ក្រសួងថៃព្រមានថា សន្ទស្សន៍កម្ដៅ​អាចហក់ឡើងដល់​៦០​អង្សាសេ នៅដើមខែមេសា

ក្រសួងសេដ្ឋកិច្ច និងសង្គមឌីជីថល (DES) របស់ប្រទេសថៃ បានចេញសេចក្តីព្រមានយ៉ាងអាសន្នមួយនៅថ្ងៃចន្ទ​ទី​៣០​ខែ​មីនា​ឆ្នាំ​២០២៦​នេះថា សន្ទស្សន៍កម្ដៅ (Heat Index) អាចនឹងហក់ឡើងខ្ពស់រហូតដល់៦០អង្សាសេ​ឯណោះ​នា​​ដើមខែមេសាខាងមុខ។

យោង​តាម​បាងកកប៉ុស្ដិ៍ ក្រសួងថៃ​បានបញ្ជាក់ថា ស្ថានភាពក្ដៅហួតហែងខ្លាំងបែបនេះ គឺជាហានិភ័យខ្ពស់បំផុតសម្រាប់ក្រុមមនុស្សងាយរងគ្រោះ រួមមាន មនុស្សចាស់ កុមារ ស្រ្តីមានផ្ទៃពោះ និងអ្នកដែលមានជំងឺប្រចាំកាយ ជាពិសេសអ្នកលេបថ្នាំបញ្ចុះសម្ពាធឈាម ឬថ្នាំបញ្ចុះទឹកនោម ដែលធ្វើ​ឲ្យ​រាងកាយពិបាកគ្រប់គ្រងសីតុណ្ហភាព។

ដើម្បីការពារសុខភាព សាធារណជនត្រូវបានណែនាំ​ឲ្យ​ចៀសវាងសកម្មភាពនៅខាងក្រៅផ្ទះ ចាប់ពីម៉ោង ១រសៀល ដល់ម៉ោង ៤រសៀល និងត្រូវញ៉ាំទឹក​ឲ្យ​បានយ៉ាងហោចណាស់ ៨កែវក្នុងមួយថ្ងៃ។ អ្នកជំនាញបានផ្តល់អនុសាសន៍​ឲ្យ​ស្លៀកសម្លៀកបំពាក់ស្តើងៗដែលអាចខ្យល់ចេញចូលបានល្អ ប្រើប្រាស់មួក ឬឆ័ត្រ ហើយចៀសវាងការទទួលទានគ្រឿងស្រវឹង និងភេសជ្ជៈដែលមានជាតិស្ករខ្ពស់ ដែលអាចបណ្តាល​ឲ្យ​រាងកាយបាត់បង់ជាតិទឹកកាន់តែខ្លាំង។

សម្រាប់អ្នកដែលត្រូវធ្វើការងារ ឬហាត់ប្រាណនៅខាងក្រៅ គួរធ្វើជាក្រុមដើម្បីជួយមើល​គ្នាទៅវិញទៅមកក្នុងករណីមានអាការៈប៉ះពាល់ដោយសារកម្ដៅខ្លាំង ខណៈដែលបញ្ហាបំពុលដោយធូលីដី (PM 2.5) ក៏កំពុងស្ថិតក្នុងកម្រិតគ្រោះថ្នាក់នៅតំបន់ភាគខាងជើង និងភាគឦសាន​ប្រទេស​ថៃ​ផងដែរ៕

ប្រែសម្រួល៖ ឈាង