ព័ត៌មានអន្ដរជាតិ

មកស្គាល់ មីស៊ីល៨ប្រភេទធំៗរបស់ជប៉ុន និងមានសមត្ថភាពខុសៗគ្នា

បានផុស

៣ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

គិតត្រឹមថ្ងៃទី០១ ខែមេសា ឆ្នាំ២០២៦ ប្រទេសជប៉ុនចាប់ផ្តើមដាក់ពង្រាយមីស៊ីលរយៈចម្ងាយឆ្ងាយថ្មីផលិតក្នុងស្រុក ប្រឆាំងការវាយប្រហារនានាចូលទឹកដីខ្លួន ជាពិសេសបង្កើនការព្រួយបារម្ភយ៉ាងខ្លាំងពីខាងភាគីចិន ដោយសារតែមីស៊ីលទាំងនោះមានសមត្ថភាពក្នុងការវាយប្រហារដល់ទឹកដីក្រុងប៉េកាំង។

យោងតាមកាសែត The Diplomat ផ្សាយចុងខែមីនា ឆ្នាំ២០២៦ ការដាក់ពង្រាយមីស៊ីលថ្មីនៃប្រព័ន្ធ «Type-២៥» គឺជាផ្នែកមួយនៃយុទ្ធសាស្ត្រល្អនិងទាន់សម័យជាងមុន ដើម្បីផ្លាស់ប្តូរពីជំហរការពារតែមួយទៅជាជំហរមានសមត្ថភាពវាយបកខ្លាំងជាងមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសជប៉ុនមានគម្រោងដាក់ពង្រាយឃ្លាំងអាវុធចម្រុះ មានទាំងមីស៊ីលរយៈចម្ងាយឆ្ងាយចំនួន៨ប្រភេទផ្សេងគ្នា។

+ ខាងក្រោមនេះគឺជាប្រភេទមីស៊ីល៨ សំខាន់ៗ ដែលជប៉ុនមាន និងនាំឱ្យមានភាពតានតឹងក្នុងតំបន់កើនឡើង៖

១. មីស៊ីលប្រភេទ Type-១២ បាញ់ពីដីឆ្ពោះទៅលើនាវា (SSM)៖ វាមានសមត្ថភាពពង្រីកពី ២០០ គីឡូម៉ែត្រដល់ជាង ១០០០ គីឡូម៉ែត្រ។ មីស៊ីលនេះមានមូលដ្ឋានបាញ់ពីលើដី អាចកំណត់គោលដៅនាវាកងទ័ពជើងទឹកនិងមានសមត្ថភាពវាយប្រហារមូលដ្ឋានសត្រូវលើដីផ្ទាល់ (ការវាយប្រហារតបត)។ វាត្រូវបានដាក់ពង្រាយជាលើកដំបូងនៅជំរំ Kengun ក្នុងខេត្ត Kumamoto ក្នុងខែមីនា ឆ្នាំ ២០២៦។

២. គ្រាប់មីស៊ីលប្រភេទ Type-២៥ (២៥HGP)៖ វាត្រូវបានរចនាឡើងសម្រាប់ការពារកោះដាច់ស្រយាល ដើម្បីទប់ទល់នឹងនាវារបស់សត្រូវនិងវាយគោលដៅផ្ទាល់ដី។ ចំណែកលក្ខណៈពិសេសវិញ អាចហោះក្នុងល្បឿនលឿនបំផុតលើគន្លងមិនទៀងទាត់ ធ្វើឱ្យសត្រូវពិបាកស្ទាក់ចាប់។ មីស៊ីលប្រភេទនេះ ភាគច្រើនឈរជើងនៅជំរំ Fuji ក្នុងខេត្ត Shizuoka ។

៣. មីស៊ីលបញ្ជាល្បឿន Tomahawk ៖ ផលិតនៅសហរដ្ឋអាមេរិកបាញ់បានចម្ងាយជាង ១៦០០ គីឡូម៉ែត្រ។ ជប៉ុនកំពុងទិញ Tomahawks រហូតដល់ ៤០០ គ្រឿងដាក់ពង្រាយលើនាវាពិឃាត បំពាក់ដោយសមត្ថភាពការការពារ «Aegis» ។

៤. មីស៊ីលបាញ់ពីដីទៅកប៉ាល់រូបរាងថ្មី (SSM ថ្មី)៖ មីស៊ីលនេះ បច្ចុប្បន្នកំពុងស្ថិតក្រោមការអភិវឌ្ឍដោយក្រុមហ៊ុន Kawasaki Heavy Industries ជាមួយនឹងតេស្តបង្ហាញពីការធ្វើសមយុទ្ធការពារទំនើប ហើយជប៉ុនរំពឹងថាសមត្ថភាពវានឹងមានលើសពីមីស៊ីលប្រភេទ Type-១២ ។

៥. សមត្ថភាពមីស៊ីលរយៈចម្ងាយឆ្ងាយផ្សេងទៀត (កំពុងអភិវឌ្ឍ/ផ្គត់ផ្គង់)៖ គ្រាប់ផ្លោងមីស៊ីលល្បឿនលឿន (រយៈចម្ងាយឆ្ងាយជាងមីស៊ីលមុនៗ) នឹងធ្វើកំណែឡើងវិញនាពេលអនាគត រចនាឡើងដើម្បីឱ្យមានចម្ងាយរហូតដល់ ៣០០០គីឡូម៉ែត្រ។

៦. មីស៊ីលវាយប្រហាររួមគ្នា (JSM)៖ មីស៊ីលបញ្ជាទិសផលិតនៅប្រទេសន័រវេសសម្រាប់យន្តហោះចម្បាំង F-៣៥A បាញ់បានចម្ងាយជាង ៥០០គីឡូម៉ែត្រ។

៧. មីស៊ីលឈរជើងអាកាសទៅដីរួមគ្នា (JASSM)៖ វាមានតួនាទីសម្រាប់ឈរជើងលើអាកាស។

៨. មីស៊ីលល្បឿនលឿនជាងសំឡេង៖ ជប៉ុនកំពុងសាងសង់គំរូដើមនៃម៉ាស៊ីន scramjet សម្រាប់អាវុធល្បឿនលឿនជាងសំឡេងនាពេលអនាគត។

+ ហេតុអ្វីបានជាប្រទេសចិនមានការព្រួយបារម្ភលើការដាក់ពង្រាយរបស់ជប៉ុន? ទីក្រុងប៉េកាំងបានសម្តែង «ការព្រួយបារម្ភយ៉ាងខ្លាំង» ចំពោះការពង្រាយមីស៊ីលរបស់ទីក្រុងតូក្យូ ដោយអះអាងថាអាវុធទាំងនោះគឺជា «ការវាយលុក» និងរំលោភលើរដ្ឋធម្មនុញ្ញសន្តិភាពនិយមរបស់ប្រទេសជប៉ុននិងការសន្យាក្រោយសង្គ្រាមលោកលើកទី២។

អ្នកសង្កេតការណ៍ចិនព្រមាននិងបារម្ភថា បណ្តាញមីស៊ីលទាំងនេះអាចហោះទៅដល់តំបន់ឆ្នេរសមុទ្រនិងដីគោករបស់ប្រទេសចិន៕

ប្រែសម្រួល៖ ណឺ មិនា