ញាធរគ្រប់លំដាប់ថ្នាក់ និងអ្នកវិនិយោគ ទាំងក្នុងស្រុក និងមកពីក្រៅប្រទេស ដែលបានផ្តល់ការទុកចិត្តចំពោះការដឹកនាំរបស់រាជរដ្ឋាភិបាលកម្ពុជា ហើយជាពិសេសបានជ្រើសរើសយកខេត្តកំពង់ស្ពឺ ធ្វើជាទីតាំងសាងសង់រោងចក្រ សហគ្រាស ដើម្បីផលិតនិងនាំចេញ ដែលផ្តល់ទាំងឱកាសការងារ និងជួយជំរុញដល់កំណើនសេដ្ឋកិច្ចជាតិ ព្រមទាំងធ្វើឱ្យអ្នកខេត្តកំពង់ស្ពឺ កាន់តែមានជីវភាពល្អប្រសើរឡើង។

សូមជម្រាបថាពិធីនេះមានការអញ្ជើញចូលរួមពីសំណាក់ អភិបាលរងនៃគណៈអភិបាលខេត្ត ប្រធានក្រុមការងារចុះជួយក្រុង ថ្នាក់ដឹកនាំខេត្ត គណៈអភិបាលក្រុង ព្រមទាំង ប្រធានក្រុមអគ្គនាយកក្រុមហ៊ុន ដៃគូជីវកម្ម កម្មករ កម្មការិនី ប្រជាពលរដ្ឋ ចូលរួមប្រមាណជាង ៩០០នាក់៕