ព័ត៌មានអន្ដរជាតិ

យន្តហោះចម្បាំងរុស្ស៊ី MiG-៣១ ហោះល្បាតលើដែនសមុទ្រជប៉ុន

បានផុស

១ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

ប៉ុន្មានថ្ងៃក្នុងសប្តាហ៍ថ្មីៗនេះ កងកម្លាំងប្រដាប់អាវុធរុស្ស៊ីបានហោះល្បាត និងឃ្លាំមើលជាបន្តបន្ទាប់នៅតំបន់ផ្សេងៗ រួមទាំងដែនសមុទ្រជប៉ុន។ ករណីហោះល្បាតមួយក្នុងចំណោមករណីថ្មីបំផុត គឺរុស្ស៊ីប្រើយន្តហោះចម្បាំងស្ទាក់ចាប់ MiG-៣១ របស់កងកម្លាំងអវកាស (VKS) ក្នុងការល្បាត និងហ្វឹកហាត់ហោះហើរក្នុងដែនអាកាសអន្តរជាតិសមុទ្រជប៉ុន។ យ៉ាងណាទិដ្ឋភាពទាំងនេះគឺយន្តហោះកំពុងប្រតិបត្តិការ ខណៈបំពាក់ដោយមីស៊ីលល្បឿនលឿនជាងសំឡេង Kinzhal ។

យន្តហោះចម្បាំងស្ទាក់ចាប់ MiG-៣១ របស់រុស្ស៊ី។ រូបភាព៖ MVM

យោងតាមគេហទំព័រ Zona.Militar ថ្ងៃទី១៧ខែមីនា ហេតុការណ៍នេះបានបញ្ជាក់ដោយក្រសួងការពារជាតិរុស្ស៊ីផ្ទាល់ និងចេញផ្សាយជាវីដេអូមួយនៅលើគេហទំព័រផ្លូវការ បង្ហាញថា យន្តហោះចម្បាំងស្ទាក់ចាប់ Mikoyan MiG-៣១ ចំនួនពីរគ្រឿងកំពុងធ្វើការហោះហើរល្បាតលើដែនសមុទ្រជប៉ុន។

ក្រសួងការពារជាតិរុស្ស៊ីបញ្ជាក់ថា៖ «យន្តហោះ MiG-៣១I បំពាក់ដោយមីស៊ីលបាលីស្ទិកល្បឿនលឿន Kinzhal ធ្វើការហោះហើរតាមកាលវិភាគនៅក្នុងដែនអាកាសលើដែនទឹកអព្យាក្រឹតនៃសមុទ្រជប៉ុន។ អំឡុងពេលហោះហើរ ក្រុមនាវិក MiG-៣១ បានអនុវត្តការចាក់ប្រេងតាមអាកាស។ ការហោះហើររបស់យន្តហោះកងកម្លាំងអវកាសរុស្ស៊ី ធ្វើឡើងដោយអនុលោមតាមច្បាប់អន្តរជាតិសម្រាប់ការប្រើប្រាស់ដែនអាកាស»។

ទោះបីជាហេតុការណ៍ដ៏រសើបនេះកើតឡើងលើដែនអាកាសជប៉ុនក្តីក៏ភាគីក្រុងតូក្យូមិនទាន់ចេញប្រត្តិកម្មណាមួយឡើយ។

គួរបញ្ជាក់ថា រឿងនេះមិនតូចតាចទេ ព្រោះសកម្មភាពរបស់កងកម្លាំងប្រដាប់អាវុធរុស្ស៊ីកំពុងចូលជិតប្រជុំកោះជប៉ុន ជាធម្មតានឹងមានការជូនដំណឹង និងការដាក់ពង្រាយដោយទ្រព្យសម្បត្តិយោធារបស់ជប៉ុនវិញ។

ថ្មីៗនេះជប៉ុនក៏បានបញ្ជាក់ថាយន្តហោះ P-៣C Orion របស់កងកម្លាំងការពារដែនសមុទ្រក្រុងតូក្យូក៏បានហោះឃ្លាំមើលនិងតាមដានសកម្មភាពនាវាមុជទឹកម៉ាក Kilo II នៅភាគនិរតីនៃប្រជុំកោះជប៉ុនផងដែរ៕

ប្រែសម្រួល៖ ណឺ មិនា