នគរបាល បន្តផ្សព្វផ្សាយដល់អាជីវករផ្សារអូរឫស្សី ហាមមិនឲ្យដាក់តាំងលក់កាំភ្លើងបាញ់ទឹក ផាវ និងគ្រឿងផ្ទុះផ្សេងៗ

នគរបាលរាជធានី បន្តចុះផ្សព្វផ្សាយដល់អាជីវករនៅផ្សារអូរឫស្សី ចូលរួមសហការ ដោយមិនឲ្យមានការដាក់តាំងលក់នូវ​កាំភ្លើងបាញ់ទឹក ផាវ និងគ្រឿងផ្ទុះផ្សេងៗ ដើម្បីបង្ការនៅរដូវបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងកាលពីព្រឹកថ្ងៃទី ០២ ខែមេសា ឆ្នាំ ២០២៦ នេះ សមត្ថកិច្ចជំនាញបទល្មើសសេដ្ឋកិច្ច បើកកិច្ចសហការជាមួយ គណៈកម្មការផ្សារអូរឫស្សី បានចុះណែនាំដល់អាជីវករ ដោយហាមឃាត់មិនឲ្យលក់ដូរកាំភ្លើងបាញ់ទឹក និងគ្រឿងផ្ទុះ ក្នុងផ្សារអូរឫស្សី ដែលស្ថិតក្នុងសង្កាត់អូរឫស្សីទី ១ ខណ្ឌ ៧ មករា រាជធានីភ្នំពេញ។

នគរបាលជំនាញ បានឲ្យដឹងថា កម្លាំងសមត្ថកិច្ចទទួលផែនការងារ បទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ សហការជាមួយ គណៈកម្មការផ្សារអូរឫស្សី បានចុះផ្សព្វផ្សាយ អប់រំណែនាំដល់អាជីវករ ក្រើនរំលឹក ហាមមិនឲ្យលក់កាំភ្លើងបាញ់ទឹក-ផាវ-និងគ្រឿងផ្ទុះផ្សេងៗ នៅក្នុងបរិវេណផ្សារអូរឫស្សី ដើម្បីជាការចូលរួមសហការជាមួយអាជ្ញាធរមានសមត្ថកិច្ច លើការលុបបំបាត់មិនឲ្យមានការលេងបាញ់ទឹក និងបាញ់កាំជ្រួច នារដូវបុណ្យចូលឆ្នាំថ្មី ប្រពៃណីជាតិខ្មែរ ខាងមុខ។

នគរបាល បានបន្តថា បើជនណានៅតែបំពាន ឬ ប្រព្រឹត្តល្មើស មិនគោរពតាមសេចក្តីណែនាំខាងលើ បង្កឲ្យមានចលាចលក្នុងសង្គម ប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ត្រូវទទួលទោសទណ្ឌតាមច្បាប់ជាធរមាន។

គួរជម្រាបថា កាលពីថ្ងៃទី ២៤ ខែមីនា ឆ្នាំ ២០២៦ រដ្ឋបាលរាជធានីភ្នំពេញ ហាមដាច់ខាត មិនឲ្យមានការដុតផាវ កាំជ្រួច ឬ ប្រើប្រាស់គ្រឿងផ្ទុះគ្រប់ប្រភេទ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ នេះ។ ក្នុងនោះ មិនឲ្យមានការនាំចូល ចែកចាយ ទិញលក់ផាវ គ្រឿងផ្ទុះគ្រប់ប្រភេទ និងហាមលេងល្បែងជះទឹក ការជះទឹកមានពណ៌ ឬ ទឹកកខ្វក់ គប់ស្បោងទឹក កាំភ្លើងបាញ់ទឹក ស្នប់បូមបាញ់ទឹក និងការវាយដោយរំពាត់ ឬ ឧបករណ៍ផ្សេងៗ ធ្វើឲ្យប៉ះពាល់ដល់ប្រជាពលរដ្ឋកំពុងធ្វើដំណើរនៅតាមដងផ្លូវ ដែលអាចនាំឲ្យមានគ្រោះថ្នាក់ចរាចរណ៍ ប៉ះពាល់អាយុជីវិត និងបង្កឲ្យមានរបួស ឬ ខូចខាតទ្រព្យសម្បត្តិ៕
អត្ថបទ ៖ រដ្ឋា