មន្ទីរបញ្ចកោណត្រៀមបញ្ជូនកងទ័ពឆត្រយោងពិសេស​រាប់ពាន់នាក់ ទៅកាន់មជ្ឈិមបូព៌ា

ស្របពេលដែលលោកប្រធានាធិបតី ដូណាល់ ត្រាំ កំពុងជជែកពីលទ្ធភាពនៃកិច្ចព្រមព្រៀងសន្តិភាពជាមួយអ៊ីរ៉ង់ មន្ទីរបញ្ចកោណបែរជាមានគម្រោងបញ្ជូនកងទ័ពឆត្រយោង​ពិសេស​ពីកងពលធំអាកាសលេខ៨២ ចំនួនពី ៣០០០ ទៅ ៤០០០នាក់ ទៅកាន់តំបន់មជ្ឈិមបូព៌ា​ទៅ​វិញ។

យោង​តាម​រ៉យទ័រ​​ចុះ​ផ្សាយ​ថ្ងៃទី​២៥​ខែ​មីនា​ឆ្នាំ​២០២៦ ទោះបីជាមិនទាន់មានការសម្រេចចិត្តច្បាស់លាស់ក្នុងការបញ្ជូនទ័ពចូលទៅក្នុងទឹកដីអ៊ីរ៉ង់ក៏ដោយ ប៉ុន្តែការចល័តទ័ពចេញពីបន្ទាយ Fort Bragg រដ្ឋ North Carolina នេះ គឺមានគោលដៅពង្រីកសមត្ថភាពសម្រាប់ប្រតិបត្តិការផ្សេងៗ ដូចជា ការការពារតំបន់ឆ្នេរសមុទ្រ ឬមជ្ឈមណ្ឌលប្រេងយុទ្ធសាស្ត្រនៅកោះ Kharg ជាដើម។

ការត្រៀមបញ្ជូនកងទ័ពឆត្រយោងនេះ ធ្វើឡើងបន្ទាប់ពីការបញ្ជូនកងទ័ពម៉ារីនរាប់ពាន់នាក់តាមនាវាចម្បាំង USS Boxer រួចមកហើយ។ អ្នកនាំពាក្យសេតវិមាន លោកស្រី Anna Kelly បានបញ្ជាក់ថា លោកត្រាំ នៅតែរក្សាទុក «រាល់ជម្រើសយោធាទាំងអស់នៅក្នុងដៃ» ថ្វី​ដ្បិត​​លោកទើបតែបានផ្អាកការវាយប្រហារលើរោងចក្រអគ្គិសនីរបស់អ៊ីរ៉ង់ក៏ដោយ។ គិតចាប់តាំងពីសង្គ្រាមបានផ្ទុះឡើងកាលពីថ្ងៃទី២៨កុម្ភៈ សហរដ្ឋអាមេរិកបានវាយប្រហារលើគោលដៅចំនួន ៩០០០​កន្លែងក្នុងប្រទេសអ៊ីរ៉ង់ ដែលបណ្តាល​ឲ្យ​ទាហានអាមេរិក ១៣នាក់ស្លាប់ និង ២៩០នាក់រងរបួស។

យ៉ាង​ណា​មិញ ការបង្កើនកម្លាំងយោធានេះ កំពុងប្រឈមនឹងការមិនពេញចិត្តពីសំណាក់ប្រជាជនអាមេរិកខ្លួនឯង ដោយយោងតាមការស្ទង់មតិរបស់ Reuters/Ipsos បង្ហាញថា ពលរដ្ឋដល់ទៅ ៦១% មិនគាំទ្រការវាយប្រហារនេះទេ។ សម្រាប់លោកត្រាំ ការប្រើប្រាស់កងទ័ពជើងគោកគឺជាហានិភ័យនយោបាយដ៏ធំមួយ ព្រោះលោកធ្លាប់បានសន្យាក្នុងយុទ្ធនាការបោះឆ្នោតថា នឹងជៀសវាងជម្លោះថ្មីៗនៅមជ្ឈិមបូព៌ា។

បច្ចុប្បន្ន អាមេរិកអះអាងថាការចរចាកំពុងមានផ្លូវល្អ តែ​ខាងអ៊ីរ៉ង់វិញនៅតែបន្តបដិសេធថា មិនដែលមានការចរចាណាមួយកើតឡើងឡើយ៕

ប្រែសម្រួល៖ ឈាង